Read Gaddi कुलुस्सियों 4 Bible Online

कुलुस्सियों 4 - Gaddi bible

कुलुस्सियों 4

¹हे मालको, अपणै-अपणै दासा सितै न्याय अतै ठीक-ठीक व्यवहार करा ऐह समझी करी कि स्वर्गा मन्जा तून्दा भी अक्क मालक हा।

²प्रार्थना मन्ज लगी रेय्आ अतै धन्यवाद सितै यीशु मन्ज जागदै रेय्आ।

³अतै ठेरै सोगी सोगी असु तिकर भी प्रार्थना करदै रेय्आ कि प्रमात्मां असिओ बचना हुनाणै रा मौका देय्आ कि अहै मसीह रै तैस भेदा रा बखान करी सकन, अतै अऊँ ऐस प्रचार री वजह थऊँ जेलखानै मन्ज हा।

⁴प्रार्थना करा कि अऊँ ऐस बचना रै संदेश जो साफ-साफ प्रचार करी सकू, जियां मिन्जो करना चहिन्दा।

⁵अविस्वासी सोगी गल्ल करनै तांयै हरेक मौके रा सही तरीकै इस्तेमाल करा।

⁶तून्दै बचन हमेशा दया सोगी भरूरा मना जो मोहणै बाळै भून कि तूसु जो सबी मणु जो ठीक रीति सोगी विस्वास रै बारै मन्ज उतर दिणा चली अईआ।

⁷मेरै प्यारे विस्वासी भाई अतै विस्‍वासा मन्ज सेवक, तुखिकुस जैडा कि प्रभु मन्ज मेरा सोगी कम करनै बाळा हा तैस मेरी सब गल्ला तूसु जो दसी दिणी हिन।

⁸तैस जो मैंई तूसु बलै ऐत तांई भैजुरा कि तूसु जो इन्दी दशा रा पता लगी गच्छा अतै सो तुसिओ विस्वास मन्ज मजबुत करा।

⁹अतै तैस सोगी उनेसिमुस जो भी भैजुरा हा जैडा कि विस्वासयोग्य हा अतै प्यारा विस्वासी भाई अतै तून्दै ही ग्राँ रा हा, ऐस तूसु जो ऐठी री सारी गल्ला दसी दिणी।

¹⁰अरिस्तर्खुस जैडा कि मिन्जो सोगी कैदा मन्ज हा अतै मरकुस जैडा कि बरनबास रा रिस्तेदार हा। अऊँ जाणदा हा तुसिओ पैहलै ही थऊँ मरकुस रै बारै मन्ज बलुरा थू कि अगर सो तूसु बल्लै अईआ ता तैस सोगी खरा वर्ताव करै।

¹¹अतै यीशु जैसिओ होर मणु यूस्तुस बल्‍दै हिन तूसु जो नमस्ते बल्‍दै हिन। यहूदी विस्वासी मन्ज ऐह त्राई मणु ही हिन जैड़ै प्रमात्मैं रै राज्य तांई मेरै साथी हिन अतै मिन्जो बड़ा हौंसला दिन्दै हिन।

¹²इपफ्रास जैडा कि तून्दै ही ग्राँ रा हा, अतै मसीह यीशु रा दास हा, तूसु जो नमस्ते बलदा हा। सो हमेशा दिला थऊँ तूसु तांई प्रार्थना करनै री कोशिश करदा हा ताकि तुहै सिद्व भूच्ची करी पूरै विस्वास सितै प्रमात्मैं री इच्छा पुर टिकी रैहन।

¹³अऊँ तसेरा गवाह हा कि सो तूसु तांई अतै लौदीकिया अतै हियरापुलिस शहरा मन्ज रैहणै बाळै मणु तांई दिला थऊँ प्रार्थना करदा रैहन्दा हा।

¹⁴मेरै प्यारे बैईद लूका अतै देमास तुसिओ नमस्कार करदै हिन।

¹⁵लौदीकिया शहर रै विस्वासी भाई जो अतै बैहण नुमफास अतै तसारी घरा री कलीसिया जो नमस्कार बल्लै।

¹⁶जैहणै ऐह चिट्ठी तूसु बल्लै पढ़ी गच्छा ता ईयां करै कि लौदीकिया शहर री कलीसिया मन्ज भी ऐतिओ पढ़नै तांयै दिन्यै फिरी जैड़ी चिट्ठी मैंई लौदीकिया री कलीसिया जो भैजुरी हा तैतिओ तुहै भी पढ़ै।

¹⁷फिरी अर्खिप्पुस सितै बल्लै कि जैड़ी सेवा प्रभु मन्ज तिजो दितुरी हा तैसा जो धैना सितै पूरी करै।

¹⁸अऊँ पौलुस भी तूसु जो अपणै हथा सितै ऐसा पत्री मन्ज लिखीकरी नमस्कार बलदा हा। याद रखा कि अऊँ जेलखानै मन्ज हा अतै मिन्जो तांयै प्रार्थना करदै रेय्आ, तूसु पुर प्रमात्मैं रा अनुग्रह भुन्दा रेय्आ। आमीन।