Read Gaddi 1 थिस्सलुनीकियों 1 Bible Online

1 थिस्सलुनीकियों 1 - Gaddi bible

1 थिस्सलुनीकियों 1

¹ऐह पत्री पौलुस लिखु करदा। सो सिलवानुस अतै तीमुथियुस री तरफा थऊँ थिस्सलुनीकियों शहर री कलीसिया रै विस्वासी जो जंयारै नां पिता प्रमात्मैं अतै प्रभु यीशु मसीह मन्ज हिन बलदा हा, अनुग्रह अतै शान्ती तुसिओ मुळदी रेय्आ।

²अहै अपणी प्रार्थना मन्ज तुसिओ हमेशा याद करदै हिन अतै लगातार तूसु सबी रै बारै मन्ज प्रमात्मैं रा धन्यवाद करदै हिन।

³अतै अपणै पिता प्रमात्मैं रै सामणै तून्दै विस्‍वासा रै कम अतै प्यारा री मेहनत अतै इन्दै प्रभु यीशु मसीह मन्ज उम्मीद रै धीरजा जो हमेशा याद करदै हिन।

⁴अतै हे विस्वासी भाईओ, प्रमात्मैं रै प्यारे मणुओ अहै जाणदै हिन कि तुसै चुणुरै हिन।

⁵क्ओकि यीशु मसीह रा सुसमाचार तूसु बलै ना सिर्फ शब्दा रै द्धारा पर पवित्र आत्मा रै सामर्थ अतै प्रमाण सोगी पुज्‍जु हा, जिआं कि तुसै जाणदै कि अहै तून्दै मन्जै अहै तुन्दी भलाई तांयै इन्दा व्यवहार किना थू।

⁶अतै तुहै बड़ै क्‍लेशा मन्ज पवित्र आत्मा रै द्धारा दितुरी खुशी सोगी बचना जो मनी करी इन्दी अतै प्रभु री चाली सांईं चलना लगै।

⁷ऐठी तिकर कि मकिदुनिया अतै अखया परदेस रै सब विस्वासी तांई तुसै आदर्श बणै।

⁸क्ओकि तूसु थऊँ ना सिर्फ मकिदुनिया अतै अखया परदेस मन्ज प्रभु रा बचन हुणाआ गो पर तून्दै विस्‍वासा री जैडा कि प्रमात्मैं पुर हा, हर जगहा इन्‍नी चर्चा फैली गई हा कि असु जो बलणै री जरूरत ही निआं।

⁹क्ओकि सो मणु इन्दै बारै मन्ज ऐह बलदै हिन कि जैहणै अहै तूसु बल्लै आये ता तुहै कियां इन्दा स्वागत करू, अतै तुसै किआं मूर्तिपूजा थऊँ प्रमात्मैं री कनारी फिरै ताकि जिन्दै अतै सचै प्रमात्मैं री सेवा करी सकन।

¹⁰अतै प्रमात्मैं रै पुत्रा री स्वर्गा थऊँ फिरी ईणै री भाळ करदै रेय्आ जैसिओ प्रमात्मैं मरूरै थऊँ जिन्दा करू, मतलब कि यीशु री जैडा कि असु जो ईणैबाळै क्रोध अतै न्याय थऊँ बचान्‍दा।