Read Gaddi 1 थिस्सलुनीकियों 2 Bible Online

1 थिस्सलुनीकियों 2 - Gaddi bible

1 थिस्सलुनीकियों 2

¹हे विस्वासी भाईओ, तुसै जाणदै हिन कि इन्दा तूसु बल्लै ईणा लाभदायक भुआ।

²बल्‍की तुसै अप्पू ही जाणदै हिन कि पैहलै फिलिप्पी शहर मन्ज दुख झेलनै अतै सताव सैहणै पुर भी इन्दै प्रमात्मैं असु जो इन्‍नी हिम्मत दिती। फिरी अहै थिस्सलुनीकियों शहर मन्ज भी प्रमात्मैं रा सुसमाचार भारी वरोध भूणै रै बावजूद भी तूसु जो हुणाई सकै।

³क्ओकि इन्दा उपदेश कोई चलाकी अतै बुरै इरादै सितै ना हा अतै ना ही छल सितै हा।

⁴पर जिन्‍ना प्रमात्मैं असु जो काबल समझी करी असु बल्लै सुसमाचार सौंपुआ। अहै भी तियां ही तठेरा बखान करदै हिन अतै ऐत मन्ज मणु जो ना पर प्रमात्मैं जो जैडा इन्दै मनां जो जाणदा खुश करदै हिन।

⁵क्ओकि तुसै जाणदै हिन कि अहै ना ता कदी चापलूसी री गल्ला करदै थियै अतै ना ता लाळचा तांई बहाना करदै थियै, इन्या गल्ला रा प्रमात्मां गवाह हा।

⁶अहै मणु थऊँ आदर ना चाहन्दै थियै, अतै ना तूसु थऊँ ना हि कसी होरी थऊँ, हालांकि असिओ मसीह यीशु रै प्रेरित भूणै रै नातै तूसु थऊँ मदद लैणै रा अधिकार हा।

⁷पर जिआं माँ अपणै बच्चै रा लालण-पालन करदी हा, तियां ही अहै भी तूसु मन्ज रैई करी कोमलता दसी हा।

⁸अतै तियां ही अहै तुन्दी लालसा करदै, ना सिर्फ प्रमात्मैं रा सुसमाचार बल्‍की अपणै-अपणै प्राण भी तूसु तांई दिणै जो तैयार थियै, ठेरैतांये कि तुसै इन्दै भी प्यारे भुच्‍ची गच्छुरै हिन।

⁹क्ओकि, हे विस्वासी भाईओ तुसै इन्दी मेहनत अतै कष्‍टा जो याद रखदै हिन कि अहै रात-दिन कम धन्‍धा करदै-करदै अहै तूसु मन्ज प्रमात्मैं रा सुसमाचार प्रचार करू कि असिओ तूसु थऊँ कुछ मंगणै री जरूरत ना पैय्आ।

¹⁰तुसै अपणै आप ही गवाह हिन अतै प्रमात्मां भी कि तूसु सबी विस्वासी भाई सोगी अहै किनी पवित्रता अतै धार्मिकता अतै निर्दोषता सितै रैह।

¹¹जिआं कि तुसै जाणदै हिन, कि जिआं पिता अपणै बच्चै सोगी वर्ताव करदा तियां ही अहै भी तूसु मन्ज हर अक्की जो भी उपदेश दिन्दै, प्रोत्साहित करदै अतै समझान्‍दै थियै,

¹²कि तून्दा चाल-चलन प्रमात्मैं रै मुताबक भोआ जैडा कि तूसु जो अपणै राज्य अतै महिमा मन्ज हैददा।

¹³ठेरैतांये अहै भी प्रमात्मैं रा धन्यवाद सदा करदै हिन कि जैहणै तुहै प्रमात्मैं रा सुसमाचार इन्दै द्धारा हुणु, ता तुहै तैतिओ मणु रा ना पर प्रमात्मैं रा बचन समझी करी ग्रहण करू। जैड़ा मसीह पुर विस्वास करदै हिन ऐह सुसमाचार प्रमात्मैं री तरफा थऊँ तून्दै अन्दर प्रभावशाली रूपा सोगी कम करू करदा हा।

¹⁴ठेरैतांये हे विस्वासी भाईओ तुसै प्रमात्मैं री तियां कलीसिया रै विस्वासी सांईं चाल चलना लगै जैड़ी कि यहूदिया परदेस मन्ज मसीह यीशु मन्ज हिन, क्ओकि तुसै भी अपणै मणु थऊँ तिनां ही दुख झेलू जिन्‍ना तियैं यहूदी थऊँ झेलूरा थू।

¹⁵जिन्यै यहूदी मणु प्रभु यीशु जो अतै भविष्‍यवक्ता जो भी मारी दिता अतै असु जो सताऊ, प्रमात्मां तियां मणु थऊँ खुश निआं अतै सो सब मणु रा विरोध करदै हिन।

¹⁶सो यहूदी मणु गैर यहूदी सितै तंयारै उद्धार री गल्ला करनै थऊँ असु जो रोकदै हिन, सो हमेशा पाप पुर पाप करदै रैहन्दै हिन, पर अबै तियां पुर प्रमात्मैं रा दण्ड पैणा पक्का हा।

¹⁷हे विस्वासी भाईओ, जैहणै अहै थोड़ी देरी तांई मनां थऊँ ना पर शरीरी तौर पुर तूसु थऊँ दूर भुच्‍ची गच्छुरै थियै ता अहै बड़ी लालसा सितै तूसु सोगी मिलणै री बड़ी कोशिश करी।

¹⁸ठेरैतांये मैंई कई बरी तूसु बलै ईणा चाऊ पर शैतानै मिन्जो तूसु बलै ईणै थऊँ रोकी रखू।

¹⁹भला इन्दी उम्मीद या खुशी या बड़ाई रा मुकुट कुण हा? इन्दै प्रभु यीशु रै सामणै तसेरै ईणै रै टैमैं तुसै ही सो बड़ाई रा मुकुट हिन।

²⁰इन्दी बड़ाई अतै खुशी तुसै ही हिन।