Read Gaddi 1 थिस्सलुनीकियों 3 Bible Online

1 थिस्सलुनीकियों 3 - Gaddi bible

1 थिस्सलुनीकियों 3

¹ठेरैतांये जैहणै असु थऊँ होर ना रैई भुआ ता अहै ऐ सोचु कि एथेन्स शहर मन्ज अकेलै ही रैहन।

²अतै अहै तीमुथियुस जो जैडा कि सुसमाचारा मन्ज इन्दा विस्वासी भाई अतै प्रमात्मैं रा सेवक हा तैस जो ठेरैतांये तूसु बलै भैजू कि सो तूसु जो विस्वास मन्ज पक्का करा अतै उत्साहित करा।

³कि कोई ईयां कलेशा थऊँ डगमगाई ना गच्छा क्ओकि तुसै अप्पू जाणदै हिन कि अहै ईयां दुखा जो सैहणै तांयै ही हैदुरै हिन।

⁴क्ओकि पैहलै भी जैहणै अहै तूसु बल्लै थियै ता तूसु सितै कणैदैं थियै कि असु जो कलेश झेलना पैणै हिन अतै ईयां ही भुआ अतै तुसै जाणदै भी हिन।

⁵ठेरी व्जहा थऊँ जैहणै मिन्जो थऊँ रैई ना भुआ ता तून्दै विस्‍वासा रा हाल जाणनै तांई तीमुथियुस जो भेज्‍जू कि करखी ऐसा नां भोआ कि शैतानै तुन्दी परीक्षा करूरी भोआ अतै इन्दी सेवा री मेहनत व्यर्थ भुच्‍ची गछूरी भोआ।

⁶पर अबै तीमुथियुस जैडा तूसु थऊँ मिलीकरी असु बल्लै आ तिनी तून्दै विस्‍वासा अतै प्यारा रा सुसमाचार हणाऊ अतै ऐसा गल्ला जो भी हणाऊ कि तुसै हमेशा प्यारा सितै असु जो याद करदै हिन। तिनी दस्सु कि तुहै असु सोगी मिलणै री लालसा रखदै हिन जिआं कि अहै भी तूसु सोगी मिलणा चाहन्दै हिन।

⁷ठेरैतांये हे विस्वासी भाईओ अहै अपणै दुखा अतै कलेशा मन्ज ऐह खबर हुणी कि तुहै विस्वास मन्ज पक्कै हिन ता असिओ हौंसला मुळु।

⁸क्ओकि अबै अगर तुसै प्रभु पुर पक्का विस्वास रखदै हिन्‍न ता असिओ जिणै री हिम्मत मुळदी हा।

⁹अबै अहै प्रमात्मैं रा धन्यवाद करी सकदै हिन तैस आनन्द तांयै जैड़ी तसेरी हजुरी मन्ज तुन्दी व्जहा थऊँ हा

¹⁰अहै रोज बड़ी ही प्रार्थना करदै हिन कि तूसु सोगी मिलन अतै तुसिओ विस्वास मन्ज होर मजबुत करन।

¹¹अबै इन्दी ऐह प्रार्थना हा कि इन्दा पिता प्रमात्मां अतै प्रभु यीशु तूसु बल्लै ईणै तांई इन्दी अगुवाई करा।

¹²अतै अहै प्रार्थना करदै हिन कि प्रभु यीशु मसीह असिओ अक्की दूये सोगी अतै होरी सोगी भी प्‍यार करनै मन्ज मदद करा, अतै प्‍यार तूसु सबी मणु मन्ज बददा अतै उन्‍नति करदा गच्छा।

¹³अहै प्रार्थना करदै हिन कि प्रभु यीशु मसीह तून्दै मनां जो इन्‍ना पक्का करा कि जैहणै सो दोबारा अपणै सबी पवित्र मणु सोगी अईआ ता अहै पिता प्रमात्मैं रै सामणै पवित्रता मन्ज निर्दोष ठहरी सकन।