Read Gaddi 1 थिस्सलुनीकियों 4 Bible Online

1 थिस्सलुनीकियों 4 - Gaddi bible

1 थिस्सलुनीकियों 4

¹मेरै विस्वासी भाईओ तूसु सितै ऐह बिनती हा अतै प्रभु यीशु मन्ज अहै तुसिओ ऐह समझान्‍दै हिन। जिआं तुसै असु थऊँ खरी चाल चलना अतै प्रमात्मैं जो खुश करना सिखुरै हिन अतै जिआं तुसै चलदै भी हिन तियां होर अगो बधदै गच्छा।

²क्ओकि तुसै जाणदै हिन कि अहै प्रभु यीशु रै अधिकार सोगी तुसिओ कुण-कुण आज्ञा पजाऊरी हिन।

³क्ओकि प्रमात्मैं री ईच्‍छा हा कि तुसै पवित्र बणन मतलब कि कुकर्म मत करा।

⁴अतै तूसु मन्ज हर अक्क मणु ऐह सिखा कि अपणै शरीर जो किआं काबू मन्ज रखणा, अतै किआं तैतिओ पवित्र अतै आदर योग्य बणाई रखणा।

⁵तुहै अपणी शरीरी इच्छा रा गुलाम मत बणा, जियां गैर यहूदी लगी रैहन्दै हिन जैड़ै कि प्रमात्मैं जो ना जाणदै।

⁶ऐसा गल्ला मन्ज कोई भी अपणै विस्वासी भाई रै विरूद्ध पाप ना करा अतै ना ही तसेरा कोई गलत फायदा उठा, क्ओकि प्रभु ईयां सबी गल्ला रा बदला लैणैं बाळा हा, जिआं कि अहै तूसु जो पैहलै ही बलुरा हा, अतै चौकन्‍ना भी करूरा हा।

⁷क्ओकि प्रमात्मैं असु जो अशुद्ध जिन्दगी जिणै तांयै ना पर पवित्र जिन्दगी जिणै तांयै हैदुरा हा।

⁸ठेरैतांये जैडा ईयां नियमा रै अनुसार जिणै थऊँ इनकार करदा हा सो मणु री शिक्षा जो ना पर प्रमात्मैं रा इनकार करदा हा, जैडा कि अपणा पवित्र आत्मा तूसु जो दिन्दा हा।

⁹पर होरी विस्वासी रै प्रति प्‍यार रै बारै मन्ज ऐह जरूरी निआं कि अऊँ तुसिओ कुछ लिखु क्ओकि अप्पू मन्ज प्‍यार रखणा तुसै अपणै आप ही प्रमात्मैं थऊँ सिखुरा हा।

¹⁰अतै सबी मकिदुनिया परदेस रै विस्वासी भाई सोगी ईयां प्‍यार करदै भी हिन, पर मेरै विस्वासी भाईओ अहै तूसु सोगी बिनती करदै हिन कि होर प्‍यार मन्ज मतै बधदै गच्छा।

¹¹जिआं कि अहै तुसिओ आज्ञा दितुरी हा कसी जो परेशान ना करना, कसी रै कमा मन्ज दखल ना दिणा अतै अपणै-अपणै हथा सितै कमाणै री कोशिश करा।

¹²कि अविस्वासी सोगी खरा वर्ताव करा अतै तुसिओ कसी थऊँ कुछ मँगणा ना पैय्आ।

¹³मेरै विस्वासी भाईओ अहै चाहन्दै हिन कि तुसै तियां विस्वासी मणु रै बारै मन्ज जाणन जैड़ै मरी गच्छुरै हिन, इआं ना भोआ कि तुसै होरी मणु सांई दुख मनान जिआं जो दोबारा जी उूठणै री उम्मीद ही निआं।

¹⁴क्ओकि अहै जाणदै हिन कि यीशु मरी करी जी उठुरा ता तियां ही प्रमात्मैं तियां जो भी जैड़ै यीशु मसीह पुर विस्वास करनै थऊँ बाद मरी गच्छुरै हिन सो भी यीशु बलै पुजाई दिणै हिन।

¹⁵क्ओकि अहै प्रभु यीशु रै बचना रै मुताबक तूसु सितै ऐह बल्‍दै हिन कि अहै जैड़ै कि प्रभु यीशु रै दोबारा ईणै तक जिन्दा हिन, ता मरुरै विस्वासी थऊँ पैहलै असु ना गाणा।

¹⁶क्ओकि प्रभु यीशु अपणै आप ही स्वर्गा थऊँ उतरना अतै तैस टैमैं ललकार अतै प्रधान दूता रा शब्द हुणीना अतै प्रमात्मैं री तुरही बजणी हा अतै जैड़ै मसीह मन्ज मरूरै हिन तियां सबी थऊँ पैहलै जी भूणा।

¹⁷फिरी अहै जैड़ै कि जिन्दा बची रैहणा तियां सोगी हवा मन्ज बदळा पुर चुक्की लैणैं हिन कि अम्बरा मन्ज प्रभु यीशु सितै मुळन अतै इन्‍नी साहबै असु तैस टैमां थऊँ सदा प्रभु सोगी रैहणा।

¹⁸ता ईयां गल्ला सितै अक्की दुऐ जो उत्साहित करू करा।