Read Gaddi 1 थिस्सलुनीकियों 5 Bible Online

1 थिस्सलुनीकियों 5 - Gaddi bible

1 थिस्सलुनीकियों 5

¹हे विस्वासी भाईओ, ठेरी जरूरत निय्आ कि यीशु मसीह रै दोबारा फिरी ईणै रै टैमं अतै मौकै रै बारै मन्ज तूसु तांयें कुछ लिखु।

²क्ओकि तुहै अप्पू ठीक ठीक जाणदै हिन जिंआं चोर राती अचानक इन्दा, तियां ही प्रभु यीशु अचानक ईणै बाळा हा।

³जैहणै मणु बलणा कि “सब ठीक ठाक हा, अतै कसी चिजा रा ड़र निय्आ,” ता तियां पुर अकदम विनाश ईच्ची पैणा, जैस तरीकै गर्भवती जो पीड़ा भुन्दी हिन अतै सो तैहा पिडा थऊँ करिये नह्ही ना सकदी; तैस तरीकै ही इन्या मणु भी कसी तरीकै ना बचणा।

⁴पर हे विस्वासी भाईओ, तुहै ता अन्धकार मन्ज ना हिन कि प्रभु यीशु रा आगमन तूसु पुर चोरा सांईयै अईआ।

⁵क्ओकि तुहै सब ज्योती री औलाद अतै दिना री औलाद हिन; अहै ना राती रै हिन, अतै ना ही अन्धकार रै हिन।

⁶ठेरैतांये अहै अविस्वासी सांईयै सुन्दै ना रैहन, पर जागदै अतै चौकनै रैहन।

⁷क्ओकि जैड़ै सुन्दै हिन सो राती ही सुन्दै हिन, अतै जैड़ै मतवाळै भुन्दै सो राती ही मतवाळै भुन्दै।

⁸पर अहै जैड़ै दिना रै हिन, विस्‍वासा अतै प्रेम रा कवच पैहनी करी अतै उद्धार री उम्मीद रा टोप लाई करी चौकनै रैहन अतै सुरक्षित रैहन।

⁹क्ओकि प्रमात्मैं असिओ अपणै क्रोध तांयें ना पर ठेरैतांये ठहराऊरा कि अहै अपणै प्रभु यीशु मसीह रै द्धारा उद्धार प्राप्त करन।

¹⁰यीशु मसीह ठेरैतांये मरू कि चाहे अहै जिन्दा रैहन या मरी गाहन जैहणै सो दोबारा अईआ अहै सब मिलीकरी तैस सोगी सदा तांयै जिन्दै भून।

¹¹ऐसा वजह थऊँ अक्की दूये जो उत्साहित करा अतै अक्की दूये री उन्‍नति रा कारण वणा, जिंआं कि तुहै करदै भी हिन।

¹²हे विस्वासी भाईओ, अहै तूसु सोगी बिनती करदै हिन कि जैड़ै प्रभु रै अगुवै तूसु मन्ज मेहनत करदै हिन अतै तुसिओ शिक्षा दिन्दै हिन, तंयारा आदर करा।

¹³सो जैड़ा ऐह कम तूसु तांयै करदै हिन ता तुहै तियां सोगी प्रेम सोगी रेय्आ अतै तंयारा आदर करा, अतै अप्पू मन्ज मेल-मिलाप सोगी रेय्आ।

¹⁴हे विस्वासी भाईओ अहै तूसु सोगी बिनती करदै हिन कि जैड़ै ठीक चाल ना चलदै तियां जो चेतावनी देय्आ, डरफ़ोक जो हिम्मत देय्आ, आत्मिक रूपा थऊँ कमजोरा जो सम्भाळा अतै सबी सोगी सब्र सोगी व्यवहार करा।

¹⁵पर चौकनै रेय्आ! कोई कसी सोगी बुराई रै बदलै बुराई ना करा; पर सदा भलाई करनै तांयें तैयार रेय्आ, अप्पू मन्ज अतै सबी सोगी भी भलाई ही करनै री कोशिश करा।

¹⁶सदा खुश रेय्आ।

¹⁷लगातार प्रार्थना करदै रेय्आ।

¹⁸हर हालत मन्ज धन्यवाद करा; क्ओकि तूसु तांयें मसीह यीशु मन्ज प्रमात्मैं री ऐह ही मर्जी हा।

¹⁹प्रमात्मैं री आत्मा जो अपणै मन्जै कम करनै थऊँ मत रोका।

²⁰जैड़ी भविष्‍यवाणी प्रमात्मैं मणु पुर प्रकट करूरी हिन तियां जो तुच्छ मत जाणा।

²¹सब गल्ला जो परखा कि सो प्रमात्मैं री तरफा थऊँ हिन कि ना अतै जैड़ी खरी हिन तियां रा पालन करा।

²²सबी तरह री बुराई थऊँ दूर रेय्आ।

²³शान्ती दिणैबाळा प्रमात्मां अप्पू ही तुसिओ पूरी रीति सितै पवित्र करना; अतै तुन्दी आत्मा, प्राण अतै शरीर इन्दै प्रभु यीशु मसीह दोबारा फिरी करी ईणै तक पूरै अतै निर्दोष सुरक्षित रैहन।

²⁴तून्दै हैदणै बाळै तुसिओ पवित्र भूणै तांयै हैदुरा अतै तैस तुसिओ पवित्र बणी रैहणै मन्ज मदद करना।

²⁵हे विस्वासी भाईओ, असु तांयें प्रार्थना करा।

²⁶सब विस्वासी भाई जो प्‍यार सोगी नमस्कार करा।

²⁷अऊँ तुसिओ प्रभु री सौगन्द दिन्दा कि ऐह चिट्ठी सब विस्वासी भाई जो पढ़ी करी हुणाया गच्छा।

²⁸इंदै प्रभु यीशु मसीह रा अनुग्रह तूसु पुर भुन्दा रेय्आ।