Read Gaddi 2 थिस्सलुनीकियों 3 Bible Online

2 थिस्सलुनीकियों 3 - Gaddi bible

2 थिस्सलुनीकियों 3

¹आखिर मन्ज मेरै विस्वासी भाईओ असु तांई प्रार्थना करू करा कि प्रभु रा बचन ईयां तोळा फैला अतै मणु तैत पुर विस्वास करन जिन्या तुहै विस्वास करू हा।

²प्रार्थना करा कि अहै टेढै अतै दुष्‍ट मणु थऊँ बची रैहन क्ओकि ऐह सच हा कि सबी विस्वास ना करना हा।

³पर प्रभु सचा हा तैस तुसिओ निश्‍चय सितै पक्का करना अतै शैतान थऊँ सम्भाळी करी रखणा।

⁴अतै असु जो प्रभु मन्ज तूसु पुर भरोसा हा कि जैड़ी-जैड़ी आज्ञा अहै तूसु जो दिन्दै हिन तियां जो तुसै मन्दै हिन अतै मन्दै भी रैहणा।

⁵अहै प्रार्थना करदै हिन कि प्रमात्मां तुन्दी अगुवाई करा कि तुहै प्रमात्मैं सांईयै प्रेम करनै बाळै अतै मसीह यीशु सांईयै धीरज रखणै बाळै भून।

⁶हे विस्वासी भाईओ अहै तूसु जो अपणै प्रभु यीशु मसीह रै नां सितै आज्ञा दिन्दै हिन कि तिन्या विस्वासी थऊँ दूर रेय्आ जैड़ै आलसी जिन्दगी जिन्दै हिन अतै इन्दी दितुरी शिक्षा रा पालन ना करदै हिन।

⁷तुहै जाणदै हिन कि तुसिओ इन्दी नकल करना जरूरी हा अहै आलसी ना थियै जैहणै अहै तूसु सोगी थियै।

⁸अतै कसी री रोटी मुफ्‍त ना खाई पर मेहनत अतै कष्‍टा सितै रात दिन कम धन्‍धा करदै थियै कि तूसु मन्ज कसी पुर भार ना बणन।

⁹असिओ ऐह अधिकार थू कि अहै कम ना करन पर अहै कम ठेरैतांये करू कि अहै तूसु तांयै अक्क उदाहरण बणन।

¹⁰अतै जैहणै अहै तूसु बलै थियै तांभी ऐह आज्ञा तूसु जो दिन्दै थियै कि “जे कोई खाण खाणा चाह ता सो कम करा।”

¹¹अहै हुणदै हिन कि कतूणै मणु हिन जैड़ै आलसी हिन अतै कोई कम ना करदै हिन पर होरी रै कमां मन्ज हथ पान्दै हिन।

¹²इन्‍नै जिन्‍नै जो अहै प्रभु यीशु मसीह मन्ज आज्ञा दिन्दै अतै समझान्‍दै हि चुप-चाप कम करीके अपणी रोटी खाऊ करै।

¹³अतै तुहै मेरै विस्वासी भाईओ भलाई करनै मन्ज हिम्मत मत छड़ा।

¹⁴अगर कोई इन्दी ऐसा पत्री मन्ज लिखुरै आदेश जो ना मनां ता तैस पुर नजर रखा अतै तसेरी संगति मत करा जैत थऊँ सो लज्जित भोआ।

¹⁵फिरी भी तैस जो दुश्‍मण मत समंझा पर विस्वासी भाई समझी करी चेतावनी देय्आ।

¹⁶अऊँ प्रार्थना करदा हा कि प्रभु जैडा शान्ती दिन्दा हा सो सदा तुसिओ शान्ती सोगी आशीष देय्आ, अतै प्रभु तूसु सबी सोगी रेय्आ।

¹⁷अऊँ पौलुस बड़ै बड़ै अक्षरा मन्ज तुसिओ अपणै हत्था सितै लिखुरा नमस्कार लिखदा! हरेक पत्री मन्ज ऐह मेरा चिन्ह हा अऊँ ऐस तरीकै ही लिखदा हा।

¹⁸अऊँ प्रार्थना करदा कि इन्दै प्रभु यीशु मसीह रा अनुग्रह तूसु पुर सदा भुन्दा रेय्आ।