Read Gaddi 1 तीमुथियुस 1 Bible Online

1 तीमुथियुस 1 - Gaddi bible

1 तीमुथियुस 1

¹ऐह पत्री पौलुस री तरफा थऊँ हा जैड़ा यीशु मसीह रा प्रेरित हा जैसिओ प्रमात्मैं इन्दै उद्धारकर्ता अतै यीशु मसीह रै द्धारा नियुक्त करू जैड़ा असिओ उम्मीद दिन्दा हा।

²अऊँ तीमुथियुस जो ऐह लिखु करदा जैडा विस्वास मन्ज मेरा सचा आत्मिक पुत्र हा, अऊँ प्रार्थना करदा कि पिता प्रमात्मां अतै इन्दै मसीह यीशु री तरफा थऊँ तिजो अनुग्रह, दया अतै शान्ती मुळदी रेय्आ।

³जिनी साहबै मैंई तिजो मकिदुनिया जो गान्हदै टैमैं समझऊ थू कि इफिसुस मन्ज रैई करी तिन्या झूठै शिक्षका जो आज्ञा दे कि सो झूठी शिक्षा दिणा बन्द करन।

⁴तुसिओ तिन्या जो चेतावनी दिणा हा कि सो झूठी कहाणी अतै लम्बी वंशावली पर अपणै टैमां जो बर्बाद ना करन। ऐसी गल्ला थऊँ सिर्फ विवाद भुन्दा हा अतै ऐत थऊँ प्रमात्मैं रै कम करनै मन्ज कसी जो कोई मदद ना मिलदी जैड़ा सिर्फ विस्वास रै द्धारा ही भूच्ची सकदा हा।

⁵कुल मलाई करी मेरी आज्ञा रा निचोड़ ऐह हा कि खरै मनां सितै अतै खरी विवेक सितै अतै निष्‍कपट विस्वास सितै प्रेम पैदा भोआ।

⁶झूठै शिक्षक इन्या खरी गल्ला करना छड़ी चुकुरै हिन अतै सिर्फ बेकार री गल्ला करदै हिन।

⁷झूठै शिक्षक तिन्या शास्त्री सांईयै बणना अतै सखाणा ता चाहन्दै हिन पर सो तिन्या गल्ला जो अप्पू ना समझदै हिन।

⁸अहै जाणदै हिन कि व्यवस्था सही हा अगर मणु ऐसा गल्ला जो सही तरीकै समझा कि प्रमात्मैं रा ठेरा दिणै रा मकसद कै थू।

⁹अहै जाणदै हिन कि व्यवस्था तिन्या मणु तांई निआं जैड़ै सही कम करदै हिन पर अधर्मी, निरकुशों, भक्‍तिहीनां, पापी, अपवित्र जो अशुद्ध, माँ-बुड़ै जो मारनै बाळै, हत्यारै।

¹⁰व्यभिचारी, पुरूषगामी, मणु जो बेचणै बाळै, झूठै अतै झूठी सौगन्द खाणैबाळै अतै इआं जो छड़ी करी खरै उपदेशा रै सबी विरोधी तांई ठहराऊरी हा।

¹¹ऐह सही शिक्षा सुसमाचार सोगी सहमत हा जैडा कि इन्दै परम-प्रधान प्रमात्मैं री महिमा रै बारै मन्ज हा जिनी मिन्जो सुसमाचार हुनाणै री जिम्मेवारी दितुरी हा।

¹²अऊँ अपणै प्रभु यीशु रा जिनी मिन्जो सामर्थ दितुरी हा धन्यवाद करदा कि तिनी मिन्जो पुर विस्वास रखू अतै अपणी सेवा तांई ठरऊ।

¹³अऊँ ता पैहलै निन्दा करनै बाळा अतै विस्वासी जो सताणै बाळा अतै निर्दयी व्यवहार करनै बाळा थू, फिरी भी मिन्जो पुर दया भूई क्ओकि मैंई अविस्वासा री दशा मन्ज बिना सोच-विचार ऐह कम करूरा थू।

¹⁴इन्दै प्रभु यीशु मसीह मिन्जो सोगी जठेरै अऊँ योग्य ना थू बिलकुल अप्पू सांईयै अनुग्रह सोगी व्यवहार करू अतै मेरी जिन्दगी जो विस्वास अतै प्रेम रै द्धारा बड़ी आशीष दिती।

¹⁵ऐह गप्‍प सच हा अतै हर किस्‍मां थऊँ मनणै रै योग्य हा कि मसीह यीशु पापी जो बचाणै तांई ऐस संसार मन्ज आ, जिआं मन्ज सबी थऊँ बड्‍डा पापी अऊँ हा।

¹⁶पर प्रमात्मैं मिन्जो पर ठेरैतांये दया करी कि यीशु मसीह मिन्जो अक्क ऐसा उदाहरण बणाई सकन कि किन्या तिनी धीरज सोगी सबी थऊँ मोट्टै पापी सोगी व्यवहार करू। ऐस तरीकै होर मणु भी ऐहा गल्ला जो समझी सकन अतै सो भी मसीह यीशु पुर विस्वास करीके अनन्त जिन्दगी जो पाई लैन।

¹⁷अबै सदा काल रा राजा मतलब कि अविनाशी अणहेरा एकमात्र प्रमात्मैं रा आदर अतै महिमा युगा-युग तिकर भुन्दी रेय्आ। आमीन।

¹⁸हे पुत्र तीमुथियुस, तियां भविष्‍यवाणी रै मुताबक जैड़ी कि पैहलै तेरै बारै मन्ज करूरी थी, अऊँ ऐह बलदा कि जैड़ी आज्ञा मैंई तिजो दितुरी हिन तिन्या जो झूठै शिक्षका रै विरोध मन्ज खरी लड़ाई लड़नै तांयै हथियार सांईयै इस्तेमाल कर।

¹⁹यीशु मसीह मन्ज अपणै विस्वास जो बणाई रख अतै विवेक जो शुद्ध रख कुछ मणुऐ अपणै विवेक रै विरोध मन्ज जाणी बूझी करी कम करू जठेरी वजह थऊँ तंयारा विस्वास टूटी गो।

²⁰मैंई दूँ मणु हुमिनयुस अतै सिकन्दर जो कलीसिया थऊँ बाहर नकाळी दिता अतै तिन्या जो शैतान रै हत्थै सौंपी दिता ताकि सो सिखन कि प्रमात्मैं री निन्दा ना करनी हा।