Read Gaddi 1 तीमुथियुस 3 Bible Online

1 तीमुथियुस 3 - Gaddi bible

1 तीमुथियुस 3

¹ऐह गल्ल सच हा कि जैडा कोई अध्यक्ष बणना चाहन्दा हा, ता सो आदर योग्य कमा री ईच्‍छा करदा।

²ता जरूरी हा कि अध्यक्ष निर्दोष भोआ सो अक्की ही घरावाळी रा घरावाळा, संयमी, सुशील, सभ्‍य, मेहमान नमाजी करनै बाळा अतै सखाणै मन्ज लाईक भोआ,

³पियक्कड़ या मार-कुटाई करनै बाळै ना भोआ बल्कि नर्म दिल अतै झगड़ालू ना भोआ अतै ना ही लोभी भोआ।

⁴सो अपणै परिवार री सही अगुवाई अतै बन्‍दोबस्त करनै बाळा भोआ अतै सो अपणै बाल-बच्चै जो सखांदा भोआ कि सो आदर सोगी तसेरी आज्ञा रा पालन करन।

⁵अगर कोई अपणै परिवार री ही देखभाल सही तरीकै करना ना जाणदा ता सो प्रमात्मैं री कलीसिया री रखवाली किआं करी सकदा हा?

⁶सो अक्क नौआ ना पर पक्का समझदार विस्वासी भोआ, करखी इआं ना भोआ कि सो घमण्‍ड़ी भुच्‍ची करी शैतान सांईयै सज्जा पा।

⁷अतै बाहर मणु मन्ज भी तसेरा खरा नां भोआ ईयां ना भोआ कि बेईज्‍जत भुच्‍ची करी शैतान रै जाळा मन्ज फसी गच्छा।

⁸तियां ही सेवका जो भी आदर योग्य भूणा चहिन्दा सो दोरंगै, पियक्कड़, अतै नीच कमाई रै लोभी ना भून।

⁹तन्यारा विवेक शुद्ध भूणा चहिन्दा अतै जैड़ा प्रमात्मैं विस्वास रै बारै मन्ज असिओ प्रकट करूरा हा तैत मन्ज सो मजबुती सोगी बणी रैहन।

¹⁰तिन्या जो सेवक नियुक्त करनै थऊँ पैहलै तंयारी खरी के परख करना चहिन्दी। अगर सो ऐस परख मन्ज खरै निकळण ता सो सेवक बणी सकदै हिन।

¹¹इन्‍नी साहबै जनानी जो भी आदर योग्य भूणा चहिन्दा, सो दोष लाणै बाळी ना भून पर संयमी अतै सबी गल्ला मन्ज विस्‍वासा योग्य भून।

¹²सेवक अक्की घरावाळी रै ही घरवाळै भून अतै बाल बच्चै अतै अपणै परिवार रा खरा प्रबन्ध करना जाणदै भून।

¹³क्ओकि जैड़ै सेवक रा कम खरा करी सकदै हिन सो अपणै तांयै मणु थऊँ आदर पाई सकदै हिन। सो हिम्मत सोगी होरी मणु जो यीशु मसीह पुर अपणै विस्वास रै बारै मन्ज दसी सकदै हिन।

¹⁴अऊँ तिजो बल्लै ईणै री तोळी उम्मीद रखदा पर फिरी भी ऐह गल्ला तिजो ठेरैतांये लिखदा हा,

¹⁵कि मेरै ईणै मन्ज देर भूई ता तू जाणी लै कि प्रमात्मैं रै परिवार रा सदस्य भूणै रै नातै किन्या जिन्दगी जिणी हा। आखिरकार जिन्दै प्रमात्मैं री कलीसिया सच्चाई री मजबुत नींव हा।

¹⁶अतै ऐत मन्ज कोई शक निआं कि जैड़ी शिक्षा प्रमात्मैं प्रकट करूरी हिन सो सच्ची हिन मतलब कि, मसीह मणु रै रूपा मन्ज प्रकट भुआ, पवित्र आत्मा रै द्धारा सावित भुआ कि सो प्रमात्मैं रा पुत्र हा, स्वर्गदूतै तैसिओ हेरू, गैर यहूदी मन्ज तसेरा प्रचार भुआ, संसार रै मणुऐ तैस पुर विस्वास करू अतै प्रमात्मैं तैसिओ स्वर्गा मन्ज ऊपरा जो चुकी लैऊ।