Read Gaddi 1 तीमुथियुस 4 Bible Online

1 तीमुथियुस 4 - Gaddi bible

1 तीमुथियुस 4

¹अबै पवित्र आत्मा साफ तरीकै बल्‍दा कि अन्त रै दिना मन्ज कुछ मणु सच्चै विस्वास थऊँ दूर भटकी गाणा; तिन्या भरमाणै बाळी आत्मा अतै दुष्‍टात्मा री शिक्षा पिचो चलना हा।

²ऐह झूठै शिक्षक धोखा दिणैबाळै मणु हिन अतै तंयारा विवेक मरूरा हा सो ना जाणी पान्दै कि सो जैड़ा करू करदै हिन कि सही हा या गलत मना जिन्या कि अक्क ततै-ततै लोहे सितै दागुरा भोआ।

³ऐस तरह रै मणु ऐह सखान्दै हिन कि बैह करना गलत हा अतै कुछ तरह रा खाणा खाणा भी गलत हा, पर प्रमात्मैं खाणै जो सब चिजा बणाऊरी हिन जैतिओ विस्वासी जैड़ै सच्चाई जो जाणी चुकुरै हिन धन्यवाद री प्रार्थना करीके खाई सकदै हिन।

⁴प्रमात्मैं री रचुरी हर अक्क चिज खरी हा अतै कोई भी चिज नकारनैं तांई निआं, पर ऐह कि धन्यवाद करीके खाई गच्छा,

⁵क्ओकि ऐह सब चिजा प्रमात्मैं रै बचना अतै प्रार्थना सितै शुद्व भुच्‍ची गाहन्दी हा।

⁶अगर तू विस्वासी भाई जो इआं शिक्षा री याद दोआन्‍दा रेय्आ ता तुद मसीह यीशु रा खरा सेवक ठहरना। जिन्या तू इन्या विस्वास रै बचना अतै सही शिक्षा रै द्धारा चलदा हा, तू अपणै आपा रा आत्मिक पालन पोषण करदा हा।

⁷टैमां जो बर्बाद मत करा इन्या बेकार विचार अतै बर्जुगा री कहाणी पुर विवाद करीके; पर अपणै आपा जो भक्ति साधना तांयै तैयार करा।

⁸शरीर री कसरत सितै कुछ फाईदा ता हा पर भक्ति साधना सबी गल्ला तांई फायदैमन्‍द हा क्ओकि ऐह ऐस टैमां री अतै ईणैबाळै जिन्दगी रा भी वायदा करदा हा।

⁹ऐह गप्‍प सच हा अतै हर किस्‍मां थऊँ मनणै रै योग्य हा।

¹⁰अहै मेहनत अतै यत्न ऐत तांई ही करदै हिन कि इन्दी उम्मीद तैस जिन्दै प्रमात्मैं पुर हा जैडा सबी मणु रा अतै खास करी विस्वासी रा उद्धारकर्ता हा।

¹¹इआं गल्ला री आज्ञा दिकरी विस्वासी जो सखान्‍दा रैह कि इन्या गल्ला रा पालन करना जरूरी हा।

¹²तेरा व्यवहार ऐस तरीकै रा भोआ कि कोई तेरा निरादर ना करना पा क्ओकि तू जवान हा। तिजो अपणै बचना रै द्धारा, चाल चलन रै द्धारा, प्रेम रै द्धारा, विस्वास रै द्धारा अतै पवित्रता रै द्धारा विस्वासी तांयै अक्क आदर्श बनणा हा कि सो तिजो सांईयै चाल चलन रखन।

¹³जैहणै तिकर अऊँ ना ईच्छुं तैहणै तिकर पवित्रग्रन्थ पढ़नै अतै उपदेश अतै सखाणै मन्ज मन लाई करी लगी रैह।

¹⁴तैस आत्मिक वरदान जो मत भूलदा जैड़ा तिजो मन्ज हा अतै जैड़ा तिजो तैहणै मुळु थू जैहणै भविष्‍यवक्तै भविष्‍यवाणी करी अतै स्याणै विस्वासी तिजो पुर हथ रखै थियै।

¹⁵इन्या गल्ला जो सोचदा रैह अतै इआं मन्ज अपणा धैन लगाई रख ताकि सब मणु विस्वास मन्ज तेरी तरक्की हेरी सकन।

¹⁶चौकस रैंह कि तू कस तरीकै री जिन्दगी जिन्दा हा अतै किन्या गल्ला जो सखान्‍दा हा। इन्या कमा जो करदा रैह ताकि तू अपणै आपा रा अतै हुणनैबाळै रा उद्धार रा कारण भोआ।