Read Gaddi 1 तीमुथियुस 6 Bible Online

1 तीमुथियुस 6 - Gaddi bible

1 तीमुथियुस 6

¹जैतूणै भी विस्वासी गुलाम हिन सो अपणै अपणै मालका रा हर तरीकै आदर करन ताकि प्रमात्मैं रै नां रा अतै उपदेश री निन्दा ना भोआ।

²अगर कसी गुलाम रा मालक विस्वासी हिन ता सो गुलाम अपणै मालका रा आदर करा। मालक भी मसीह रा विस्वासी हा ठेरैतांये गुलाम तैसिओ मसीह मन्ज भाई समझी करी प्रेम करा अतै जैतना भूच्ची सका तसेरी सेवा अतै मदद करा। इन्या गल्ला रा उपदेश दिच्छु कर अतै समझांदा रैह।

³अगर कोई गलत शिक्षा दिन्दा हा अतै तैहा सही शिक्षा सोगी सहमत निय्आ जैड़ी प्रभु यीशु मसीह असिओ दितुरी हा सो सही शिक्षा ही असिओ भक्ति री जिन्दगी बीताणै मन्ज मदद करदा हा।

⁴ता सो मणु घमण्‍ड़ी भुच्‍ची गच्छुरै अतै कुछ ना जाणदै। तिन्या जो वाद-विवाद अतै शब्दा पुर तर्क करनै रा रोग लगी गछूरा हा जैत थऊँ डींग, झगड़ै, निन्दा री गल्ला अतै बुरै-बुरै सन्‍देह,

⁵अतै तियां मणु मन्ज व्यर्थ रगडे-झगड़ै पैदा भुन्दै हिन, जिआंरी अक्ल खराब भुच्‍ची गछूरी हा अतै सच्चाई थऊँ दूर भुच्‍ची गच्छुरै हिन, सो समझदै हिन कि भक्ति कमाई रा साधन हा।

⁶पर असु तांयै ऐह खरा हा कि अहै तिन्या कमा जो करन जैत सोगी प्रमात्मां खुश भुन्दा हा अतै तैत थऊँ सन्तुष्‍ट रैहन जैड़ा कुछ प्रमात्मां असिओ दिन्दा हा।

⁷क्ओकि ना ता अहै ऐस संसारा मन्ज कुछ लेई करी छूरै हिन अतै ना ता कुछ लेई करी गिची सकदै हिन।

⁸अतै अगर असु बल्लै खाणै अतै लाणै जो हा ता ऐत पुर ही सन्तुष्‍ट रैहणा चहिन्दा।

⁹पर जैड़ै धनी भूणा चाहन्दै हिन, सो ऐसी परीक्षा अतै जाळा अतै मतै सारै व्यर्थ अतै नूकसान दायक लालच मन्ज फसदै हिन जैड़ी मणु जो बगाड़ी दिन्दी हिन अतै विनाश रै समुंद्र मन्ज डुबाई दिन्दै हिन।

¹⁰क्ओकि पैसै रा लालच सबी किस्‍मां री बुराई री जड़ हा जैतिओ हासल करनै री कोशिश करदै-करदै कतूणैं विस्वासी अपणै रस्तै थऊँ भटकी करी अपणै आपा जो कैईआ किस्‍मां रै दुखा सितै नूकसान पजाऊरा हा।

¹¹पर तीमुथियुस तू प्रमात्मैं रा भक्त हा अतै ईनी जिनी गल्ला थऊँ तू दूर भो अतै पवित्र, भक्ति, विस्वास, प्‍यार, धीरज अतै नम्रता रा पिछा कर।

¹²लड़ाई मन्ज अक्क खरै सैनिक सांईयै जैड़ा लगातार लड़दा रैहन्दा अतै हार ना मन्दा हा; तिन्या ही तू भी लगातार प्रमात्मैं पुर भरोसा करदा अतै आज्ञा जो मन्दा रैह। तैस अनन्त जिन्दगी जो पाई लै जैत तांयै तू हैदुरा हा, अतै मतै मणु सामणै तैंई ऐह बलुरा हा कि तू मसीह पुर भरोसा करदा हा।

¹³अऊँ तिजो प्रमात्मैं सामणै जैडा कि सबी जो जिन्दगी दिन्दा हा अतै यीशु मसीह जिनी पुन्‍तियुस पिलातुस रै सामणै खरी गवाही दिती तसेरै सामणै ऐह आदेश दिन्दा हा,

¹⁴कि तू ऐसा आज्ञा रा पालन करैं। फिरी कोई तिजो पुर अबै थऊँ लेई करी प्रभु यीशु मसीह रै दोबारा ईणै तक दोष ना लाई सकदा।

¹⁵क्ओकि ठीक टैमां पुर यीशु मसीह जो स्वर्गा थऊँ प्रकट करया गाणा तैस धन्य अतै इकलोतै सर्वशक्तिमान प्रमात्मैं रै द्धारा जैड़ा राजै रा राजा अतै प्रभु रा प्रभु हा।

¹⁶सो अकेला ही ऐसा हा जैड़ा कदी ना मरी सकदा अतै सो ऐसी तेज ज्योती मन्ज रैहन्दा हा कि कोई मणु तैस बलै ना गिच्ची सकदा। कुणी भी मणुऐ तैसिओ ना हेरूरा अतै ना ही कदी हेरी पाणा, सदा तसेरी महिमा अतै आदर भुन्दा रेय्आ। आमीन।

¹⁷ऐस संसारा रै अमीर मणु जो आज्ञा दे कि सो घमण्‍ड़ी ना भून अतै चंचल धन पुर उम्मीद ना रखन, पर प्रमात्मैं पुर उम्मीद रखन जैडा कि इन्दै सुखा तांई सब कुछ मता सारा दिन्दा हा।

¹⁸तिन्या जो आज्ञा देय्आ कि सो अपणै पैसै रा इस्तेमाल भलाई करनै तांयै करन। सो भलै कमां मन्ज धनी बणन अतै जरूरत मन्दा री उदारता सोगी मदद करन अतै सदा होरी सोगी बड़णै जो तैयार रैहन।

¹⁹ईयां करनै सितै सो अपणै खजानै जो भविष्‍य तांयै निऊँ रै रूपा मन्ज पाणा लगुरै ताकि सो सची जिन्दगी जो अच्छै तरीकै अनुभव करी सकन।

²⁰हे तीमुथियुस तैहा सच्चाई री रखबाळी कर जैड़ी प्रमात्मैं तिजो दितुरी हा। तू तिन्या थऊँ दूर रैह जैड़ै अपणै झूठै ज्ञान, अभक्‍ति, मूर्खता अतै बाद-विवाद सितै तून्दा विरोध करदै हिन।

²¹कुछ मणु ऐस झूठै ज्ञाना रा अंगीकार करीके विस्वास थऊँ भटकी गच्छुरै हिन। तूसु सबी पुर प्रमात्मैं रा अनुग्रह भुन्दा रेय्आ।