Read Gaddi 2 तीमुथियुस 1 Bible Online

2 तीमुथियुस 1 - Gaddi bible

2 तीमुथियुस 1

¹ऐह पत्री पौलुस री तरफा थऊँ हा जैड़ा प्रमात्मैं री इच्छा रै अनुसार यीशु मसीह रा प्रेरित भूणै तांयै चुणया गो। मिन्जो कई जगह भैजु ताकि तैसा अनन्त जिन्दगी रै बारै मन्ज होरी जो दसु जैड़ा तिनी यीशु मसीह मन्ज विस्वास रै द्धारा वायदा करूरा हा।

²अऊँ तीमुथियुस जो ऐह लिखु करदा जैडा विस्वास मन्ज मेरा सचा आत्मिक पुत्र हा, अऊँ प्रार्थना करदा कि पिता प्रमात्मां अतै इन्दै मसीह यीशु री तरफा थऊँ तिजो अनुग्रह, दया अतै शान्ती मुळदी रेय्आ।

³तीमुथियुस अऊँ तेरै तांयै प्रमात्मैं रा धन्यवाद करदा हा, जैस प्रमात्मैं री अऊँ शुद्ध विवेक सोगी सेवा करदा हा जिन्या मेरै स्याणै करदै थियै। दिन रात अऊँ लगातार अपणी प्रार्थना मन्ज तिजो याद करदा रैहन्दा हा।

⁴तिजो सोगी दोबारा मिलणै री मेरी बड़ी इच्छा हा, क्ओकि अऊँ तेरै तैस टैमैं रूणै जो याद करदा जैहणै अहै अलग भुएै थियै। जैहणै असु दोबारा मिलणा असु खुशी सितै भरी गाणा।

⁵मिन्जो तैस निष्‍कपट विस्‍वासा री याद इन्दी हा जैडा तेरी ननी लोइस अतै तेरी माँ यूनीके मन्ज थू अतै मिन्जो ऐसा गल्ला रा पक्का पता हा कि तिजो मन्ज भी सो ही विस्वास हा।

⁶ठेरैतांये अऊँ तिजो याद दोआन्‍दा कि तू प्रमात्मैं रै तैस वरदान रा पुरा इस्तेमाल कर जैड़ा प्रमात्मैं तिजो दितुरा थू, जैहणै मैंई अपणा हत्थ तिजो पुर रखू थू।

⁷क्ओकि प्रमात्मैं असिओ डरपोक ना बणाऊरा पर तसेरा पवित्र आत्मा इन्दै दिला जो ताकत दिन्दा हा; होरी जो प्रेम करनै तांयै मदद करदा हा अतै असिओ संयम भी दिन्दा हा।

⁸इन्दै प्रभु री गवाई दिणै थऊँ लज्जित मत भुन्दै अतै मेरै बारै मन्ज भी लज्जित मत भुन्दै क्ओकि अऊँ सेवा करनै री वजह थऊँ कैद मन्ज हा। तैस सामर्थ रा इस्तेमाल करा जैड़ा प्रमात्मैं थऊँ इन्दा हा अतै सुसमाचार जो हुणादै टैमैं दुखा जो झेलनै तांयै मिन्जो सोगी सहभागी भोआ।

⁹प्रमात्मैं इन्दा उद्धार करूरा हा अतै अक्क पवित्र जिन्दगी जिणै तांयै असिओ हैदुरा हा। प्रमात्मैं ऐह ठेरैतांये ना करू कि अहै ठेरै काबल थियै पर ऐह तसेरी संसार रै पैहलै थऊँ ही ऐह योजना थी कि सो असिओ मसीह यीशु रै द्धारा अपणै अनुग्रह जो दसा।

¹⁰पर अबै इन्दै उद्धारकर्ता यीशु मसीह प्रकट भूच्ची गो हा अतै तिनी अपणै अनुग्रह जो दसु हा। तिनी मौत री शक्ति जो हराई करी सुसमाचार रै द्धारा ऐह दसु कि तसेरै द्धारा अनन्त जिन्दगी तांयै रस्ता हा।

¹¹ऐस सुसमाचार तांयै ही प्रमात्मैं मिन्जो प्रचारक, प्रेरित अतै उपदेशक चुणुरा हा।

¹²ठेरैतांये अऊँ जेला मन्ज दुखा जो सहू करदा हा, अऊँ ऐहा गल्ला थऊँ ना शर्मान्दा क्ओकि अऊँ तैस यीशु मसीह जो जैस पुर मैंई विस्वास करूरा जाणदा। मिन्जो पक्का पता हा कि यीशु मसीह तसेरी रक्षा करनी हा जैड़ा मैंई तैसिओ सौंपुरा हा तसेरै दोबारा ईणै रै दिन तक।

¹³जैड़ी खरी शिक्षा तैंई मिन्जो थऊँ हुणुरी हिन तियां जो तैस विस्‍वासा अतै प्यारा सितै यीशु मसीह मन्ज अपणा आदर्श बणाई करी रख।

¹⁴पवित्र आत्मा री व्जहा थऊँ जैडा कि असु मन्ज बसुरा ऐस किमती सच्चाई री रखवाली कर।

¹⁵तू जाणदा कि आसिया परदेस रै कई विस्वासी मिन्जो छडी दितुरा हा जिआं मन्ज फूगिलुस अतै हिरमुगिनेस भाई भी हिन।

¹⁶उनेसिफुरूस रै घरानै पुर प्रभु दया करा क्ओकि तिनी मती बरी मिन्जो सोगी मिलीकरी मिन्जो उत्साहित करू अतै सो ऐसा गल्ला थऊँ भी लज्जित ना थू कि अऊँ कैद मन्ज हा।

¹⁷पर जैहणै सो रोम शहर मन्ज आ ता बड़ा ज‍तन करीके मिंजो सितै मुळु।

¹⁸अऊँ प्रार्थना करदा कि प्रभु यीशु प्रमात्मैं सोगी बिनती करा कि सो न्याय बाळै दिन उनेसिफुरूस पुर दया करै। तुहै जाणदै हिन कि तिनी मेरी इफिसुस शहर मन्ज कैतनी मदद करूरी हा।