Read Gaddi 2 तीमुथियुस 2 Bible Online

2 तीमुथियुस 2 - Gaddi bible

2 तीमुथियुस 2

¹तीमुथियुस विस्वास मन्ज मेरै सचै आत्मिक पुत्र; जैड़ा प्रमात्मां तिजो मसीह यीशु द्धारा अनुग्रह दिन्दा तू तैस मन्ज मजबुती सोगी बणी रैह।

²तुहै मिन्जो कई बरी मतै मणु सामणै मसीह रा संदेश सखान्दै हुणुरा हा अबै अऊँ चाहन्दा कि तू इन्या गल्ला जो होरी विस्वासी जो सखा जैड़ै भरोसै रै योग्य हिन ताकि सो होरी जो भी सखान।

³मसीह यीशु रै खरै योद्धा सांईं मिन्जो सोगी दुख झेल।

⁴जैहणै कोई योद्धा लड़ाई लड़ना गाहन्‍दा ता सो अपणै भर्ती करनै बाळै जो खुश करना चाहन्दा हा ठेरैतांये सो अपणै आपा जो संसारा रै कमां मन्ज ना फसान्दा।

⁵अगर कोई मणु कसी भी खेल मन्ज भाग लैन्दा हा सो तैहणै तक इनाम ना जीती सकदा जैहणै तक सो नियम रा सही पालन ना करदा।

⁶जैड़ै किसान मेहनत करदै हिन तंयारा ही पैहला हक्क बणदा हा कि सो अपणी फसल री उपज जो सबी थऊँ पैहलै खान।

⁷जिन्या उदाहरण जो मैंई सखाऊ हा तंयारै बारै मन्ज ध्याना सोगी सोचा अतै प्रभु मदद करनी हा कि तुहै इन्या गल्ला जो सही तरीकै समझी सकन।

⁸यीशु मसीह जो याद करा कि सो कुण हा, सो राजा दाऊद रै वंशा थऊँ थू। प्रमात्मैं तैसिओ मरूरै थऊँ जिलाऊ अतै ऐह ही सो सुसमाचार हा जठेरा अऊँ प्रचार करदा हा।

⁹अऊँ सुसमाचार रा प्रचार करदा ठेरैतांये अऊँ अपराधी सांईयै दुख झेलू करदा हा। ऐठी तक कि अऊँ कैदी भी हा पर कोई भी प्रमात्मैं रा सुसमाचार जो फैलणै थऊँ रोकी ना सकदा।

¹⁰ठेरैतांये अऊँ चुणुरै मणु तांई सब कुछ सहन करदा ताकि सो भी मसीह यीशु पुर विस्वास करीके उद्धार पान अतै सो तैहा अनन्त महिमा जो पाई सकन जैड़ी सदा काल तक हा।

¹¹ऐह गप्‍प सच हा, कि अगर अहै मसीह सोगी मरी गान्दै हिन ता तैस सोगी जीणा भी हा।

¹²अगर अहै तैस तांयै धीरज सोगी दुख सैहन्दै रैहन ता तैस सोगी राज्य भी करना अगर अहै तसेरा इन्कार करलै ता तैस भी इन्दा इन्कार करना।

¹³अगर अहै मसीह रै प्रति विस्वासयोग्य ना भोलै तांभी सो असु तांयै विस्वासयोग्य बणी रहन्‍दा क्ओकि तैस तांयै जरूरी हा कि सो अपणै स्वभाव रै अनुसार कम करा।

¹⁴कसी जो भी इन्या गल्ला जो भूलनै तांयै मौका मत दिन्दै। प्रमात्मैं जो अपणा गवाह मनी करी तिन्या जो चेतावनी दिन्यै कि सो शब्दा पुर तर्क-वितर्क ना करन, जैत थऊँ कोई फाईदा ना भुन्दा बल्कि हुणनैबाळै बिगड़ी गान्हदै हिन।

¹⁵कठण मेहनत करा कि तुहै अपणै आपा जो प्रमात्मैं सामणै हाजिर करी सकन अतै तसेरै ग्रहण योग्य भूच्ची सकन। इन्‍नै खरै कम करनैवाळा बणनै री कोशिश करा जैसिओ लज्जित भूणै री जरूरत ना पैय्आ, अतै सो सच्चाई रै बचन रा अर्थ ठीक रीति सितै दसदा भोआ।

¹⁶पर अशुद्ध वाद-विवाद थऊँ बची रैह क्ओकि इन्‍नै जिन्‍नै मणु होर भी अभक्‍ति मन्ज बददै गान्हदै हिन।

¹⁷हुमिनयुस अतै फिलेतुस ऐसै उदाहरण हिन कि इन्या सांईयै मणु री झूठी शिक्षा तेजी सोगी फैलदी गान्दी हा अतै मणु रै विस्वास जो कमजोर करदी हा, अक्क खुलै हडुरै फौड़ै सांईयै जैड़ा तेजी सोगी फैलदा हा।

¹⁸ऐसै मणु सच्चाई रै रस्तै जो छड़ी दितुरा हा अतै ऐह बलदै हिन कि मरूरै रा दोबारा जीणा भुच्‍ची गछूरा हा अतै ऐस तरीकै कुछ मणु जो विस्वास थऊँ दूर भटकाई दिन्दै हिन।

¹⁹फिरी भी प्रमात्मैं री सच्चाई अक्क निऊँ सांईयै पक्की बणी रैहन्‍दी हा जैस पुर ऐह लिखुरा, “प्रमात्मां जाणदा हा कुण तसेरा अपणा हा” अतै “जैड़ै प्रमात्मैं रै हिन तिन्या जो बुराई थऊँ मुड़ी गाणा जरूरी हा।”

²⁰बड़ै-बड़ै घरा मन्ज ना सोनै-चान्दी रै बल्कि लकड़ी अतै चिक्का रै भाण्ड़ै भी भुन्दै हिन, सोनै-चान्दी रै भाण्ड़ै खास मौके तांयै अतै बाकी भाण्ड़ै हर रोज तांयै इस्तेमाल भुन्दै हिन। सोनै-चान्दी रै भाण्ड़ै सच्चै विस्वासी सांईयै हिन अतै बाकी भाण्ड़ै झूठै शिक्षक जो दर्शान्दै हिन।

²¹ऐस तरीकै ही हरेक विस्वासी जैड़ा अपणै आपा जो इन्या बुरी चिजा थऊँ दूर करला ता सो तैस किमती भाण्ड़ै सांईयै भूणा जैड़ा खास मौके पुर इस्तेमाल भुन्दा हा। जसेरी जिन्दगी पवित्र भुणीआ तैस मालका रै कमै ईणा।

²²जवानी री अभिलाषा थऊँ दूर रैह अतै जैड़ै शुद्व मनां सितै प्रभु रा नां लैन्दै हिन तियां सोगी पवित्रता, विस्वास, प्रेम अतै मेल-मिलाप सितै पिछा कर।

²³पर मूर्खता अतै बेकार विवादा थऊँ दूर रैह क्ओकि तू जाणदा कि इआं थऊँ झगड़ै पैदा भुन्दै हिन।

²⁴अतै प्रभु रै दासा जो झगड़ालू ना भूणा चहिन्दा पर सबी सोगी नर्म अतै बचन री शिक्षा दिणै मन्ज निपुण अतै सहनशील भोआ।

²⁵सो सच्चाई रै विरोधी जो नर्म भूच्ची करी समंझा, भूच्ची सकदा हा कि प्रमात्मां तंयारै मना जो बदला अतै सो सच्चाई जो जाणी लैन।

²⁶तां तंयारै दमाग सही तरीकै कम करना अतै तिन्या शैतान रै जाल थऊँ बच्ची गाणा, क्ओकि शैतानै तिन्या जो अपणा बन्दी बणाई करी रखूरा हा ताकि सो जैड़ा चाह सो तिन्या थऊँ करवाई सका।