Read Gaddi तीतुस 1 Bible Online

तीतुस 1 - Gaddi bible

तीतुस 1

¹ऐह पत्री पौलुस री तरफा थऊँ तीतुस जो हा जैड़ा प्रमात्मैं रा दास अतै यीशु मसीह रा चुणुरा प्रेरित हा। प्रमात्मैं अपणै चुणुरै मणु मन्ज विस्वास रा प्रचार करनै तांयै मिन्जो चुणु अतै भैजु कि अऊँ तिन्या जो सखाऊ अतै सो जाणी सकन कि किन्या धर्मी जिन्दगी जीणा चहिन्दी हा।

²ठेरा परिणाम ऐह भूणा कि तिन्या जो अनन्त जिन्दगी री उम्मीद मिलनी हा जठेरा प्रमात्मैं आदि काल थऊँ वायदा करूरा थू अतै प्रमात्मां कदी झूठ ना बलदा।

³अबै ठीक टैमां पुर प्रमात्मैं ऐस सुसमाचार जो असु पुर प्रकट करूरा अतै अहै ठेरा प्रचार सबी जो करदै हिन। प्रमात्मां इन्दै उद्धारकर्ता मिन्जो ऐह जिम्मेवारी अतै आज्ञा दितुरी हा कि ऐह कम अऊँ तैस तांयै करू।

⁴तीतुस इन्दै विस्वास री वजह थऊँ तू मिन्जो तांयै अक्क पुत्रा सांईयै हा, अऊँ प्रार्थना करदा कि इन्दा पिता प्रमात्मां अतै उद्धारकर्ता यीशु मसीह तूसु पुर कृपा करा अतै तुसिओ शान्ती दिन्दा रेय्आ।

⁵अऊँ तिजो ठेरैतांये क्रेते टापू मन्ज छड़ी छूरा थू कि तू इन्दै बाकी बचुरै कमा जो पुरा करी सका अतै मेरी आज्ञा रै मुताबक जगह-जगह विस्‍वासा मन्ज स्याणै मणु जो नियुक्त कर।

⁶अक्क स्याणै विस्वासी जो निर्दोष जिन्दगी बिताणा चहिन्दी हा। सो अपणी घरावाळी रै प्रति बफादार भोआ, तसेरै बाल-बच्चै सुनाम अतै ऐसै विस्वासी भून कि सो आदर सोगी तसेरी आज्ञा रा पालन करदै भून।

⁷स्याणै विस्वासी प्रमात्मैं रै घरानै रा भण्डारी भूणै रै नातै सो निर्दोष भूणा चहिन्दा, सो घमण्‍ड़ी ना भोआ, ना गुस्सै बाळा भोआ, ना पियक्कड़ भोआ, ना लड़ाई करनै बाळा भोआ, ना नीच कमाई रा लोभी भोआ।

⁸पर घरै छूरै री सेवा करनै बाळा, भलाई करनै बाळा, धीरज रखणै बाळा, न्याय करनै बाळा, पवित्र अतै अपणी इच्छा जो काबू मन्ज रखणै बाळा भोआ।

⁹तसेरा तैस सच्चै संदेश पुर मजबुत विस्वास भूणा चहिन्दा जैड़ा तैसिओ सखाऊरा थू फिरी सो होरी जो उत्साहित करी सकदा हा तैहा सच्ची शिक्षा सोगी अतै विरोधी जो भी दस्सी सकदा कि सो कड़ी गलत हिन।

¹⁰अऊँ ऐसा ठेरैतांये बलदा हा क्ओकि मतै सारै ऐसै मणु हिन जैड़ै सही शिक्षा रा विरोध करदै हिन। सो होरी मणु जो बेकार गल्ला मन्ज मूर्ख बणान्दै हिन, खास करीके ऐह यहूदी विस्वासी मणु हिन जैड़ै ऐह मन्दै हिन कि उद्धार पाणै तांयै खतना करवाणा जरूरी हा।

¹¹ऐसै मणु जो शिक्षा दिणै रा मौका मत देय्आ क्ओकि जैहणै सो ऐस तरीकै री गल्ला सखान्दै हिन जैड़ी ना सखाणा चहिन्दी ता सो कई परिवारा रै विस्वास जो नाश करदै हिन। सो ऐसा ठेरैतांये करदै हिन कि सो पैसा कमाई सकन।

¹²क्रेत टापू थऊँ ही अक्क मणु जैसिओ तैठिया रै मणु बुद्धिमान मन्दै हिन तिनी ऐसा बल्लुरा हा कि, “क्रेत मन्ज रैहणै बाळै मणु सदा झूठै, दुष्‍ट जानवर अतै आलसी पेट भरनै बाळै भुन्दै हिन।”

¹³ऐह क्रेत रै मणु रै बारै मन्ज गल्ला हालि भी सच्ची हा ठेरैतांये तियां जो कड़ाई सितै चितौणी दिच्छु कर कि सो विस्‍वासा मन्ज पक्कै भूच्ची गाहन।

¹⁴तिन्या यहूदी री उदाहरण-कहाणी अतै तियां मणु री आज्ञा पुर मन मत ला क्ओकि सो सच्चाई थऊँ भटकी गच्छुरै हिन।

¹⁵सो मणु जंयारै मना मन्ज कोई बुरै विचार ना हिन तिन्या तांयै सब कुछ शुद्व पर सो मणु जैड़ै दुष्‍ट हिन अतै मसीह पुर विस्वास ना करदै जैड़ा कुछ भी सो करदै हिन सो अशुद्ध हा क्ओकि तंयारा दिल पूरी तरह सोगी भ्रष्‍ट भूच्ची चुकुरा हा।

¹⁶ऐसै मणु बल्‍दै हिन कि अहै प्रमात्मैं जो जाणदै हिन पर तंयारै कम्मा थऊँ पता लगदा कि सो प्रमात्मैं जो ना जाणदै क्ओकि सो घृणित अतै आज्ञा जो ना मनणै बाळै हिन अतै कोई खरा कम ना करी पान्दै।