Read Gaddi तीतुस 3 Bible Online

तीतुस 3 - Gaddi bible

तीतुस 3

¹विस्वासी मणु जो याद दुआन्दा रैह कि हाकमा अतै अधिकारी रै अधीन रैहन अतै तंयारै हूक्मा जो मन्दै रैहन अतै सारै खरै कम्मा करनै जो तैयार रैहन।

²तिन्या जो ऐह सखा कि सो कसी जो बदनाम मत करा, घुळ-घळाटी मत करा, पर तंयारा स्वभाव रूआं साई भोआ अतै सबी मणु सोगी बड़ी नम्रता सोगी रेय्आ।

³क्ओकि अहै भी पैहलै निर्बुद्धि अतै आज्ञा ना मनणै बाळै अतै भ्रमा मन्ज थियै अतै रंग-बरंगी अभिलाषा अतै सुख-विलास रै दास थियै, बैरभाव अतै डींगमारी करनै मन्ज जिन्दगी बितान्‍दै थियै, मणु असु सितै घृणा करदै थियै अतै अक्की दुऐ सितै बैर रखदै थियै।

⁴पर जैहणै इन्दै उद्धारकर्ता प्रमात्मैं रा अनुग्रह अतै प्रेम असु मणु पुर प्रकट भुआ,

⁵तिनी इन्दै करूरै भलै कमा री वजह थऊँ ना पर अपणी दया री वजह थऊँ इन्दा उद्धार करू हा। प्रमात्मैं असिओ अपणी पवित्र आत्मा री शक्ति सोगी धोऊ अतै असिओ अक्क नौआ जन्म दिता कि अहै ताजा जिन्दगी री शुरूआत करन।

⁶जैड़ा कम इन्दै उद्धारकर्ता यीशु मसीह असु तांयै करू तठेरी व्जहा थऊँ असिओ प्रमात्मैं मुफ्‍त मन्ज अतै भरपुरी सोगी ऐसा पवित्र आत्मा जो इन्दै अन्दर वास करनै जो दिता।

⁷प्रमात्मैं ऐसा ठेरैतांये करू कि अहै तसेरै अनुग्रह रै द्धारा तसेरी नजरा मन्ज धर्मी बणन अतै अहै तसेरी औलाद बणी सकन ताकि अहै सब कुछ पाई सकन जैड़ा सो असिओ दिणा चाहन्दा हा जैहणै असु सदा तांयै तैस सोगी रैहणा।

⁸ऐह गप्‍प सच हा जैड़ी मैंई हबजु दसी हा अतै अऊँ चाहन्दा कि तू इन्या गल्ला रै बारै मन्ज दृढ़ता सोगी विस्वासी जो सखा ठेरैतांये कि जिन्यै प्रमात्मैं पुर भरोसा करूरा हा सो भलै कम करनै तांयै अपणै टैमां रा इस्तेमाल करन। ऐह शिक्षा भली हिन अतै सबी मणु तांयै लाभदायक हिन।

⁹पर तू मूर्खता रै वाद-विवाद थऊँ अतै वंशावली अतै बैर-विरोध अतै तियां लड़ाई-झगड़ै थऊँ जैड़ै कि मूसा री व्यवस्था रै बारै मन्ज हिन, अपणै आपा जो दूर रख क्ओकि ऐह निष्फल अतै व्यर्थ हिन।

¹⁰अगर तून्दै मन्जै ऐसा कोई मणु भोआ जैड़ा विस्वासी रै मन्जै फूट पैदा करदा भोआ ता तैसिओ कड़ाई सोगी अक्क दोई बरी समझा कि सो ऐसा ना करा, अगर सो फिरी भी ना मन्दा ता तैसिओ अपणी मण्ड़ळी थऊँ नकाळी देय्आ

¹¹क्ओकि ऐस तरह रै मणु सच्चाई दूर भूच्ची गच्छुरै हिन अतै तंयारै अपणै पापा ही तिन्या जो दोषी ठहराणा।

¹²जैहणै अऊँ तिजो बल्लै विस्वासी भाई अरतिमास या तुखिकुस जो भैजला ता तू मिन्जो बल्लै नीकुपुलिस शहर जो ईणै री कोशिश करैं क्ओकि मैंई ऐह सर्दी री रूत तैठी कटणै री सोचुरी हा।

¹³जैहणै जेनास वकीला अतै विस्वासी भाई अपुल्लोस सफर करना लगलै ता तू जैड़ी भी मदद करी भोली करैं ऐह ध्यान रखैं कि तियां जो कसी भी चिजा री कमी ना भोआ।

¹⁴ऐतना ही ना पर तुहै विस्वासी जो ऐह सखान्दै रैंह कि सो अपणा ध्यान भलै कम करनै मन्ज लाई रखन ताकि जिन्या जो कुछ जरूरत भोआ सो पुरा करी सकन अतै तंयारी जिन्दगी होरी तांयै फायदैमन्‍द भोआ।

¹⁵मेरै सोगी जैतणै विस्वासी हिन सो तिजो नमस्कार बलदै हिन अतै क्रेते टापू रै जैतणै विस्वासी जैड़ै असु सितै प्रेम करदै हिन तियां जो भी नमस्कार। अऊँ प्रार्थना करदा कि तूसु सबी पुर प्रमात्मैं रा अनुग्रह भुन्दा रेय्आ।