Read Gaddi फिलेमोन 1 Bible Online

फिलेमोन 1 - Gaddi bible

फिलेमोन 1

¹ऐह पत्री पौलुस री तरफा थऊँ हा जैडा यीशु मसीह रा प्रचार करनै री वजह थऊँ कैद मन्ज हा अतै इन्दै विस्वासी भाई तीमुथियुस री तरफ थऊँ भी। अऊँ ऐह पत्री फिलेमोन जैडा इन्दा प्यारा साथी सेवक हा,

²अतै इन्दी बैहण अफफिया अतै इन्दा साथी योद्धा अर्खिप्पुस अतै तैहा कलीसिया तांयै लिखु करदा जैड़ी तेरै घरा मन्ज हा।

³अऊँ प्रार्थना करदा कि इन्दा पिता प्रमात्मां अतै प्रभु यीशु मसीह तूसु पुर अनुग्रह करा अतै तुसिओ शान्ती देय्आ।

⁴जैहणै भी अऊँ तूसु तांयै प्रार्थना करदा हा अऊँ तूसु तांयै सदा प्रमात्मैं रा धन्यवाद करदा।

⁵अऊँ तेरै प्रभु यीशु पुर विस्वास रै बारै मन्ज अतै प्रमात्मैं रै मणु प्रति तेरै प्रेम रै बारै मन्ज भी हुणदा हा।

⁶अऊँ प्रार्थना करदा कि इन्दी संगति तूसु विस्वासी सोगी अक्क गहराई री समझ पैदा करा, इन्दी जिन्दगी री तिन्या सबी आशीषा रै बारै मन्ज जैड़ी असिओ यीशु मसीह सोगी जुडणै री वजह थऊँ मिलदी हिन।

⁷हे विस्वासी भाई, अऊँ तेरै प्रेम री वजह थऊँ बड़ा खुश अतै उत्साहित हा, ठेरैतांये कि तेरी वजह थऊँ पवित्र मणु रै मन भी उत्साहित भूच्ची गै हिन।

⁸अऊँ पौलुस जैड़ा कि अक्क बुडा मणु अतै मसीह री वजह थऊँ कैद मन्ज हा, सो मसीह मिन्जो आदेश दिणै री हिम्मत दिन्दा कि तुसिओ कै करना चहिन्दा,

⁹पर अऊँ इन्दै प्रेम री वजह थऊँ तुसिओ आदेश ना पर तूसु सोगी बिनती करना चाहन्दा हा।

¹⁰अऊँ ऐह बिनती अपणै पुत्र उनेसिमुस रै बारै मन्ज करू करदा सो मिन्जो सोगी कैद मन्ज रैऊ अतै विस्वास मन्ज अऊँ तसेरा आत्मिक पिता बणी गो।

¹¹सो पैहलै ता तेरै कसी कमां रा ना थू, पर अबै तेरै अतै मेरै दुनीं रै बड़ै कमां रा हा।

¹²अऊँ उनेसिमुस सोगी बड़ा प्रेम करदा फिरी भी अऊँ तैसिओ तिजो बलै फेरी भैजु करदा हा।

¹³अऊँ तैसिओ अपणै बलै रखणा चाहन्दा थू क्ओकि अऊँ सुसमाचार री वजह थऊँ कैद मन्ज हा अतै अऊँ चाहन्दा थू कि तेरी जगह सो मेरी सेवा करी सका।

¹⁴पर अऊँ तैसिओ तैहणै तक ऐठी ना रखणा चाहन्दा जैहणै तक तू सहमत ना भोआ अतै अऊँ चाहन्दा कि ऐह कोई मेरै दबाव सोगी ना भोआ पर तेरी खुशी सितै भोआ।

¹⁵भूच्ची सकदा कि प्रमात्मैं उनेसिमुस जो थोड़ै टैमां तांयै तिजो थऊँ ठेरैतांये अलग करू कि ताकि सो मसीह मन्ज विस्वास करी सका, ठेरा परिणाम ऐह हा कि सो सदा तांयै तिजो बलै फिरी करी ईच्ची सका।

¹⁶पर अबै सो मिन्जो तांयै प्रभु मन्ज अक्क प्रेमी विस्वासी भाई भूणै रै नातै फायदै रा भूणा, पर तिजो तांयै अबै सो दास ना पर अक्क प्रेमी विस्वासी भाई भूणै रै नातै होर भी ज्यादा फायदै रा भूणा।

¹⁷अगर तू मिन्जो अपणा सहभागी समझदा हा ता जैहणै उनेसिमुस तूसु बलै ईणा ता तैस सोगी ईना व्यवहार अतै स्वागत करैं जिन्या मिन्जो तांयै करना हा।

¹⁸अगर कुछ उधार तिजो तैस थऊँ लैणै जो हा, ता तैतिओ मेरै खातै मन्ज लिखी लै।

¹⁹अऊँ पौलुस ऐत जो अपणै हत्था सितै लिखु करदा कि अऊँ तैस उधार जो भरी दिला अतै ऐह बलणै री जरूरत निय्आ कि मेरा तिजो पुर उधार ऐत थऊँ भी ज्यादा हा कि मैंई तेरै प्राणा जो बचाऊरा हा।

²⁰हे मेरै विस्वासी भाई ऐह खुशी मिन्जो प्रभु मन्ज तेरी तरफा थऊँ मुळा कि अक्क मसीह विस्वासी भूणै रै नातै ऐस कमा जो करीके मिन्जो उत्साहित कर।

²¹मैंई ऐह पत्री तिजो लिखी हा क्ओकि मिन्जो पुरा भरोसा हा कि जैड़ी मैंई बिनती करी हा सो कम तुद करना हा अतै मिन्जो पक्का पता कि तुद मेरी बिनती थऊँ भी ज्यादा करना हा।

²²अक्क होर गल्ल अऊँ करना चाहन्दा मिन्जो तांयै अक्क कमरा तैयार रखैं क्ओकि मिन्जो उम्मीद हा कि प्रमात्मैं तेरी प्रार्थना रा उतर दिणा अतै मुँ जेला थऊँ छुटीकरी तूसु सोगी मिलणा ईणा।

²³इपफ्रास जैडा कि प्रभु यीशु मसीह रा सुसमाचार हुनाणै री वजह थऊँ मिन्जो सोगी कैदी हा,

²⁴अतै मरकुस, अरिस्तर्खुस, देमास अतै लूका जैड़ै कि मिन्जो सोगी मिलीकरी प्रभु री सेवा करदै हिन इन्या सबी री तरफा थऊँ तिजो नमस्कार।

²⁵अऊँ प्रार्थना करदा कि प्रभु यीशु मसीह रा अनुग्रह तूसु पुर भुन्दा रेय्आ। आमीन।