Read Gaddi इब्रानियों 1 Bible Online

इब्रानियों 1 - Gaddi bible

इब्रानियों 1

¹पूराणै टैमां मन्ज प्रमात्मैं इन्दै पूर्वजा सोगी कई बरी थोड़ी-थोड़ी अतै कैईआ किस्‍मां रै भविष्‍यवक्ता भैजी करी गल्ला करी।

²ईयां दिन रै आखरी वक्ता मन्ज असु सितै पुत्रा रै द्धारा गल्ला करी हिन। प्रमात्मैं सारै संसार जो अपणै पुत्रा रै द्धारा बणाऊ अतै तैसिओ सबी चिजा रा वारिस ठहराऊरा।

³पुत्र प्रमात्मैं री महिमा सोगी चंमकू करदा हा अतै सो हर तरह सितै प्रमात्मैं सांईयै हा। सो अपणै सामर्थी बचना सितै पूरै संसार जो सम्भालदा हा। तिनी मणु जो तंयारै पापा थऊँ शुद्ध करू अतै स्वर्गा मन्ज पितै रै सिंहासना पुर सज्जै हत्थै गिची बैहुरा।

⁴ऐस तरीकै प्रमात्मैं पुत्रा जो ऐसा नां दिता जैड़ा स्वर्गदूता थऊँ भी महान हा, जैत थऊँ ऐह पता चलदा हा कि पुत्र तियां थऊँ ज्यादा सामर्थी हा।

⁵क्ओकि प्रमात्मैं अपणै कसी भी स्वर्गदूता सोगी ना बल्लू पर यीशु सोगी बल्लू कि; “तू मेरा पुत्र हा, अज तू मिन्जो थऊँ पैदा भुआ?” अतै फिरी ऐह भी कसी स्वर्गदूता सोगी ना बल्लू कि; अऊँ तसेरा पिता अतै ऐह मेरा पुत्र हा?

⁶अतै प्रमात्मां अपणै आदर योग्य पुत्रा जो ऐस संसारा मन्ज भैजणै थऊँ पैहलै बलदा कि; “प्रमात्मैं रै सब स्वर्गदूत तसेरी पूजा करन।”

⁷अतै स्वर्गदूता रै बारै मन्ज ऐह बलदा कि; “सो अपणै स्वर्गदूता जो हवा सांईयै अतै अपणै सेवका जो भखुरी अग सांईयै बणान्दा।”

⁸पर पिता प्रमात्मां पुत्रा रै बारै मन्ज पवित्रग्रन्था मन्ज बलदा कि; “हे प्रमात्मां, तेरा सिंहासन युगा-युग तिकर रैहणा, तुद अपणै मणु पुर न्याय सोगी राज करना हा।

⁹तैंई खरै कम करनै सितै प्‍यार रखू हा, अतै बुरै कमा थऊँ नफरत करी हा, ठेरी व्जहा थऊँ अऊँ तेरा प्रमात्मां, जिनी तुसिओ चुणुरा हा, अतै तेरै साथी थऊँ बधी करी खुशी दिती हा।”

¹⁰तिनी अपणै पुत्रा सोगी ऐह भी बल्लू कि; “हे प्रभु, सबी थऊँ पैहलै तैंई धरती री नीं पाई अतै स्वर्ग तेरै हत्था री कारीगरी हा।

¹¹तियां ता नाश भूच्ची गाहणा, पर तुद सदा तक जिन्दा रैहणा; अतै तियां सबी कपड़ै सांईं पूराणै अतै बेकार भूच्ची गाहणा।

¹²अतै तुद तियां जो चादरा सांईं लपेटणा हा, अतै सो कपड़ै सांईं बदली दीणैं हिन, पर तू कदी ना बदलिणा अतै तुद सदा तक जिन्दा रैहणा।”

¹³प्रमात्मैं स्वर्गदूता जो ऐह कदी ना बल्लू कि; “तुहै मेरी सज्जी कनारी बैहा, जैहणै तिकर अऊँ तेरै बैरी जो तेरै पैरा थलै ना करी दिच्छु?”

¹⁴ठेरैतांये स्वर्गदूत ता सिर्फ सेवक ही हिन सो आत्मा हिन तियां मणु री सेवा करनै तांयै अतै तंयारा खयाल रखणै तांयै भैजै गान्दै हिन जैड़ा उद्धार पान्दै हिन।