Read Gaddi इब्रानियों 10 Bible Online

इब्रानियों 10 - Gaddi bible

इब्रानियों 10

¹मूसा री व्यवस्था ईणैबाळी भली चिजा री अक्क परछाई हा, ऐह परछाई अप्पू सो भली चिज निय्आ क्ओकि सो जैड़ै मणु आराधना करदै हिन अतै हर साल बलिदान चढ़ान्दै हिन ऐह सब कुछ करनै थऊँ सो अपणै पापा थऊँ छुटकारा ना पाई सकदै हिन।

²अगर प्रमात्मां तियां मणु रा पाप बलिदान रै द्धारा दूर करी सकदा थू ता फिरी तियां जो महसुस ना भुन्दा कि सो हालि भी पापी हिन, अगर तियां जो पता भुन्दा ता जरूर सो बलिदान चढ़ाणा बन्द करी दिन्दै।

³पर तठेरै बदलै सो बलिदान जैड़ा हर साल चढ़ान्दै हिन तियां जो तंयारै पापा रै बारै मन्ज याद दुआन्दा रैहन्दा हा।

⁴क्ओकि ऐह ना भूणैबाळी गल्ल हा कि गोरू पैहरू रै खूना सितै पाप दूर भून।

⁵ठेरी व्जहा थी कि मसीह ऐस संसारा मन्ज ईणै थऊँ पैहलै अपणै पिता प्रमात्मां सोगी बल्‍दा कि, “बलिदान अतै भेंट तैंई ना चाई, पर तैंई अक्क शरीर मिन्जो दिता जठेरी अऊँ भेंट चढ़ाई सकू।”

⁶“होमबलि करनै सितै अतै पापबलि चढ़ाणै सितै प्रमात्मां खुश ना भुआ।”

⁷फिरी मैंई बल्लू हे “प्रभु प्रमात्मां, अऊँ ऐड़ी हा”, तेरी इच्छा जो पुरा करनै तांयै जियां पवित्रग्रन्था मन्ज मेरै बारै मन्ज लिखुरा हा।

⁸जियां मैंई पैहलै लिखुरा थू, यीशुऐ बल्लू कि, “ना ता तैंई बलि चढ़ावा अतै होमबलि अतै पापबलि चाई अतै ना तियां थऊँ खुश भुआ” हालांकि ऐह बलिदान ता व्यवस्था रै मुताबक दितै गान्हदै थियै।

⁹फिरी तिनी ऐह भी बल्लू कि; “हे प्रमात्मां अऊँ ऐड़ी हा तेरी मर्जी जो पुरा करनै तांयै।” ऐस तरीकै प्रमात्मैं पूराणै बलिदान रै रवाजा जो दूर करी दिता अतै मसीह रा बलिदान जो नियुक्त करी दिता।

¹⁰क्ओकि यीशु मसीह सो करू जैड़ा प्रमात्मां तैस थऊँ चाहन्दा थू, प्रमात्मैं असिओ तैस तांयै अलग करू। ऐह तैहणै भूआ जैहणै यीशु मसीह अपणै शरीरा जो अक्क ही बरी बलिदान रै रूपा मन्ज चढ़ाऊ अतै ऐसा बलिदान जैतिओ बार-बार चढ़ाणै री जरूरत ना हा।

¹¹अतै हर अक्क याजक जैडा खडी करी हर रोज सेवा करदा अतै अक्क ही बलि जैड़ी कि पापा जो कदी भी दूर ना करी सकदी हा बार-बार चढ़न्‍दा।

¹²पर मसीह पापा तांयै अक्क बलिदान चढ़ाऊ जैड़ा सदा तांयै काफी हा, तठेरै बाद सो स्वर्गा मन्ज प्रमात्मैं रै सिंहासन री सज्जी कनारी गिच्ची बैईठा।

¹³अतै तैसा घड़ी थऊँ ही सो प्रमात्मैं री भाळ करू करदा कि तसेरै बैरी जो पूरै तरीकै नाश करा।

¹⁴क्ओकि तसेरै अक्की ही बलिदान रै द्धारा तिनी सदा तांयै तियां मणु जो पाप थऊँ आजाद करू जियां जो सो प्रमात्मैं री कनारी लेई करी आ।

¹⁵पवित्र आत्मा भी असिओ ऐह पक्की गवाई दिन्दा कि ऐह सच हा, पैहलै सो बलदा हा;

¹⁶“कि प्रभु बल्‍दा कि जैड़ी नौआ वायदा मुँ तियां दिन बाद अपणै मणु सितै करना हा सो ऐह हा कि, मुँ अपणी व्यवस्था तंयारै दिला पुर लिखणी हा अतै तिआंरै मनां मन्ज पाणी हा।”

¹⁷फिरी सो बल्‍दा कि, “मुँ तंयारै पापा जो अतै तंयारै अधर्म रै कम, कदी भी याद ना करनै हिन।”

¹⁸अतै जैहणै तंयारै पाप माफ भुच्‍ची गै ता फिरी कोई भी बलिदान चढ़ाणै री जरूरत ना रैई।

¹⁹ठेरैतांये हे विस्वासी भाईओ अहै ऐहा गल्ला पुर भरोसा करदै हिन जैड़ा मसीह असु तांयै पुरा करू, जैहणै तिनी अपणा खून असु तांयै बहाऊ, अहै हिम्मत सोगी प्रमात्मैं री हजुरी मन्ज गिच्ची सकदै हिन जठेरा चिन्ह सो तम्बू थू जैतिओ महापवित्र जगह बलया गान्दा थू।

²⁰तिनी ही असिओ प्रमात्मैं री हजुरी मन्ज गाणै योग्य बणाऊ तैस नोए रस्तै जो तैयार करनै रै द्धारा जैत मन्ज अहै सदा तांयै जिन्दा रैई सकदै हिन। ऐह नौआ रस्ता यीशु हा जैड़ा असु तांयै मरू।

²¹मसीह सो महायाजक हा जैड़ा इन्दै ऊपर राज्य करदा हा अतै अहै प्रमात्मैं रै मणु हिन।

²²ठेरैतांये असिओ यीशु मसीह पुर पुरा भरोसा करीके प्रमात्मैं बलै दिला थऊँ ईणा चहिन्दा। तिनी ही इन्दै दिला जो शुद्ध करू हा जैड़ै पैहलै पाप सोगी भरूरै थियै, ऐह ऐस तरीकै हा जियां कि तिनी अपणा खून इन्दै दिला पुर छिड़की दिता अतै इन्दै शरीरा जो शुद्ध पाणी सितै धोई दिता।

²³अतै अपणी उम्मीद रै अंगीकारा जो दिला सितै सम्भाळी रखन क्ओकि प्रमात्मां जिनी वायदा करूरा हा सो सचा हा।

²⁴अहै ऐह सोचन कि कियां अहै अक्की दूये जो प्रेम अतै भलै कमां जो करनै तांई उत्साहित करी सकदै हिन।

²⁵कुछ मणुऐ आराधना तांयै इकट्ठै भूणै री आदत जो छड़ी दिता हा असिओ ऐसा ना करना चहिन्दा। असिओ अक्की दूये जो उत्साहित करना चहिन्दा खास करीके ऐत तांयै कि तुहै जाणदै हिन कि प्रभु रा दोबारा ईणै रा दिन बड़ा नेड़ै हा।

²⁶अगर अहै सच्चाई जो जाणनै थऊँ बाद जाणी-बूझी करी पापा करदै रैहन, ता फिरी कोई बलिदान निय्आ जैड़ा इन्दै पापा जो दूर करी सकदा हा।

²⁷ठेरै बदलै असिओ ड़री करी ऐहा गल्ला री उम्मीद करना चहिन्दी कि प्रमात्मैं इन्दा न्याय करना, अतै फिरी धार्मिकता सोगी अपणै सब बैरी जो अगी मन्ज पाई करी सजा दिणिआ।

²⁸अगर दोई या दोई थऊँ ज्यादा मणु कसी अक्की मणु पुर दोष लान्दै हिन कि तिनी मूसा री व्यवस्था जो त्रोडु हा ता तैसिओ मारी दिता गान्दा हा।

²⁹प्रमात्मैं रै पुत्र रा निरादर करना अतै तैस वायदै रै खून रा निरादर करना जठेरै द्धारा अहै पवित्र भुएै थियै असु तांयै बड़ा ही ज्यादा भंयकर हा। तैस तरीकै ही जे अहै पवित्र आत्मा रा अपमान करन जैड़ा असु पुर दया करदा हा, ता असिओ भारी दण्ड़ मुळना हा।

³⁰क्ओकि अहै ऐहा गल्ला जो अच्छै तरीकै जाणदै हिन कि प्रमात्मैं बल्लू कि; “बदला लैणा मेरा कम हा, मुँ ही बदला लैणा,” अतै फिरी भविष्‍यवक्ता मूसा बलदा हा कि, “प्रभु अप्पू ही अपणै मणु रा न्याय करना।”

³¹जिन्दै प्रमात्मैं रै हत्था मन्ज पैणा डरोणी गप्‍प हा।

³²तियां शुरू रै दिना जो याद करा जैहणै तुसै पैहली बरी ही मसीह री सच्चाई जो समझी गै थियै। तुहै काफी कष्‍टा जो झेलू अतै जैहणै इन्या कष्‍टा मन्ज थियै तून्दा प्रमात्मैं पुर भरोसा बणी रैऊ।

³³कदी-कदी तूसु सोगी गाळी गलोच भुआ, अतै कदी-कदी भिड़ा मन्ज तूसु सोगी गलत व्यवहार भूआ अतै कदी-कदी तुहै होरी रै दुखा मन्ज सहभागी भुएै।

³⁴तुसै कैदी रै दुखा मन्ज भी दुखी भुएै अतै अपणी धन-दौलत भी खुशी सितै लुटणा दिती, ऐह जाणी करी कि तूसु बलै स्वर्गा मन्ज अक्क होर भी ऐत थऊँ ज्यादा उतम अतै सदा काल तिकर ठेरनै बाळी धन-दौलत हा।

³⁵ता अपणै क्‍लेशा मन्ज हिम्मत मत छड़ा क्ओकि तठेरा इनाम बड़ा बड्‍डा हा।

³⁶तुसिओ धीरज सोगी प्रमात्मैं पुर भरोसा करना चहिन्दा ताकि प्रमात्मैं री इच्छा जो पूरी करनै थऊँ तैस तुसिओ सो दिणा जठेरा तिनी वायदा करूरा हा।

³⁷पवित्रग्रन्था मन्ज प्रमात्मां मसीहा रै बारै मन्ज भविष्‍यवक्ता रै द्धारा ऐह बलदा हा कि; “अबै बड़ा ही थोड़ा टैमं रैई गछूरा कि जसेरै बारै मन्ज मैंई वायदा करूरा तैस जरूर ईणा, अतै तैस देर ना करनी हा।

³⁸अतै मेरा विस्वासी मणु विस्‍वासा सितै जिन्दा रैहणा, अतै अगर सो फिरी गच्छा ता मेरा मन तैस सितै खुश ना भूणा।”

³⁹“पर अहै डरपोक मणु सांईयै ना हिन अतै ना ही अहै प्रमात्मैं जो मजबुर करन असिओ नाश करनै तांयै, अहै सो मणु हिन जैड़ै प्रमात्मैं पुर भरोसा करदै हिन ताकि सो इन्दै प्राणा जो सदा तांयै बचा।”