Read Gaddi इब्रानियों 11 Bible Online

इब्रानियों 11 - Gaddi bible

इब्रानियों 11

¹जैड़ै प्रमात्मैं पुर पक्का विस्वास करदै हिन तियां जो उम्मीद हा कि तियां जो प्रमात्मैं सो दिणा जठेरी जो उम्मीद करदै हिन, क्ओकि तियां जो पक्का पता हा कि जियां चिजा जो अबै हेरी ना सकदै सो सच हिन।

²क्ओकि ठेरै बारै मन्ज प्रमात्मैं इन्दै पूर्वजा पुर जाहिर करू कि सो तियां थऊँ खुश हा।

³विस्‍वासा थऊँ हि अहै जाणी गान्हदै हिन सारी संसार री रचना प्रमात्मैं रै बचना सितै ही भूई। ऐह ना कि जैडा कुछ हेरनै मन्ज इन्दा सो हेरूरी चिजा सोगी बणुरा भोआ।

⁴विस्‍वासा सितै ही हाबिलै कैन थऊँ उतम बलिदान प्रमात्मैं तांयै चढ़ाऊ अतै तैस बलिदान री व्जहा थऊँ तसेरै धर्मी भूणै री गवाई दिती, क्ओकि प्रमात्मां तैस बलिदान थऊँ खुश थू। अतै अहै हाबील री मौत थऊँ बाद भी तैस थऊँ सीखी सकदै हिन कियां अहै प्रमात्मैं पुर भरोसा करी सकदै हिन।

⁵हनोक प्रमात्मैं पुर विस्वास करू अतै सो ना मरू, तिनी प्रमात्मैं जो खुश करू, अतै प्रमात्मैं तैसिओ स्वर्गा जो चुक्की लैऊ, ठेरी वजह थऊँ तसेरा शरीर कदी ना मूळु।

⁶अतै प्रमात्मैं पुर विस्वास रखणै थऊँ ही अहै तैसिओ खुश करी सकदै हिन क्ओकि प्रमात्मैं बल्लै ईणै बाळै जो विस्वास करना चहिन्दा कि सो हा अतै अपणै खोजणै बाळै जो तैस इनाम दिणा।

⁷विस्‍वासा सितै ही नूह प्रमात्मैं थऊँ चेतावनी पाई तैसा जल प्रलय रै बारै मन्ज जैड़ी तिनी कदी ना हेरूरा थू, भक्ति सितै अपणै टबरा जो बचाणै तांई पाणी रा जहाज बणाऊ। जिन्यैं मणु विस्वास ना करू सो तैस जल प्रलय मन्ज मरी गै, अतै नूह प्रमात्मैं री नजरा मन्ज विस्वास री वजह थऊँ री धर्मी बणु अतै संसार जो दोषी ठहराऊ।

⁸विस्‍वासा सितै ही अब्राहम जैहणै अक्क जगह गाणै तांयै प्रमात्मैं हैदु, ता आज्ञा मन्‍नी करी इन्‍नी जगहा जो निकळी गो जैतिओ प्रमात्मां तैसिओ विरासत मन्ज दिणैबाळा थू, अतै सो ऐह ना जाणदा थू कि अऊँ करा चलूरा हा फिरी भी सो निकळी गो।

⁹जैसा जगहा रा प्रमात्मैं वायदा करूरा थू तैड़ी अब्राहम अक्क परदेसी सांईयै तम्बू मन्ज रैहणा लगा, तैस सोगी तसेरा पुत्र इसहाक अतै पोत्रु याकूब जिन्यै ऐस वायदै जो प्रमात्मैं थऊँ पाऊरा थू सो भी तैड़ी रैहणा लगै।

¹⁰क्ओकि अब्राहम स्वर्गा रै तैस शहर मन्ज रैहणै तांयै भाळ करू करदा थू जैड़ा सदा तक बणी रैहणा, ऐह ऐसा शहर हा जैतिओ रचणै बाळा अतै बणाणै बाळा प्रमात्मां हा।

¹¹विस्‍वासा री वजह थऊँ ही अब्राहम पिता बणी सकू ठेरै बावजूद कि सो बुडा थू अतै तसेरी घरावाळी सारा जो भी बच्चै पैदा करनै री सामर्थ ना थी, फिरी भी तिनी प्रमात्मैं पुर भरोसा करू कि तैस अपणा वायदा पुरा करना हा।

¹²अब्राहम जैड़ा लगभग मरूरै सांईयै थू फिरी भी सो कईआ रा पिता बणी सकू, असल मन्ज प्रमात्मैं रै वायदै रै अनुसार ऐतनी औलाद भूई जैतणै अम्बरा रै तारै अतै समुंद्र रै कनारै री रेता रै कण हिन।

¹³ऐह सब मणु जैड़ै प्रमात्मैं पुर विस्वास करदै थियै सो मरी भी गै अतै तिऐं वायदा करूरी चिजा ना पाई, पर तियां जो दूरा थऊँ ही हेरी करी खुश भुएै अतै मन्‍नी लैऊ कि अहै धरती पुर परदेसी अतै बाहरी मणु हिन।

¹⁴जैड़ै इन्‍नी जिन्‍नी गल्ला करदै हिन सो ऐह दसदै हिन कि सो ऐस देश रै पाणै री उम्मीद करदै हिन जैड़ा तंयारा अपणा हा।

¹⁵सो तैस देश रै बारै मन्ज सोचदै ना रैह जैतिओ सो छड़ी करी छुरै थियै अगर सो इन्या सोचदै ता तैड़ी फिरी गाणै रा मौका तिन्या बलै थू।

¹⁶पर सो स्वर्गा मन्ज अक्क उतम घरा री भाळ करू करदै थियै। ठेरैतांये प्रमात्मां तंयारा प्रमात्मां कहलाणै मन्ज शर्मान्दा निय्आ, प्रमात्मैं तियां तांई अक्क नगर तैयार करूरा हा।

¹⁷विस्‍वासा सितै ही अब्राहमे अपणै परखणै रै टैमैं अपणै इकलोतै पुत्रा इसाहक री बलि चढ़ाणा लगा जिन्‍नी प्रतिज्ञा जो सच मनुरा थू।

¹⁸प्रमात्मैं तैसिओ अप्पू बल्लुरा थू कि, “इसाहक थऊँ तेरा वंश चलना”, अतै सो अपणै इकलोतै पुत्रा जो बलि चढ़ाणै तांई चली गो।

¹⁹अब्राहमे मनी लैऊ कि, प्रमात्मां सामर्थी हा कि सो इसहाक जो मरुरै थऊँ फिरी जिन्दा करी सकदा हा, अतै मना अब्राहमे तैसिओ मरूरै थऊँ तियां ही जिन्दा भी पाई लैऊ।

²⁰विस्‍वासा सितै ही इसहाकै अपणै दोनो पुत्र याकूब अतै एसाव जो ईणैबाळी गल्ला रै बारै मन्ज अशीर्वाद दिता।

²¹विस्‍वासा सितै ही याकूब मरदै टैमैं यूसुफ रै दूनी पुत्रा जो अक्क-अक्क करीके अशीर्वाद दिता अतै अपणी होठी रा सहारै सोगी प्रमात्मैं री आराधना करी।

²²विस्‍वासा सितै ही यूसुफै जैहणै सो मरनै बाळा थू ता इस्त्राएल रै मणु जो मिस्त्र देश थऊँ निकळनै रै बारै मन्ज चर्चा करी। तिनी ऐह भी हूक्म दिता कि गान्दै टैमैं तसेरी हड्डी जो भी लेई गच्छैं।

²³विस्‍वासा सितै ही मूसा रै माता-पिता तैस जो पैदा भूणै थऊँ बाद त्राई महीनै तिकर लुकैरी रखू, कजो कि तिऐं हेरू कि गोबरू छैळ हा अतै राजा रै हूक्म रा विरोध करनै थऊँ ना डरै।

²⁴फिरी मूसा जैहणै बड़ा भूच्ची गो, ता तसेरै विस्वास री वजह थऊँ तिनी राजा फिरौन री कुल्ळी रा पुत्र बणी करी रैहणै जो मना करी दिता।

²⁵तिनी ऐह चुणी लैऊ कि प्रमात्मैं रै मणु सोगी दुख भोगा ना कि पापा मन्ज थोड़ै दिन तक सुख भोगा।

²⁶मूसा अपणै आपा जो मसीह री व्जहा थऊँ बेईजत भूणा मिस्र रै खजानै थऊँ मता धन समझू क्ओकि सो इनाम पाणै री भाळ करू करदा थू।

²⁷विस्वास सोगी ही तिनी मिस्र देश जो छड़ी दिता, मूसा तैस ना हुजणै बाळै प्रमात्मैं जो हेरी लैऊरा थू अतै सो राजा रै क्रोध थऊँ ना डरू।

²⁸मूसा इस्त्राएल रै मणु जो हूक्म दिता कि सो बछड़ै रा खून छिड़की करी फसह रै त्यौहार जो मनान। ऐस तरीकै नाश करनै बाळा स्वर्गदूत जैसिओ प्रमात्मैं भैजुरा तसेरै द्धारा इस्त्राएली रै पहलौठै रा नाश ना भोआ।

²⁹विस्‍वासा सितै ही इस्त्राएली लाल समुंद्र थऊँ इआं पार चली गै जिआं कि हुक्की जमीना मन्ज चलदै हिन अतै जैहणै मिस्र रै मणुऐ इआं करना चऊँ ता सो सब डुब्‍बी मरै।

³⁰इस्त्राएल रै मणुऐ प्रमात्मैं पुर विस्वास करू अतै सो यरीहो शहर री दीवार री चौं कनारी सत दिना तिकर चक्‍कर लाई बैहै ता प्रमात्मैं रै कहे अनुसार सो दीवार ढैई गैई।

³¹विस्‍वासा सितै हि भेदी जो कुशलता सितै रखणै पुर राहाब नां री वेश्या प्रमात्मैं री आज्ञा ना मनणै सोगी नाश ना भूई।

³²अबै मिन्जो होर कुछ बलणै री जरूरत निय्आ क्ओकि टैमं निय्आ कि गिदोन रा अतै बाराक अतै समसून रा अतै यिफतह रा अतै राजा दाऊद रा अतै शामुएल रा अतै होर भविष्‍यवक्ता रा बखान करूं।

³³तिऐं विस्‍वासा सितै ही देश जितै, न्याय रै कम करै, प्रतिज्ञा करूरी चिजा पाई, शेरा रै मुँह बन्द करै।

³⁴अगी री लपटा जो ठंड़ा करू, तलवारा री मारा थऊँ बची निकळै, कमजोरी मन्ज ताकतवर बणै, लड़ाई मन्ज वीर बणै, अतै परदेसी फौजा जो मारी करी खदेड़ी दिता।

³⁵कुछ जनानी अपणै मरुरै मणु जो फिरी जिन्दा पाऊ, कतूणैं ता मार खान्दै-खान्दै मरी गै पर विस्वास रै कारण जेला थऊँ छुटकारा ना चऊँ ठेरैतांये कि तिन्या जो वेहतर जिन्दगी मुळी सका दोबारा जी भूणै रै बाद।

³⁶कई मणु ता मजाक बणनै सितै अतै कोड़ै री मार खाणै सितै अतै बनी निणै सितै अतै कैदा मन्ज पाई दितै गै।

³⁷कई मणु जो पत्थर मारी मारी मारै गै, कुछ जो आरै सितै चीरै गै, कुछ जो तलवारा सितै मारै गै। कुछ मणु भैड़ा-बकरी री खाल पैहनी करी ऐरा-औरा फिरदै रै अतै कुछ गरीबी मन्ज दुख क्‍लेश भुक्‍तदै रैह।

³⁸कुछ मणु बणा-बाड़ी मितै, पहाड़ा अतै गुफा मितै अतै धरती री दरारा मन्ज भटकदै रै क्ओकि ऐह संसार तियां भलै मणु जो पाणै रै योग्य ना थू।

³⁹प्रमात्मां खुश थू कि इन्या मणुऐ तैस पुर विस्वास करू, पर फिरी भी तिन्या जो प्रमात्मैं रा वायदै करूरी चिजा ना मुळी।

⁴⁰क्ओकि प्रमात्मैं तिन्या तांयै ही ना पर असु तांयै भी अक्क वेहतर योजना बणाऊरी हा, प्रमात्मां तिन्या जो असु सोगी ही सिद्ध करना चाहन्दा हा।