Read Gaddi इब्रानियों 13 Bible Online

इब्रानियों 13 - Gaddi bible

इब्रानियों 13

¹अक्की दूये रै बारै मन्ज चिन्ता करदै रैहन जियां प्रभु रै मणु जो करना चहिन्दा।

²ऐह ध्यान रखा कि अनजाण मणु रा भी अपणै घरै स्वागत करा, इन्या करनै सितै कुछ मणुऐ अनजाणै मन्ज स्वर्गदूता रा भी अपणै घरा मन्ज स्वागत करू हा।

³कैदी मणु री ईनी सुध लेय्आ जिआं कि तुसै भी तियां सोगी कैदी भून, अतै जिआं मणु जो सताया गान्दा हा तंयारै दर्द जो भी इन्या महसुस करा कि तुहै तिन्या सोगी तंयारै दुख मन्ज सहभागी हिन।

⁴बैह सबी मणु मन्ज आदर-मान री गप्‍प समझी गच्छा अतै बछांण शुद्ध रेय्आ क्ओकि प्रमात्मैं व्यभिचारी अतै पराई जनानी बल्लै गाणै बाळै रा न्याय करना।

⁵अपणी जिन्दगी जो पैसै रै प्रेम थऊँ दूर रखा, जैडा कुछ तूसु बलै हा तैत मन्ज ही खुश रेय्आ क्ओकि प्रमात्मैं अप्पू ही बल्लुरा हा कि “मुँ तुसै कदी भी ना छड़णै हिन अतै ना कदी त्यागणै हिन।”

⁶ऐत तांई अहै निडर भूच्ची करी बलदै हिन कि, “प्रभु मेरा सहायक हा, मुँ ना डरना हा मणु मेरा कै करी सकदा।”

⁷जैड़ै तून्दै अगुवै थियै अतै जिऐ तूसु जो प्रमात्मैं रा बचन हणाऊरा हा तियां जो याद रखा। याद करा कि तिन्यै कस तरीकै री जिन्दगी बिताई थी अतै तियां सांईयै विस्वास मन्ज बढ़णै री कोशिश करा।

⁸यीशु मसीह कदी ना बदलिन्दा सो कल अज अतै युगा-युग अक्क जिन्‍ना हा।

⁹अनजाण मणु जो मौका मत देय्आ को सो तुसिओ प्रमात्मैं रै बारै मन्ज होर कोई नोई गल्ला मन्ज विस्वास करनै जो मजबुर करन, ठेरैतांये तुहै अनजाण मणु री भरमाणै बाळी गल्ला मन्ज मत इन्दै। इन्‍नी अनजाण गल्ला जैड़ी तुहै असु थऊँ ना सीखी, जिन्या कि कै खाणा कै ना खाणा ठेरै बारै मन्ज जैड़ै नियम हिन ऐत थऊँ कोई फाईदा ना भुन्दा।

¹⁰असु बलै अक्क इन्‍नी वेदि हा जैड़ी सो याजक भी जैड़ै आराधना री जगह सेवा करदै हिन, तैड़ी थऊँ तिन्या जो भी कुछ खाणै रा अधिकार निय्आ।

¹¹पैहलै वायदै रै अनुसार हर साल जिन्या गोरू रा खून पापबलि तांई महायाजक महापवित्र जगह मन्ज पाप री माफी तांयै लेई गान्दै हिन अतै तियां गोरू री देह तैस छावनी थऊँ बाहर फूकी दिन्दै हिन।

¹²इन्‍नी साहबै ही यीशु मसीह भी मणु जो अपणै खूना सितै पवित्र करनै तांई यरूशलेम शहर बाहर दुख झेलू।

¹³ता अईआ अहै छावनी रै बाहर यीशु वलै चलन ताकि अहै उद्धार पाई सकन अतै मणु रै द्धारा बदनामी सैहणै जो तैयार रैहन जियां तसेरी बदनामी करी।

¹⁴कजो कि ऐसा दुनिया मन्ज ईदंआ पक्का रैहणै बाळा कोई नगर निआं बल्कि अहै ईणैबाळै अक्क स्वर्गीय नगरा री खोज मन्ज हिन।

¹⁵ऐत तांई अहै यीशु रै कारण अपणै लवड़ा सितै प्रमात्मैं री स्तुति सदा करदै रैहन ऐह इन्दा तैस तांयै बलिदान हा।

¹⁶पर भलाई करा अतै जरूरत मंद मणु सोगी अपणी चिजा जो बड़ा, क्ओकि प्रमात्मां इन्‍नै जिन्‍नै बलिदान थऊँ खुश भुन्दा हा।

¹⁷अपणै अगुवै री मन्ना अतै तंयारै अधीन रेय्आ क्ओकि सो तून्दा ध्यान रखदै हिन कि तुहै भटकी ना गाहन। तियां जो अपणी सेवा रा प्रमात्मैं जो हिसाब दिणा पैणा, कि सो ऐस कमां जो खुशी सितै करन, ना कि दुखी भूची करी ना ता तुसिओ कोई फाईदा ना भूणा।

¹⁸असु तांई प्रार्थना करदै रेय्आ क्ओकि असिओ पक्का पता हा कि इन्दा विवेक शुद्व हा अतै अहै चाहन्दै हिन कि इन्दै सबी कमा रै द्धारा अहै प्रमात्मैं रा आदर करन।

¹⁹प्रार्थना करनै तांई अऊँ तूसु जो होर भी उत्साहित करदा हा कि अऊँ बड़ै तोळै तूसु बल्लै फिरी ईच्ची सकू।

²⁰अबै शान्ती दिणैबाळा प्रमात्मां जिनी इन्दै प्रभु यीशु मसीह जो मुरदै थऊँ जीयाऊ जैडा भैड़ा रा महान पाहल हा अतै तिनी अपणै खूना रै द्धारा अनन्त काल रै वायदै जो स्थापित करू हा।

²¹सो तुसिओ सब गल्ला मन्ज सामर्थ देय्आ कि तुहै तसेरी इच्छा जो पुरा करी सकन, सो तून्दै अन्दर यीशु मसीह रै सामर्थ रै द्धारा हर भली गल्ला जो पैदा करा जैत सोगी सो खुश भुन्दा हा, तसेरी महिमा सदा-सदा तांयै भुन्दी रेय्आ। आमीन।

²²हे विस्वासी भाईओ, अऊँ तूसु सितै बिनती करदा कि, तुहै धीरज सोगी इन्या उत्साह भरै उपदेशा जो हुणी लेय्आ क्ओकि मैंई तूसु जो बड़ा थोड़ा करीके लिखु हा।

²³तुसै ऐह जाणी लेय्आ कि तीमुथियुस ईदंआ विस्वासी भाई जेला थऊँ छुटी गछूरा हा अतै जे सो तोळा पुजी गो ता मुँ तैस सोगी तूसु सितै मुळना हा।

²⁴अपणै सारै अगुवै अतै सबी पवित्र मणु जो नमस्कार करा। इटली देश मन्ज रैहणै बाळै विस्वासी भी तूसु जो नमस्कार करदै हिन।

²⁵तूसु सबी पुर प्रमात्मैं रा अनुग्रह भुन्दा रेय्आ। आमीन।