Read Gaddi इब्रानियों 4 Bible Online

इब्रानियों 4 - Gaddi bible

इब्रानियों 4

¹ठेरैतांये तैस आराम बाळी धरती मन्ज प्रवेश करनै रा वायदा हालि भी हा अतै असिओ ध्यान रखणा चहिन्दा कि असु थऊँ कोई भी तैत थऊँ वंचित ना रैई गच्छा।

²जियां अहै यीशु मसीह रा सुसमाचार हुणुरा थू, तियां ही इस्त्राएल रै मणुऐ भी तैस सुसमाचार जो हुणुरा थू कि सो तैहा आराम बाळी धरती पुर पुजी सकदै हिन। तिन्यै तैहा गल्ला पुर विस्वास ना करू अतै सो संदेश तियां तांयै बेकार ठहरू।

³ठेरैतांये अहै जिऐ विस्वास करू हा तैस आराम बाळी धरती मन्ज दाखल भुन्दै हिन जिआं कि प्रमात्मैं होरी तांयै बल्लुरा थू कि; “मैंई अपणै गुस्सै मन्ज सौगन्द खाई कि तियां मेरै आराम बाळी धरती मन्ज दाखल ना भूणा।” अहै जाणदै हिन कि ऐह आराम बाळी धरती जैड़ी अबै हा, जैहणै थऊँ संसार री रचना भूई तैहणै थऊँ थी।

⁴क्ओकि सतमें दिना रै बारै मन्ज प्रमात्मैं पवित्रग्रन्था मन्ज बल्लुरा कि प्रमात्मैं सतमें दिनै अपणै सबी कमां जो निपटाई करी आराम करू।

⁵अतै फिरी अहै ऐह भी पढ़दै हिन कि; “तियां मेरै आरामा बाळी धरती मन्ज दाखल ना भूणा।”

⁶ठेरा मतलब ऐह हा कि तैस आराम बाळी धरती मन्ज प्रवेश करनै रा वायदा हालि भी हा, जिन्यै पैहलै सुसमाचार हुणुरा थू तिन्यै आज्ञा रा पालन ना करू अतै सो प्रवेश ना करी सकै।

⁷कुछ टैमां बाद प्रमात्मैं राजा दाऊद सोगी ऐह वायदा फिरी करू जियां मैंई पैहलै बल्लू थू कि; “अगर तुसै अज प्रमात्मैं रा बचन हुणलै, ता मनां जो कठोर मत करदै।”

⁸अतै अगर यहोशू सच मन्ज मणु जो आरामा दी दिन्दा ता प्रमात्मैं रै आराम रै दिन री गल्ल करनै री जरूरत ना भुन्दी।

⁹ता जाणी लेय्आ कि प्रमात्मैं रै मणु तांयै आक आराम करनै री जगह तैयार करूरी हा जैड़ी तियां पूरी तरह आराम करना। तियां तैस तरीकै आराम करना जियां प्रमात्मैं सतमें दिन आराम करू थू।

¹⁰प्रमात्मैं सब कम पूरै करनै थऊँ बाद आराम करू, तियां ही सबी प्रमात्मैं सोगी आराम करना गाणा जैहणै तियां अपणा कम पुरा करी बैहणा।

¹¹ता अहै भी तैस आरामा बाळी धरती मन्ज दाखल भूणै री पूरी कोशिश करन। अगर अहै इस्त्राएली मणु सांईयै प्रमात्मैं री आज्ञा रा पालन ना करू ता असु भी तैसा जगह मन्ज प्रवेश ना करी सकणा।

¹²क्ओकि प्रमात्मैं रा बचन जिन्दा अतै प्रभाव बाळा अतै हरेक दूँ धारी तलवारा थऊँ भी ज्यादा पेईना हा, सो प्राण अतै आत्मा, जोड़ा-जोड़ा अतै गुदै गुदै जो अलग करीके आर-पार बिणदा अतै मनां री भावना अतै विचारा जो जाँचदा।

¹³प्रमात्मां हर मणु रै बारै मन्ज सब कुछ जाणदा हा तसेरी नजरा थऊँ कुछ भी छिपुरा निय्आ तसेरै सामणै सब कुछ खुला हा अतै इन्दै सबी कमा जो हेरदा हा। असु सबीओ आक दिन प्रमात्मैं रै सामणै खड़ै भूणा अतै अपणा हिसाब दिणा पैणा।

¹⁴यीशु मसीह जैड़ा स्वर्ग गो हा सो प्रमात्मैं रा पुत्र हा अतै इन्दा महायाजक हा ठेरैतांये तैस विस्वास जो जैड़ा सबी सामणै अहै ग्रहण करू थू तैतिओ ना छड़न अतै तैस विस्वास मन्ज पक्कै रैहन।

¹⁵इन्दा महायाजक जैडा इन्दी कमजोरी जो समझदा हा क्ओकि तिनी तियां सबी परीक्षा जो सहू जैड़ी अहै सैहन्दै हिन, फिरी भी तिनी पाप ना करू।

¹⁶ता अईआ, अहै इन्दै अनुग्रहकारी प्रमात्मैं रै सिंहासना रै नेड़ै हिम्मता सितै चलन। तैड़ी असिओ प्रमात्मैं री दया मिलनी हा अतै तैस अनुग्रह जो पाणा जैड़ा जरूरत रै टैमैं इन्दी मदद करदा।