Read Gaddi इब्रानियों 5 Bible Online

इब्रानियों 5 - Gaddi bible

इब्रानियों 5

¹जैहणै प्रमात्मां महायाजक चुणदा हा ता सो अक्क मणु जो मणु थऊँ ही चुणदा हा। ऐस महायाजक जो मणु तांयै प्रमात्मैं री सेवा करना चहिन्दी हा, तैसिओ प्रमात्मैं जो भेंट चढ़ाणा अतै बलि चढ़ाणा चहिन्दी हा मणु रै पापा री माफी तांयै।

²ऐह महायाजक इन्या मणु सोगी कोमल भूच्ची सकदा हा जैड़ा प्रमात्मैं रै बारै मन्ज थोड़ा ही जाणदै हिन अतै तसेरै विरोधा मन्ज पाप करदै हिन। ऐह ठेरैतांये भूच्ची सकदा हा कि महायाजक अप्पू भी पाप री वजह थऊँ कमजोर हा।

³ठेरैतांये जरूरी हा कि सो अपणै अतै मणु रै पापा तांयै बलिदान चढ़ा।

⁴कोई मणु अपणै आप महायाजक बणनै रा आदर ना लेई सकदा, जैहणै तिकर कि हारून सांईं प्रमात्मैं री तरफा थऊँ ना चुणया गच्छा।

⁵तियां ही मसीह भी अपणै आपा रा आदर ना करू ऐह सोची करी कि सो अपणै आप महायाजक बणना। तैसिओ प्रमात्मैं रै द्धारा चुणुरा थू जिनी तैसिओ बल्लू कि; “तू मेरा पुत्र हा, अज अऊँ तेरा पिता बणी गो हा।”

⁶फिरी अक्क होर जगह प्रमात्मां दोबारा तैसिओ बलदा कि; “तू मलिकिसिदक सांईं सदा तिकर महायाजक हा।”

⁷जैहणै यीशु ऐसा धरती पुर थू तिनी प्रार्थना अतै बिनती चढ़ाई जोरा-जोरा सितै अतै हाख्री भरी-भरी करी प्रमात्मैं सितै जैडा कि तैस जो मौती थऊँ बचाई सकदा थू। प्रमात्मैं तसेरी प्रार्थना हुणी क्ओकि सो प्रमात्मैं रा बड़ा आदर करदा थू।

⁸यीशु मसीह प्रमात्मैं रा पुत्र थू फिरी भी तिनी दुख झेली-झेली करी आज्ञा मनणा सीखी।

⁹जैड़ा प्रमात्मां तैस थऊँ चाहन्दा थू सो तिनी सब कुछ पुरा करू ठेरैतांये अबै सो पूरी तरह थऊँ योग्य हा तियां सबी जो अनन्त काल तक उद्धार दिणै तांयै जैड़ा तसेरी आज्ञा रा पालन करदै हिन।

¹⁰प्रमात्मैं तैसिओ नियुक्त करूरा हा कि सो मलिकिसिदक महायाजक सांईयै इन्दा महायाजक बणा।

¹¹तसेरै बारै मन्ज असु जो मती सारी गल्ला करनी हिन, जिआंरा की समझाणा भी कठण हा अतै तुहै समझणै मन्ज भी ढिलै हिन।

¹²तुहै काफी टैमां थऊँ विस्वासी हिन अतै अबै ता तुसै होरी मणु जो सखाणै बाळै भूणा चहिन्‍दै थियै पर हालि भी ऐह जरूरी हा कोई तुसिओ प्रमात्मैं रै बचना री शुरू री गल्ला रै बारै मन्ज सखा। तुहै तियां बच्चै सांईयै हिन जियां जो अनाज ना बल्कि दुध ही चहिन्दा हा।

¹³क्ओकि दुध पिन्दै बच्चै जो भलै अतै बुरै रा ज्ञान निय्आ, क्ओकि सो ता बच्चा ही हा।

¹⁴पर अनाज तियां मणु तांयै हा जैड़ै स्याणै हिन क्ओकि तजुरबा करदै-करदै, भलै अतै बुरै रै बारै रा भेद करनै री समझ तियैं पाई लैऊरी हा।