Read Gaddi इब्रानियों 8 Bible Online

इब्रानियों 8 - Gaddi bible

इब्रानियों 8

¹अबै जैड़ी गल्ला अहै बल्लू करदै हिन तियां मन्ज सबी थऊँ बड़ी गल्ला ऐह हा कि इन्दा ऐसा महायाजक हा जैडा स्वर्गा पुर महिमामय प्रमात्मैं रै सिंहासना रै सज्जी कनारी गिच्ची बैहुरा।

²सो महायाजक सांईयै महापवित्र जगह मन्ज सेवा करदा हा अर्थात तैस सचै तम्बू मन्ज जैतिओ मणु रै हत्था सितै ना पर प्रभुऐ खडेरूरा हा।

³क्ओकि हर महायाजका जो भेंट अतै बलिदान चढ़ाणा भुन्दा हा, मसीह बलै भी कुछ भूणा चहिन्दा थू कुछ चढ़ाणै तांयै।

⁴अगर यीशु धरती पुर भुन्दा भी ता भी तैस याजक ना भूणा थू, ऐह ऐत तांई कि धरती पुर मूसा री व्यवस्था रै मुताबक भेंट चढ़ाणै बाळै महायाजक पैहलै थऊँ ही हिन।

⁵याजक जैस कमा जो करदै हिन सो अक्क स्वर्गा री चिजा री नकल अतै परछाई ही हा, ऐह मूसा सोगी भी इन्या ही थू जैहणै सो मिलाप बाळा तम्बू बणाणा लगा ता प्रमात्मैं तैस सोगी बल्लू “हरेक जैडा नमूना तिजो मैंई पहाड़ा पुर दस्सु हा तठेरै मुताबक बनाणै तांयै ध्यान रखणा।”

⁶पर अबै यीशु इन्दा महायाजक तैसिओ ऐसी सेवा दितुरी हा, जैड़ी पुराणी महायाजका रै कमा थऊँ ज्यादा खरी हा क्ओकि सो प्रमात्मैं सोगी नोए वायदै रा मध्यस्थ हा जैड़ी उतम वायदै पुर आधारित हा।

⁷क्ओकि अगर पैहला वायदा निर्दोष भुन्दा ता तठेरी जगह होर वायदा करनै री जरूरत ना पैन्दी।

⁸पर प्रमात्मां तियां पुर दोष लगाई करी बलदा कि; प्रभु बलदा कि, “हेरा सो दिन ईणैबाळै हिन कि मुँ इस्त्राएल[2] रै मणु सोगी, अतै यहूदा रै मणु सितै नौआ वायदा करना हा,

⁹ऐह वायदा सो जिन्‍ना ना भूणा हा, जैड़ा मैंई तंयारै पूर्वजा सोगी तैस टैमैं करूरा थू, जैहणै अऊँ तियां जो मिस्र थऊँ नकाळी लेई आ, क्ओकि सो मेरै वायदै पुर टिक्की ना रैह, अतै मैंई तिआंरी कोई परवाह ना करी” प्रभु ईयां ही बलदा हा।

¹⁰फिरी प्रभु बलदा कि; “जैड़ा नौआ वायदा मुँ ईणै बाळै टैमां मन्ज इस्त्राएल रै मणु सितै करना हा, सो ऐह हा कि मुँ अपणी व्यवस्था जो तंयारै मनां मन्ज पाणा, अतै तैतिओ तंयारै दिला पुर लिखणा अतै मुँ तंयारा प्रमात्मां ठहरना अतै सो मेरी जनता भूणी हा।”

¹¹“अतै हर कोई अपणै साथी यहूदी जो अतै अपणै भाई जो ऐह शिक्षा ना दिल्ला कि प्रभु जो पछैण क्ओकि हल्कै थऊँ बड़ै तिकर सबी मिन्जो जाणी लैणा।”

¹²“अऊँ तंयारै बुरै कमां रै बारै मन्ज दयावन्त हा अतै तंयारै पापा जो मुँ फिरी याद ना करना।”

¹³जैहणै प्रभु नौआ वायदै रै बारै मन्ज गल्ल करदा हा तठेरा मतलब ऐह हा कि पुराणा वायदै रा टैमं पुरा भूच्ची गो। जैड़ा कुछ पुराणा अतै बेकार हा सो जल्दी ही गायब भूच्ची गाणा हा।