Read Gaddi याकूब 1 Bible Online

याकूब 1 - Gaddi bible

याकूब 1

¹ऐह पत्री याकूब री तरफा थऊँ हा जैड़ा कि प्रमात्मैं रा अतै प्रभु यीशु मसीह रा दास हा। अऊँ ऐह पत्री यहूदी विस्वासी रै बारह गोत्रा लिखु करदा, जैड़ै कि पूरै संसार मन्ज तितर-बितर भूच्ची करी रैहन्दै हिन तियां जो मेरा नमस्ते।

²हे मेरै विस्वासी भाईओ, जैहणै तुसै कईआ किस्‍मां री परीक्षा मन्ज पैन

³ता ऐत जो पूरी आनन्द री गप्‍प समंझा, ऐह जाणी करी कि तून्दै विस्‍वासा जो परखणै थऊँ धीरज पैदा भुन्दा।

⁴पर तुसिओ सब कुछ सैहणै तांयें सिखणा चहिन्दा कि तुसै आत्मिक रूप सितै सिद्व भूच्ची गाहन अतै तूसु मन्ज कसी भी खरी गल्ला री कोई कमी ना रेय्आ।

⁵पर तूसु मन्ज अगर कसी जो अक्ल री घटी भोआ ता प्रमात्मैं थऊँ मगां ता सो बिना कोई फटकार सबी जो खुशी सितै दिन्दा अतै तैसिओ दी गाणीआ।

⁶पर विस्‍वासा सितै मंगा अतै कुछ शक मत करा क्ओकि शक करनै बाळा समुंद्र री लैहरा सांईं हा जैड़ी हवा सांईं चलदी अतै उछाळ लैन्दी हिन।

⁷इन्‍ना मणु जैड़ा शक करदा तैसिओ प्रभु थऊँ कुछ ना मुळना।

⁸ऐसा मणु फैसला ना करी पान्दा की प्रमात्मैं पिचो चलना कि ना चलना, ऐसै मणु बलदै ता हिन पर करदै ना हिन।

⁹विस्वासी जैड़ै गरीब हिन तियां जो ऐहा गल्ला पुर घमण्ड़ करना चहिन्दा कि प्रमात्मैं तियां जो किमती समझू हा।

¹⁰अतै विस्वासी जैड़ै अमीर हिन सो अपणै आपा पुर नम्रता री वजह थऊँ घमण्ड़ करन, क्ओकि अविस्वासी अमीर मणु रा धन घा रै फुल्ला सांईं मुरझाई गाणा।

¹¹जियां सूरजा निकळदै ही जोरा री धूप पैन्दी हा अतै घा जो हुकाई दिन्दीआ अतै तसेरा फूल झड़ी गान्दा अतै तसेरी शोभा चली गान्दीआ। इन्‍नी साहबै ही अमीर भी पैसै कमान्दै-कमान्दै मरी गाणा।

¹²धन्य हा सो मणु जैडा परीक्षा मन्ज टिक्की रैहन्दा क्ओकि तैस खरै निकळी करी सदा री जिन्दगी रा मुकुट पाणा जठेरा वायदा प्रमात्मैं अपणै प्‍यार करनै बाळै सोगी करूरा हा।

¹³जैहणै कसी री परीक्षा भोआ ता सो ऐह ना बल्ला कि मेरी परीक्षा प्रमात्मां करू करदा क्ओकि ना ता बुरी गल्ला थऊँ प्रमात्मैं री परीक्षा भूच्ची सकदी हा अतै ना ता सो कसी री परीक्षा अप्पू करदा।

¹⁴पर हर कोई अपणै मनां री इच्छा री कनारी खिन्जी करी तैत मन्ज फसी करी परीक्षा मन्ज पैन्दा।

¹⁵ऐह बुरी इच्छा री वजह थऊँ मणु पापी कमां जो जन्म दिन्दा हा, अतै जैहणै पाप ज्यादा वदि गान्दा हा ता सो मौत जो पैदा करदा हा।

¹⁶हे मेरै प्यारे विस्वासी भाईओ, धोखा मत खा।

¹⁷क्ओकि हरेक खरा अतै उत्तम दान पिता प्रमात्मां री कनारी थऊँ मुळदा जिनी स्वर्गा री हरेक ज्योती जो बणाऊरा, सो परछाई सांईयै ना बदलिन्दा सो सदा अटल रैहन्दा।

¹⁸तिनी अपणी ईच्‍छा रै मुताबक असु जो सच्चाई रै बचना सितै नोई जिन्दगी दिती हा, ताकि अहै विस्वासी तसेरी रचना मन्ज सबी थऊँ जरूरी हेस्सा बणी गान।

¹⁹हे मेरै विस्वासी भाईओ, ऐह गप्‍प तुसै जाणदै हिन, ऐत तांई हरेक मणु हुणनै मन्ज ध्यान करनै बाळा अतै बलणै मन्ज धीरज रखणै बाळा अतै गुस्सा करनै मन्ज देर करनै बाळा भोआ।

²⁰क्ओकि जैहणै मणु जो गुस्सा इन्दा ता प्रमात्मां जियां चाहन्दा तियां सो मणु धर्मी जिन्दगी ना जी सकदा।

²¹ऐत तांई सारै मनां रै मळा अतै बैर-वरोधा री बढ़ती जो दूर करीके प्रमात्मैं रै बचना जो नम्रता सितै मन्‍नी लेय्आ जैडा कि दिला मन्ज समाई दितुरा अतै जैडा तून्दै प्राणा रा उद्धार करी सकदा।

²²पर प्रमात्मैं रै बचना रा पालन करनै बाळै बणा अतै मात्र हुणनैबाळै ही ना जैड़ै कि अपणै आपा जो धोखा दिन्दै हिन।

²³क्ओकि जैडा कोई प्रमात्मैं रै बचना जो हुणनैबाळा हा अतै तैत पुर चलनै बाळा निआं ता सो मणु तैस मणु सांईं हा जैडा कि अपणै असली चेहरै जो शीसै मन्ज हेरदा।

²⁴ऐत तांई कि सो अपणै मुँहा जो हेरी करी चली गाहन्‍दा अतै बड़ा जल्दी भुली गाहन्‍दा कि मेरा मुँह किना थू।

²⁵पर जैडा मणु प्रमात्मैं री सिद्व व्यवस्था जैड़ी आजादी दिन्दी हा तैत पुर ध्यान करदा रैहन्दा तैस अपणै कमां मन्ज ऐत तांई आशीष पाणी हा कि सो हुणी करी ना पर तठेरै मुताबक ही कम करदा हा।

²⁶अगर कोई अपणै आपा जो भक्त समझा अतै अपणी जीभा पर रोक ना लगा पर अपणै मनां जो धोखा देय्आ ता तसेरी भक्ति व्यर्थ हा।

²⁷इन्दै पिता प्रमात्मैं रै नेड़ै शुद्ध अतै साफ भक्ति ऐह हा कि अनाथ अतै विधवा जनानी रै दुखा मन्ज तंयारा खयाल रखा अतै अपणै आपा जो संसार री बुराई थऊँ निष्कलंक रखा।