Read Gaddi याकूब 2 Bible Online

याकूब 2 - Gaddi bible

याकूब 2

¹हे मेरै विस्वासी भाईओ, तुहै इन्दै महिमायुक्त प्रभु यीशु मसीह रै चेलै हिन ठेरैतांये तूसु मन्ज पक्षपात ना भोआ।

²उदाहरण तांयें अगर अक्क मणु तूसु मन्ज सोना पैहनी करी अतै छैळ-छैळ कपड़ै पाई करी तुन्दी सभा मन्ज अईआ अतै अक्क गरीब भी मैइलै-कुचैएलै कपड़ै लाई करी अईआ।

³अतै तुसै तैस छैळ कपड़ै बाळै रा ज्यादा मान करीके बलन कि, “तुसै ओठी खरी जिनी जगहा बैहा,” अतै तैस गरीबा सितै बलन, “तू ऐठी खड़ी रै,” या फिरी कि “मेरै पैरा री पीढ़ी बलै थलै बैही रै।”

⁴ता कै तुसै अप्पू मन्ज भेद-भाव ना करू अतै बुरै विचार सितै न्याय करनै बाळै ना ठेहरै?

⁵मेरै विस्वासी भाईओ हुणा, प्रमात्मैं ऐस संसारा रै गरीबा जो चुणुरा कि विस्‍वासा मन्ज अमीर भून। अतै तैस राज्य रै अधिकारी बणन जठेरी सौगन्द प्रमात्मैं तियां सितै करूरी हा जैड़ै तैस सितै प्‍यार रखदै हिन।

⁶पर तुसै तैस कंगाला री बेईज्जती करीआ, कै अमीर मणु तूसु पुर अत्याचार ना करदै हिन? अतै सो ही तूसु जो कचैहरी मन्ज ना रगड़दै हिन?

⁷कै सो तैस महान नां यीशु मसीह री निन्दा ना करदै हिन जसेरै तुसै समझै गान्दै?

⁸फिरी भी जे तुसै पवित्रग्रन्था रै बचना रै मुताबक कि तू अपणै पड़ेही सोगी अप्पू सांईं प्‍यार रख, ता सचमुच तैसा राज्य व्यवस्था जो पूरी करदै हिन, ता खरा ही करदै हिन।

⁹पर जे तुसै पक्षपात करदै हिन ता पाप करदै हिन अतै व्यवस्था तूसु जो अपराधी ठहरान्दी हा।

¹⁰क्ओकि जैडा कोई सारी व्यवस्था जो मन्दा पर अक्की गल्ला मन्ज चूक करदा ता सो सबी गल्ला मन्ज दोषी ठहरदा।

¹¹ऐत तांई कि जिनी ऐह बल्लुरा कि, “तू व्यभिचार मत करना” तिनी ऐह भी बल्लुरा कि “तू हत्या मत करना,” अतै जे तैंई व्यभिचार ता ना करू पर हत्या करी ता भी तू व्यवस्था जो तोड़णै बाळा ठहरू।

¹²तू तियां मणु सांईं बचन बल्लै अतै कम भी करै जिआंरा न्याय आजादी री व्यवस्था रै मुताबक भूणा।

¹³क्ओकि जिनी दया ना करी तंयारा न्याय भी बिना दया रा भूणा, अगर तुहै होरी पुर दया करी हा ता प्रमात्मां भी तूसु पुर न्याय रै दिन दयावान भूणा।

¹⁴मेरै विस्वासी भाईओ, जे कोई बल्ला कि मिन्जो यीशु मसीह पुर विस्वास हा पर भलै कम ना करदा भोआ ता ऐत थऊँ के फायदा? कै ईना जिन्‍ना विस्वास तसेरा उद्धार करी सकदा?

¹⁵अगर कोई विस्वासी भाई या बैहण नगैं भून अतै तियां जो हर रोज खाणै री कमी भोआ।

¹⁶अतै तूसु मन्ज कोई तियां सितै बल्ला कि प्रमात्मां पुरा करला, तुसै गर्म रेय्आ अतै तृप्त रेय्आ, पर जैड़ी चिज तंयारै शरीरा तांई चैहिन्दा सो तुहै ना दीन ता कै फाईदा?

¹⁷तियां ही विस्वास भी अगर भलै कम्मा सोगी ना भोआ ता अपणै स्वभाव मन्ज मरूरा।

¹⁸अगर कोई बैहंस करदा कि मिन्जो विस्वास हा मिन्जो कमा री जरूरत निय्आ, ता मिन्जो दस कि तू अपणै विस्वास जो भलै कमा रै बिना कियां सावित करी सकदा हा, पर मुँ अपणा विस्वास अपणै भलै कमां सितै तिजो दसणा।

¹⁹तिजो विस्वास हा कि अक्क ही प्रमात्मां हा, तू ठीक बलदा, दुष्‍टात्मा भी विस्वास रखदी अतै थरथर कम्मदी हिन।

²⁰पर हे मूर्ख मणुआ कै तू ऐह भी नां जाणदा, कि भलै कम्मा बिना विस्वास बेकार हा?

²¹जैहणै इन्दै पूर्वज अब्राहमे अपणै पुत्र इसहाक जो वेदि पुर चढ़ाऊ ता प्रमात्मैं तैसिओ ऐस कमां सितै धर्मी ठहराऊ।

²²ता तैंई हेरी ही लैऊ हा कि विस्वासै तसेरै कमां सितै मिलीकरी असर दसु अतै कमां सितै विस्वास सचा सावित भुआ।

²³अतै पवित्रग्रन्था रा ऐह बचन पुरा भुआ कि अब्राहमे प्रमात्मैं पुर विस्वास रखू ठेरैतांये अब्राहम प्रमात्मैं री नजरा मन्ज धर्मी बणी गो अतै सो प्रमात्मैं रा मित्र समझिया गो।

²⁴ता तुसै हेरी लैऊ कि मणु मात्र विस्‍वासा सितै ही ना पर भलै कमां सितै भी धर्मी ठहरदा हा।

²⁵इन्‍नी साहबै ही राहाब वेश्या भी थी जैहणै तैसै दूता जो अपणै घरै शरण दिती अतै तियां जो दुऐ रस्तै मितै विदा करू ता सो अपणै तैस कमां सितै धर्मी ठहरी।

²⁶ऐस तरीकै जियां शरीर सांस बगैर मरूरा हा तियां ही विस्वास भी कम्मा बिना मरूरा हा।