Read Gaddi याकूब 5 Bible Online

याकूब 5 - Gaddi bible

याकूब 5

¹हे धनवान मणु हुणी ता लेय्आ, तुसै अपणै-अपणै क्‍लेशा पुर जोरा सितै रूण कळत पा।

²तून्दा धन नष्‍ट भूच्ची गो अतै तून्दै कपड़ै जो कीड़ै खाई गै।

³तून्दै सोनै-चान्दी पुर काई लगी गैई हा अतै तैसा काई तून्दै बारै मन्ज गवाई दिणी हा जैहणै प्रमात्मैं तून्दा न्याय करना। प्रमात्मैं तुसिओ दण्ड दिणा क्ओकि तुसै आखरी युगा मन्ज धन इकट्ठा करूआ।

⁴हेरा, जिऐ मजदूरै तून्दै खेता री फसल कटी तिआंरी सो मजदूरी जैड़ी तुसै धोखै सितै रखी लेई सो जोरा सितै डडू करदै हिन अतै बटोळने बाळै री पुकार, सेना रै प्रमात्मैं हुणी लेई हा।

⁵तुसै धरती पुर भोग-विलास मन्ज ही लगी रै अतै बड़ा ही सुख भोगू। जियां भैड़ा जो मोटा ताजा करया गान्दा कि तैहा जो बड़ाया गच्छा तियां ही तुहै भी अपणै आपा जो ईयां तैयार करू करदै पर तुहै ना जाणदै कि अक्क दिन प्रमात्मैं तून्दा ईयां ही कठोरता सोगी न्याय करना।

⁶तुसै धर्मी जो दोषी ठहराई करी मारी दिता, तैस तून्दा सामना ना करी पाणा।

⁷ता हे विस्वासी भाईओ, प्रभु रै ईणै तिकर धीरज रखा, जियां किसान धरती पुर किमती फळा पकणै तक पैहलै अतै आखरी बरखा तक धीरज रखदा हा।

⁸तुसै भी तियां ही धीरज रखा अतै अपणै दिला जो मजबुत करा क्ओकि प्रभु रा दोबारा फिरी ईणा नेड़ै हा।

⁹हे विस्वासी भाईओ अक्की दुऐ पुर दोष मत ला ताकि तुसै भी दोषी ना ठैहरन, हेरा न्याय करनै तांयें यीशु ता जल्दी ईणै बाळा हा।

¹⁰हे विस्वासी भाईओ जिऐ भविष्‍यवक्तै प्रभु रै नां सितै गल्ला करी, तियां जो दुख झेलनै अतै धीरज रखणै रा अपणै तांई आर्दश समझा।

¹¹हेरा, अहै धीरज धरनै बाळै जो धन्य बलदै हिन, तुसै अय्यूब रै धीरजा रै बारै मन्ज ता हुणुरा ही भूणा अतै प्रभु री तरफा थऊँ जैडा इनाम मुळु तैत जो भी जाणी लैऊ हा, जैत थऊँ प्रभु री बड़ी ज्यादा करूणा अतै दया प्रकट भुन्दी हा।

¹²पर विस्वासी भाईओ सबी थऊँ खरी गप्‍प ऐ हा कि सौगन्द मत खान्दै ना ता स्वर्गा री अतै ना धरती री ना कसी होरी चिजा री पर तुन्दी गल्ल हाँ री हाँ मन्ज अतै ना री ना मन्ज भोआ कि तुसै प्रमात्मैं द्धारा सजा रै योग्य ना ठैहरन।

¹³अगर तूसु मन्ज कोई दुखी भोआ ता सो प्रार्थना करा जे खुश भोआ ता स्तुति भजन गा।

¹⁴जे तूसु मन्ज कोई रोगी भोआ ता कलीसिया रै स्याणै मणु जो हैदा अतै प्रभु रै नां सितै तेल मळी करी तैस तांई प्रार्थना करा।

¹⁵प्रार्थना करदै टैमैं विस्वासी प्रभु पुर विस्वास रखी करी प्रार्थना करनै सितै सो रोगी ठीक भूच्ची गाहणा अतै प्रभु तैस जो उठाली करी खरेडी दिणा अतै जे तिनी पाप भी करूरा भोआ ता तठेरी माफी भूच्ची गाहणी हा।

¹⁶ठेरैतांये तुसै अक्की दुऐ रै सामणै अपणै-अपणै पापा जो मनी लेय्आ अतै अक्की दुऐ तांई प्रार्थना करा जैत सितै ठीक भूच्ची गाहन, धर्मी मणु री प्रार्थना रै प्रभाव सितै मता कुछ भूच्ची सकदा।

¹⁷भविष्‍यवक्ता एलिय्याह भी ता असु सांईं दुख-सुख भोगी मणु थू, अतै तिनी गिड़-गिड़ाई सितै प्रार्थना करी कि बरखा ना भोआ अतै साढ़ै त्राई साला तिकर धरती पुर बरखा ना भूई।

¹⁸फिरी तिनी प्रार्थना करी अतै अम्बरा थऊँ बरखा भूई अतै धरती मन्ज पैदावार भूई।

¹⁹हे मेरै विस्वासी भाईओ, अगर तूसु मन्ज कोई सच्चाई रै रस्तै थऊँ भटकी गच्छा ता तैस जो कोई होर फेरी लेई अईआ।

²⁰ता ऐह गल्ल पक्का हा कि जैडा कोई कसकि भटकुरै पापी जो फेरी लैईला, सो अक्की प्राणा जो मौती थऊँ बचाणै बाळा भूणा अतै तसेरै पापा जो प्रमात्मैं थऊँ माफी दुआणै बाळा भूणा।