Read Gaddi 1 पतरस 2 Bible Online

1 पतरस 2 - Gaddi bible

1 पतरस 2

¹ठेरैतांये सब तरह रा बैरभाव अतै छल कपट अतै डाह अतै निन्दा जो दूर करा।

²जिन्या अक्क पैदा भच्छुरा बच्चा दुधा तांयै लालच करदा हा तुसिओ भी प्रमात्मैं रै बचना जो सिखणै री लालच करना चहिन्दा ताकि तुहै तसेरै द्धारा उद्धार पाणै तांयै बढ़दै गाहन।

³क्ओकि पवित्रग्रन्था मन्ज लिखुरा हा कि, “तुहै अनुभव करी लैऊरा कि प्रभु भला हा।”

⁴यीशु बलै अईआ, सो जिन्दा पत्थर जैसिओ मणुऐ ता निकम्मा बणाऊ पर प्रमात्मैं तैसिओ वेशकिमती समझी करी चुणी लैऊ।

⁵अतै जियां मणु पत्थरा सितै घर बणांदा, तियां ही प्रमात्मां सब विस्वासियों जोडु करदा कि अक्क ऐसा भवन बणा जैस मन्ज पवित्र आत्मा वास करी सकी। सो ऐसा ठेरैतांये करू करदा हा ताकि तुहै सब तियां याजका सामणै जैडा बलिदान चढांदै थियै, खरै कम्मा जो करी सकन क्ओकि यीशु मसीह असु सबी तांयै अपणी जान दितुरी हा।

⁶ऐसा वजह थऊँ पवित्रग्रन्था मन्ज भी लिखुरा हा कि, “हेरा, अऊँ यरूशलेम शहर मन्ज कोणै रा पत्थर रखदा हा, जैसिओ बड़ा आदर पाणै तांयै चुणया गच्छुरा हा। जैडा कोई तैस पुर विस्वास करला, सो कसी भी तरीकै सितै शर्मिदा ना भोला।”

⁷ऐह पत्थर तूसु विस्वासी तांयै ता बड़ा किमती हा पर जैड़ै विस्वास ना करदै तिन्या तांयै पवित्रग्रन्था मन्ज लिखुरा कि, “जैस पत्थर जो राजमिस्त्रीये निकम्मा ठहराऊ थू, सो कोणै रा सिरा भूच्ची गोआ,”

⁸अतै पवित्रग्रन्था मन्ज ऐह भी लिखुरा कि, “ऐह सो पत्थर हा जैत थऊँ मणु जो ठोकर लगणी हा अतै ऐह ही सो चट्टान हा जैसा मणु जो फैंकणा हा,” ऐह ठेरैतांये पैई गान्दै हिन क्ओकि तिन्यै प्रमात्मैं रै बचना जो मनणै थऊँ इन्कार करू। प्रमात्मैं तिन्या तांयै ऐह ही योजना बणाऊरी थी कि तिन्या सोगी इन्या ही भोआ।

⁹प्रमात्मां जैड़ा राजा हा तुहै तसेरै खास चुणुरै मणु हिन अतै तसेरै याजक हिन। तुहै प्रमात्मैं तांयै समर्पित अतै प्रमात्मैं रै अपणै मणु हिन। तिनी तुसिओ अंधकार थऊँ तसेरी अदभुत ज्योती मन्ज हैदु हा ताकि तुहै प्रमात्मैं रै अदभुत कमा जो मणु जो दस्सी सकन।

¹⁰तुहै पैहलै ता कुछ भी ना थियै पर अबै प्रमात्मैं री प्रजा हिन; पैहलै तूसु पुर प्रमात्मैं री दया ना पाऊरी थी पर अबै तुहै प्रमात्मैं री दया पाई लैऊरी हा।

¹¹हे प्यारेओ अऊँ तुसिओ चेतावनी दिन्दा कि तुहै अपणै आपा जो परदेसी अतै यात्री समझी करी तियां संसारिक अभिलाषा थऊँ जैड़ी आत्मा सोगी युद्ध करदी हिन, बची रेय्आ।

¹²गैर यहूदी मन्ज तून्दा चाल-चलन भला भोआ; ताकि जिंआं जिंआं गल्ला मन्ज सो तुसिओ कुकर्मी जाणी करी बदनाम करदै हिन, सो तून्दै भलै कम्मा जो हेरी करी तंयारी ही वजह थऊँ न्याय रै दिनै प्रमात्मैं री महिमा करन।

¹³प्रभु यीशु रै नां रा आदर करनै तांयै तुसिओ हरेक तैस मणु री आज्ञा रा पालन करना चहिन्दा जैड़ै ऐस संसार मन्ज अधिकारी हिन, खास करीके महाराजा जैड़ा सबी थऊँ उच्चै पद पुर हा।

¹⁴तुहै हाकमा री भी आज्ञा मनणा चहिन्दी क्ओकि महाराजा ही तिन्या जो नियुक्त करूरै हिन तिन्या दोषी जो दण्ड दिणै अतै खरै मणु री प्रशंसा करनै तांयै।

¹⁵प्रमात्मैं री इच्छा ऐह हा कि तुहै भलै कम करन, ताकि तुहै तिन्या मूर्ख मणु जो रोकी सकन जैड़ै तूसु पुर झूठै आरोप लगान्दै हिन अतै जैड़ै प्रमात्मैं जो ना जाणदै।

¹⁶तुहै आजाद ता हिन फिरी भी तुहै प्रमात्मैं रै दास हिन अतै तुसिओ गलत कम करीके अपणी आजादी रा गलत इस्तेमाल ना करना चहिन्दा।

¹⁷सबी मणु रा आदर करा, विस्वासी भाई सोगी प्रेम रखा, प्रमात्मैं थऊँ ड़रा अतै महाराजा रा आदर करा।

¹⁸हे दासो, तुहै अपणै स्वामी रै अधीन रेय्आ अतै तंयारा आदर करा, सिर्फ जैड़ै दयालु अतै खयाल रखणै बाळै हिन तंयारा ही ना पर जैड़ै कठोर हिन तंयारा भी।

¹⁹अगर तुहै सही कम करीके भी धीरज सोगी अन्याय जो सैहन्दै हिन ता प्रमात्मैं तूसु थऊँ खुश भूणा।

²⁰क्ओकि अगर तुहै अपराध करीके घूसै खान अतै धीरज रखन, ता ऐत मन्ज कै बड़ी गल्ल हा? पर अगर भला कम करीके दुख उठान अतै धीरज रखन, ता ऐह प्रमात्मैं जो खरा लगदा हा।

²¹क्ओकि प्रमात्मैं तुसिओ भलाई करनै तांयै हैदुरा हा, चाहे तुसिओ दुख सैहणा पैय्आ जैस तरीकै मसीह भी तूसु तांयै दुख जो सहू। सो तूसु तांयै आदर्श हा अतै तुसिओ तसेरै पद-चिन्ह पुर चलना हा।

²²जिन्या कि पवित्रग्रन्था मन्ज लिखुरा हा, “ना ता तिनी पाप करू, अतै ना ही तसेरै मुँहा थऊँ कोई छल री गल्ल निकळी।”

²³जैहणै मणुऐ यीशु मसीह रा अपमान करू तिनी फेरी करी तंयारा अपमान ना करू, जैहणै मणुऐ तैसिओ दुख दिता ता तिनी फेरी करी कोई बदला ना लैऊ, पर तिनी प्रमात्मैं पुर विस्वास रखू कि सो तसेरी मदद करा। सो जाणदा हा कि प्रमात्मैं मणु रा सही तरीकै न्याय करना हा।

²⁴मसीह इन्दै पापा रै बोझ जो अपणै ऊपर चुकी लैऊ, तैसिओ क्रूस पुर चढ़ाया गो ताकि अहै पाप करना बन्द करन अतै सही तरीकै जिन्दगी बिताणा शुरू करन; तसेरै ही मार खाणै थऊँ तुसिओ चंगाई मुळी हा।

²⁵क्ओकि पैहलै तुहै भटकुरी भैड़ा सांईयै थियै, पर अबै अपणै प्राणा रै रखवाळै अतै पाहला बलै फिरी आये हिन।