Read Gaddi 1 पतरस 3 Bible Online

1 पतरस 3 - Gaddi bible

1 पतरस 3

¹हे घरावाळिओ, अपणै-अपणै घरवाळै रै वशा मन्ज रेय्आ, ठेरैतांये कि अगर कुछ ऐसै घरावाळै भून जैड़ै बचना जो ना मन्दै भून,

²ता तुहै जैस तरीकै बचना रै अनुसार पवित्र अतै भक्ति भरी जिन्दगी बितान्दी हिन तिन्या ऐह हेरी करी मसीह यीशु मन्ज विस्वास करना शुरू करी दिणा।

³तून्दा सजणा-संवरना दिखावटी ना भोआ, मतलब बाल बणाणा, अतै सोनै रै गैहणै, या भाँति भाँति रै कपड़ै पैहनणा,

⁴बल्कि तून्दा छिपुरा अतै अन्दरूनी मनुष्यत्व, नम्रता अतै मना री दीनता री अविनाशी सजावटा सोगी सजी रेय्आ, क्ओकि प्रमात्मैं री नजरा मन्ज ठेरी बड़ी किमत हा।

⁵ऐस तरीकै ही पूराणै टैमां री पवित्र जनानी भी, जैड़ी प्रमात्मैं पुर उम्मीद रखदी थी, अपणै आपा जो ऐस तरीकै ही संवारदी अतै अपणै-अपणै घरवाळै रै अधीन रैहन्‍दी थी।

⁶जिंआं सारा अपणै घरावाळै अब्राहम री आज्ञा रा पालन करदी थी अतै तैसिओ स्वामी बलदी थी। ऐस तरीकै तुहै भी अगर भलाई करन अतै कसी गल्ला थऊँ ना डरन ता तहारी कुल्ळी कहलाणा।

⁷तियां ही हे घरावाळेओ, तुहै भी अपणी घरावाळी जो आदर देय्आ अतै अपणी घरावाळी सोगी समझ सोगी जिन्दगी निर्वाह करा। सो तूसु थऊँ कमजोर जरूर हा पर सो प्रमात्मैं रै नोई जिन्दगी रै वरदान मन्ज तून्दै सोगी बराबर सहभागी भी हिन। तैहा सोगी ऐसा व्यवहार करा कि तुन्दी प्रार्थना मन्ज कोई रूकावट ना अईआ।

⁸ता आखिर मन्ज अऊँ बलणा चाहन्दा कि तुहै सब अक्क मन भूच्ची करी दया सोगी भाईचारै सोगी प्रीति रखणैवाळै, अतै करूणामय, अतै नम्र बणा।

⁹बुराई रै बदलै बुराई मत करा अतै ना गाळी रै बदलै गाळी देय्आ; क्ओकि प्रमात्मैं तुसिओ हैदुरा हा कि तुहै होरी अशीर्वाद देय्आ ताकि तुहै भी प्रमात्मैं थऊँ अशीर्वाद पाई सकन।

¹⁰जिन्या पवित्रग्रन्था मन्ज लिखुरा हा कि, “जैडा कोई जिन्दगी मन्ज खुश रैहणा चाहन्दा हा, अतै खरै दिन हेरना चाहन्दा हा, सो अपणी जीभा जो बुराई थऊँ, अतै अपणै होंठा जो छल री गल्ला करनै थऊँ रोकी रखा।

¹¹सो बुराई रा साथ छड़ी देय्आ, अतै भलाई ही करा; सो मेल मिलाप जो तोपा, अतै तसेरै यत्न मन्ज रेय्आ।

¹²क्ओकि प्रभु अपणै धर्मी मणु पुर लगातार नजर रखदा हा, अतै तंयारी बिनती जो हुणनै तांयै तैयार रैहन्दा हा, पर प्रभु बुराई करनै बाळै सोगी ना रैहन्दा।”

¹³अगर तुहै भलाई करनै तांयै सदा तैयार हिन ता कोई तुसिओ नूकसान ना पुजाई सकदा।

¹⁴चाहे तुसिओ सही कम करनै रै द्धारा दुख भी उठाणा पैय्आ तांभी प्रमात्मैं तुसिओ ऐसा गल्ला तांयै इनाम दिणा ठेरैतांये चिन्ता मत करा अतै कसी री भी धमकी थऊँ मत ड़रा।

¹⁵पर अपणै दिला मन्ज मसीह तांयै आदर बणाई रखा अतै तैसिओ प्रभु रै रूपा मन्ज आदर देय्आ। हर टैमं तैयार रेय्आ तिन्या जो जवाव दिणै तांयै जैड़ै तुन्दी अन्दर री उम्मीद रै बारै मन्ज पूछदै हिन, पर ऐह सब कोमलता अतै आदर सोगी करा।

¹⁶अतै अपणै विवेक भी शुद्ध रखा, ठेरैतांये कि जिंआं गल्ला रै बारै मन्ज तुन्दी बदनामी भून्दिआ तंयारै बारै मन्ज सो, जैड़ै मसीह मन्ज तून्दै खरै चाल-चलन रा अपमान करदै हिन, लज्जित भून।

¹⁷अगर प्रमात्मैं री इच्छा ऐह हा कि तुहै भलाई करनै री वजह थऊँ दुख उठान, ता ऐह बुराई करनै री वजह थऊँ दुख उूठणै थऊँ खरा हा।

¹⁸ठेरैतांये कि मसीह जैड़ा धर्मी थू तिनी अधर्मी तांयें पाप री वजह थऊँ अक्क वरी दुख उठाऊ, ताकि असिओ प्रमात्मैं वलै पुजाई सका सो शरीरा थऊँ ता मारी दिता, पर आत्मा थऊँ जिय्आ गो।

¹⁹मसीह री आत्मा गिच्ची करी जैड़ी कैदी आत्मा थी तियां जो प्रचार करू।

²⁰ऐह सो आत्मा थी जिन्यै तैस बीतै टैमां मन्ज आज्ञा ना मनी, जैहणै प्रमात्मां नूह रै दिना मन्ज धीरज सोगी ठहरी रैऊ, अतै सो जहाज बणु करदा थू, जैत मन्ज बैही करी कुछ मणु मतलब अठ मणु बाढ़ रै पाणी मन्ज डुबणै थऊँ बची गै।

²¹सो बाढ़ रा पाणी बपतिस्मा रै सांईयै हा जैडा तुसिओ उद्धार दिणै तांयै प्रभावशाली हा, पर बपतिस्मा शरीरा रै मेल जो धूणै रै बारै मन्ज ना पर सो ऐह दर्शान्दा हा कि अक्क शुद्ध विवेक सोगी प्रमात्मैं री कनारी मुड़ा। यीशु मसीह मौत थऊँ जिन्दा भुआ ठेरैतांये प्रभावशाली हा।

²²सो स्वर्गा मन्ज गिच्ची करी प्रमात्मैं री खब्बी कनारी बैही गच्छुरा; अतै स्वर्गदूत, अधिकारी अतै सब सामर्थी तसेरै अधीन करै गै हिन।