Read Gaddi 2 पतरस 1 Bible Online

2 पतरस 1 - Gaddi bible

2 पतरस 1

¹ऐह पत्री शमौन पतरस री तरफ थऊँ हा जैडा यीशु मसीह रा दास अतै प्रेरित हा। अऊँ ऐह पत्री तुसिओ लिखु करदा जैड़ै असु सांईयै तैस किमती विस्वास रै सहभागी हिन। ऐह विस्वास तुसिओ दितुरा क्ओकि यीशु मसीह न्यायी हा जैड़ा इन्दा उद्धारकर्ता अतै प्रमात्मां हा।

²जिन्या तुहै इन्दै प्रमात्मां अतै प्रभु यीशु रै ज्ञान मन्ज बढ़दै गान्दै हिन अऊँ प्रार्थना करदा कि प्रमात्मां तुसिओ ज्यादा थऊँ ज्यादा अनुग्रह अतै शान्ती दिन्दा रेय्आ।

³प्रमात्मैं अपणै ईश्वरीय सामर्थ रै द्धारा असिओ सो सब कुछ दितुरा हा जैडा भक्ति भरी जिन्दगी जिणै तांयै जरूरी हा तसेरै ज्ञान रै द्धारा जिनी असिओ हैदुरा हा अपणी अदभुत महिमा अतै सदगुण मन्ज सहभागी भूणै तांयै।

⁴प्रमात्मैं अपणी महिमा अतै सदगुण री वजह थऊँ असिओ अदभुत अतै किमती वायदै दितुरै हिन ऐह वायदै मदद करदै हिन कि अहै तसेरै ईश्वरीय स्वभाव मन्ज सहभागी भूच्ची सकन अतै संसार री तैहा सड़ाहट थऊँ बच्ची सकन जैड़ी इन्दी बुरी अभिलाषा रै द्धारा भुन्दी हा।

⁵ऐसा वजह थऊँ तुहै सबी तरह री मेहनत करीके अपणै विस्‍वासा पुर सदगुण अतै सदगुण पुर समझ,

⁶अतै समझ पुर संयम, अतै संयम पुर धीरज, अतै धीरज पुर भक्ति,

⁷भक्ति पुर भाईचारै री प्रीति अतै भाईचारै री प्रीति पुर प्रेम बढ़ादैं गच्छा।

⁸तुहै प्रभु यीशु रै बारै मन्ज जाणदै हिन अतै अगर तुहै इन्या गल्ला मन्ज ही लगातार बददै गाहलै ता इन्या तुसिओ निकम्मे अतै निष्फल ना भूणा दिणा।

⁹क्ओकि जैस मणु मन्ज ऐह गल्ला ना भून सो अंधे मणु सांईयै हा अतै सो ऐहा गल्ला जो भुली गच्छुरा हा कि प्रमात्मैं तसेरै पापा जो माफ करूरा हा जैड़ै तिनी यीशु पुर विस्वास करनै थऊँ पैहलै करूरै थियै।

¹⁰ठेरैतांये हे विस्वासी भाईओ, ऐहा गल्ला जो सावित करनै तांयै कठण मेहनत करा कि तुहै तिन्या मणु मन्ज हिन जिन्या जो प्रमात्मैं हैदुरा अतै चुणुरा हा। इन्या गल्ला जो करदै रेय्आ ताकि तुहै विस्वास थऊँ कदी दूर ना भून।

¹¹फिरी प्रमात्मैं तून्दा इन्दै प्रभु अतै उद्धारकर्ता यीशु मसीह रै सदा काल रै राज्य मन्ज बड़ै आदर सोगी स्वागत करना।

¹²तुहै इन्या गल्ला जो पैहलै थऊँ जाणदै हिन अतै सखाऊरी गल्ला री सच्चाई मन्ज मजबुती सोगी खडुरै हिन फिरी भी मुँ इन्या गल्ला रै बारै मन्ज तुसिओ याद दुआन्दै रैहणा।

¹³अऊँ ऐह अपणै तांयें उचित समझदा कि जैहणै तक अऊँ जिन्दा हा, तैहणै तक तुसिओ याद दुआई करी उभारदा रैऊ।

¹⁴क्ओकि ऐह जाणदा कि मेरी मौत रा टैमं नेड़ै ईणै बाळा हा, जिंआं कि इन्दै प्रभु यीशु मसीह मिन्जो पुर प्रकट करूरा हा।

¹⁵ठेरैतांये मुँ ऐसी मेहनत करनिआ कि मेरै मरनै थऊँ बाद तुहै इन्या सबी गल्ला जो सदा तक याद करी सकन।

¹⁶जैहणै अहै प्रेरितै तुसिओ प्रभु यीशु मसीह रै दोबारा ईणै रै अतै तसेरी सामर्थ रै बारै मन्ज समाचार दस्सु थू, ता अहै तुसिओ चतुराई सोगी बणाऊरी कहाणी ना हुणाई, बल्कि अहै अप्पू ही यीशु मसीह री महिमा जो हेरूरा थू।

¹⁷जैहणै अहै प्रभु यीशु सोगी तैस पवित्र पहाड़ पुर थियै जैहणै पिता प्रमात्मैं तैसिओ आदर अतै महिमा दिता, ता तैस टैमैं स्वर्गा थऊँ प्रमात्मैं री ऐह आवाज आई, “ऐह मेरा प्यारा पुत्र हा, जैस थऊँ अऊँ खुश हा।” अहै अप्पू स्वर्गा थऊँ ऐसा आवाज जो हुणु।

¹⁹ठेरैतांये असिओ होर भी भरोसा हा तैस संदेश रै बारै मन्ज जैडा भविष्‍यवक्तै प्रचार करूरा थू। अगर तुहै तैत पुर ध्यान दिन्दै हिन ता तूसु खरा करना क्ओकि सो अक्क नैहरै मन्ज बलणै बाळै दीयै सांईयै हा, जैहणै तक यीशु दोबारा ना इन्दा अतै मसीह जैड़ा नूर रा तारा हा तून्दै दिला मन्ज ना चमकदा।

²⁰तुसिओ सबी थऊँ जरूरी ऐह जाणना हा कि बचन री कोई भी भविष्‍यवाणी कसी भविष्‍यवक्ता री अपणी समझ रै द्धारा पैदा ना भुन्दी,

²¹क्ओकि कोई भी भविष्‍यवाणी मणु री मर्जी थऊँ कदी भी ना भूई, पर भक्त जन पवित्र आत्मा री अगुवाई मन्ज प्रमात्मैं री तरफा थऊँ बलदै थियै।