Read Gaddi 1 यूहन्‍ना 1 Bible Online

1 यूहन्‍ना 1 - Gaddi bible

1 यूहन्‍ना 1

¹अऊँ यूहन्‍ना ऐह पत्री तैस आक रै बारै मन्ज तुसिओ लिखु करदा जैड़ा आदि थऊँ थू, जैहणै कुछ भी ना थू। ऐह सो ही हा जैतिओ अहै प्रेरितै हुणु जैहणै सो सखाऊ करदा थू। अहै तैसिओ हेरूरा हा, अहै ध्याना सोगी तैसिओ हेरूरा अतै छुऊरा, ऐह सो ही हा जिनी असिओ ऐह संदेश हणाऊरा जैड़ा मणु जो अनन्त जिन्दगी पाणै मन्ज मदद करदा हा।[1]

²(सो धरती पुर आ अतै अहै सो हेरू, अतै अहै ऐह स्पष्ट रूपा सितै घोषणा करदै हिन कि अहै जैसिओ हेरूरा हा ऐह सो ही जैड़ा आदि थऊँ ही थू। सो पैहलै पिता सोगी स्वर्गा मन्ज थू पर फिरी सो असु सोगी रैहणा धरती पुर आ)।

³जैड़ा कुछ अहै यीशु रै बारै मन्ज हेरू अतै हुणु तठेरा समाचार तूसु जो भी दिन्दै हिन ठेरैतांये कि तून्दा भी असु सोगी रिश्ता भूच्ची गच्छा अतै इन्दा ऐह रिश्ता पिता प्रमात्मां सितै अतै तसेरै पुत्र यीशु मसीह सोगी भी हा।

⁴अतै अहै ऐह गल्ला ऐत तांई लिखदै हिन कि तुन्दी खुशी पूरी भूच्ची गच्छा।

⁵जैडा समाचार अहै यीशु मसीह थऊँ हुणु, सो ही तुसिओ हुणादै हिन, सो समाचार ऐ हा कि प्रमात्मां ज्योती हा अतै तैत मन्ज जरा भी नैहरा (अर्थात बुराई) निआं।

⁶अगर अहै बलन कि, प्रभु सोगी इन्दा रिश्ता हा अतै फिरी भी बुराई करन, ता अहै झूठै हिन अतै सच्चाई पुर ना चलदै।

⁷पर जिआं प्रमात्मां ज्योती मन्ज हा तिआंई अहै भी ज्योती मन्ज चलन ता अक्की दुऐ सितै रिश्ता रखी सकदै हिन, अतै तसेरै पुत्र यीशु मसीह रा खून ईन्दै सारै पापा जो माफ करदा।

⁸अगर अहै बलन कि असु मन्ज कोई भी पाप निआं ता अहै अपणै आपा जो धोखा दिन्दै हिन अतै असु मन्ज कोई भी सच्चाई निआं।

⁹अगर अहै अपणै पापा जो मनी लैन ता सो इन्दै पापा जो माफ करनै अतै असु जो सबी अधार्मिकता थऊँ शुद्व करनै जो विस्वासयोग्य अतै धर्मी हा।

¹⁰अतै अगर अहै बलन कि अहै पाप ना करूरा ता प्रमात्मैं जो झूठा बणान्दै हिन अतै तसेरा बचन ग्रहण ना करूआ।