Read Gaddi 1 यूहन्‍ना 3 Bible Online

1 यूहन्‍ना 3 - Gaddi bible

1 यूहन्‍ना 3

¹सोचा, पिता प्रमात्मैं असु सितै किना प्‍यार करू कि अहै तसेरै बच्चै कहलान, अतै सच मन्ज अहै तसेरै बच्चै हिन भी, पर ऐह संसार रै मणु असु जो ना जाणदै, क्ओकि तियैं प्रमात्मैं जो भी ना जाणु।

²हे प्यारेओ, हल्ली तिकर अहै प्रमात्मैं री सन्तान हिन अतै हल्ली तिकर ऐह प्रकट ना भुआ कि असु कै कुछ भूणा! तूणा जाणदै हिन कि जैहणै तैस प्रकट भूणा ता असु भी तैस सांईयै ही भूणा, क्ओकि असु सो तिनां ही हेरना जिन्‍ना कि सो हा।

³अतै जैडा कोई मसीह पुर उम्मीद रखदा, सो अपणै आपा जो तियां ही पवित्र करदा जिन्‍ना कि मसीह हा।

⁴जैडा कोई लगातार पाप करदा रैहन्दा, सो व्यवस्था रा विरोधी हा अतै पाप करनै रा अर्थ हा प्रमात्मैं री व्यवस्था जो ना मनणा।

⁵अतै तुसै जाणदै हिन कि यीशु मसीह ठेरैतांये प्रकट भुआ कि पापा जो उठाई लेई गच्छा अतै प्रमात्मैं रै स्वभाव मन्ज पाप निआ।

⁶जैडा कोई यीशु मन्ज बणी करी रैहन्दा हा सो पाप ना करदा रैहन्दा अतै जैडा कोई पाप करदा तिनी ना ता यीशु जो हेरूरा अतै ना ही जाणुरा।

⁷हे प्यारेओ, कसी री भकाई मत लगा, जैडा धार्मिकता रै कम करदा सो ही मसीह सांईयै हा।

⁸जैडा कोई पाप करदा रैहन्दा सो शैतान री कनारी थऊँ हा क्ओकि शैतान शुरू थऊँ ही पाप करदा आ पर प्रमात्मैं रा पुत्र ठेरैतांये आ कि, शैतान रै कमां जो नाश करा।

⁹जैडा कोई प्रमात्मैं थऊँ पैदा भच्छुरा सो पाप ना करदा रैहन्दा, क्ओकि तैस मन्ज प्रमात्मैं रा बी बणी रैहन्दा हा अतै सो पाप करी ही ना सकदा क्ओकि सो प्रमात्मैं थऊँ पैदा भच्छुरा।

¹⁰ऐत थऊँ ही प्रमात्मैं री अतै शैतान री सन्तान रा पता चलदा, जैडा कोई धार्मिकता रै कम करदा सो प्रमात्मैं री तरफा थऊँ हा अतै सो भी जैडा कि अपणै भाई सितै प्‍यार रखदा।

¹¹जैडा समाचार तुसै शुरू थऊँ हुणुरा सो ऐह हा कि अहै अक्की दुऐ सितै प्‍यार रखन।

¹²अतै आदम रै पुत्र कैन सांईं ना बणन जैडा कि तैस शैतान थऊँ थू जिनी अपणै सक्‍कै भाई जो मारी दिता अतै तिनी कस व्जहा थऊँ मारू? ऐस व्जहा थऊँ कि कैन रै कम बुरै थियै अतै तसेरै भाई रै कम धार्मिक थियै।

¹³हे विस्वासी भाईओ अगर संसार तूसु सितै बैर रखा ता हैरानगी मत करदै।

¹⁴अहै जाणदै हिन कि अहै पैहलै आत्मिक रूप थऊँ मरूरै थियै पर अबै अहै आत्मिक रूप थऊँ जिन्दा हिन। अहै ऐह ठेरैतांये जाणदै हिन कि अहै अपणै विस्वासी भाई सितै प्‍यार करदै हिन, जैडा प्‍यार ना करदा सो आत्मिक रूप थऊँ मरूरा हा।

¹⁵जैडा कोई अपणै भाई सितै बैर रखदा सो हत्यारा हा अतै तुसै जाणदै हिन कि कसी हत्यारै मन्ज अनन्त जिन्दगी ना रैहन्‍दी।

¹⁶अहै प्‍यार ऐसा गल्ला थऊँ ही जाणु हा कि यीशु मसीह असु तांई अपणै प्राण दी दितै ठेरैतांये असु जो भी विस्वासी भाई तांई प्राण दिणा चहिन्‍दै।

¹⁷पर जैस कसी बल्लै संसारिक धन-दौलत भोआ अतै सो अपणै भाई जो कंगाल हेरा ता तैस पुर तरस ना खाणा चाह ता तैस मन्ज प्रमात्मैं रा प्‍यार कियां बणी करी रैई सकदा?

¹⁸हे प्यारेओ अहै बचना अतै जीभा सितै ही ना पर कमां अतै सच्चाई सितै भी प्‍यार जो सावित करन।

¹⁹जैहणै अहै होरी सोगी प्‍यार करलै तांही असु जो पता लगणा कि अहै सच्चाई रै हिन। जैसा गल्ला मन्ज इन्दा मन असु जो दोष देला, तैस दोष रै बारै मन्ज असु यीशु रै सामणै अपणै मनां जो तस्सली दी सकणा।

²⁰क्ओकि प्रमात्मां इन्दै मनां थऊँ बड़ा अतै सो सब कुछ जाणदा।

²¹हे मेरै प्यारेओ, अगर इन्दा मन असु जो दोष ना देय्आ ता असु जो प्रमात्मैं रै सामणै हिम्मत भुन्‍दीआ।

²²अतै अगर कुछ अहै मंगदै हिन, सो असु जो तैस थऊँ मुळदा क्ओकि अहै तसेरी आज्ञा जो मन्दै हिन अतै जैडा तैस जो पसन्द हा सो ही करदै हिन।

²³अतै पिता प्रमात्मैं री आज्ञा कि अहै तसेरै पुत्र यीशु मसीह पुर विस्वास करीके जिआं तिनी आज्ञा दितुरी हा तठेरै मुताबक अप्पू मन्ज प्‍यार रखन।

²⁴अतै जैडा प्रमात्मैं री आज्ञा जो मन्दा, सो मसीह मन्ज हा अतै सो तियां मन्ज बणी रहन्‍दा अतै तैस सितै मतलब तैसा पवित्र आत्मा सितै जैड़ी कि तिनी असु जो दितुरी हा, अहै जाणदै हिन कि मसीह असु मन्ज बणी रहन्‍दा।