Read Gaddi 1 यूहन्‍ना 4 Bible Online

1 यूहन्‍ना 4 - Gaddi bible

1 यूहन्‍ना 4

¹मेरै प्यारेओ, हरेक मणु रा विस्वास मत करा जैड़ा बलदा कि सो पवित्र आत्मा रै द्धारा गल्ला करदा हा, पर आत्मा री परख करा, कि सो प्रमात्मैं री तरफा थऊँ हा कि ना। क्ओकि बड़ै भारी झूठै भविष्‍यवक्ता संसारा मन्ज पैदा भूच्ची गच्छुरै हिन।

²प्रमात्मां री आत्मा जो तुसै इन्‍नी साहबै पछैणी सकदै हिन, कि जैड़ी कोई आत्मा मन्‍नी लैन्दी हा कि यीशु मसीह शरीर लेई करी आ ता सो प्रमात्मां री कनारी थऊँ हा।

³अतै जैड़ी कोई आत्मा यीशु री ऐसा सच्चाई जो ना मन्दी सो प्रमात्मैं री कनारी थऊँ निआं अतै सो ही ता यीशु मसीह रै विरोधी री आत्मा जठेरी चर्चा तुसै हुणी चुकुरै हिन कि सो ईणैबाळा अतै सो पैहलै थऊँ ही संसारा मन्ज हा।

⁴हे प्यारे बच्चेओ तुसै प्रमात्मैं रै मणु हिन अतै तुसै तियां झूठै नबी पुर जय पाई हा, क्ओकि जैड़ी पवित्र आत्मा री शक्ति तून्दै अन्दर हा सो शैतान री शक्ति थऊँ भी बदिकरी हा जैड़ा संसारा मन्ज हा।

⁵सो झूठै नबी संसारा रै हिन, ठेरी व्जहा थऊँ सो संसारिक गल्ला बल्‍दै हिन अतै संसार तिआंरी गल्ला हुणदा।

⁶अहै प्रमात्मैं रै हिन अतै जैड़ै प्रमात्मैं जो जाणदै हिन सो इन्दी हुणदै हिन अतै जैड़ै प्रमात्मैं जो ना जाणदै सो इन्दी ना हुणदै, इन्‍नी साहबै अहै सच्चाई जो प्रकट करनै री आत्मा अतै झूठ री आत्मा जो पछैणी सकदै हिन।

⁷मेरै प्यारेओ, अहै अप्पू मन्ज प्‍यार रखन क्ओकि प्‍यार प्रमात्मैं थऊँ हा अतै जैडा कोई होरी सोगी प्‍यार करदा सो प्रमात्मैं थऊँ पैदा भच्छुरा अतै प्रमात्मैं जो जाणदा।

⁸जैडा होरी सोगी प्‍यार ना करदा सो प्रमात्मैं जो ना जाणदा क्ओकि प्रमात्मां प्‍यार हा।

⁹जैडा प्‍यार प्रमात्मां असु सितै रखदा ठेरा पता ऐत थऊँ लगदा कि प्रमात्मैं अपणा अक्‍को ही अक्क पुत्र ऐस संसारा मन्ज भेज्‍जू कि अहै तसेरै कारण अनन्त जिन्दगी पान।

¹⁰सचा प्‍यार ऐह निय्आ कि अहै प्रमात्मैं सितै प्‍यार करू पर ऐत मन्ज कि तिनी असु सितै प्‍यार करू अतै इन्दै पापा जो मटाणै तांई अपणै पुत्रा जो बलिदान भूणै तांयें भैजु।

¹¹मेरै प्यारेओ, जैहणै प्रमात्मैं असु सितै इन्‍ना प्‍यार रखू हा ता असु जो भी अप्पू मन्ज प्‍यार रखणा चहिन्दा।

¹²प्रमात्मां कदी भी कुणी ना हेरू, जे अहै अप्पू मन्ज प्‍यार रखन ता प्रमात्मां असु मन्ज बणी रहन्‍दा अतै तसेरा प्‍यार असु मन्ज सिद्व भुच्‍ची गछूरा।

¹³ऐत थऊँ ही सावित भूच्ची गान्दा कि अहै मसीह मन्ज बणी रैहन्दै हिन अतै मसीह असु मन्ज क्ओकि तिनी अपणी आत्मा मन्ज असु जो दितुरा।

¹⁴अतै अहै पुत्र जो हेरी भी लैऊआ अतै गवाई भी दिन्दै हिन कि पिता प्रमात्मैं पुत्र यीशु जो संसारा मन्ज उद्धारकर्ता करीके भैजुरा हा।

¹⁵जैडा कोई ऐह मनी लैन्दा कि यीशु प्रमात्मैं रा पुत्र हा ता प्रमात्मां मसीह मन्ज बणी रहन्‍दा अतै सो प्रमात्मैं मन्ज।

¹⁶अतै जैडा प्‍यार प्रमात्मां असु सितै रखदा तैस जो अहै जाणी गै हिन अतै असिओ प्रमात्मैं पुर विस्वास हा। प्रमात्मां प्‍यार हा जैडा प्यारा मन्ज बणी रहन्‍दा सो प्रमात्मैं मन्ज बणी रहन्‍दा अतै प्रमात्मां तैस मन्ज बणी रहन्‍दा।

¹⁷ऐत थऊँ ही प्‍यार असु मन्ज सिद्व भुआ कि न्याय बाळै दिन असु जो हिम्मत भोआ, कि प्रमात्मैं असिओ सजा ना दीणी, क्ओकि जिन्‍ना यीशु हा तियां ही संसारा मन्ज असिओ भी रैहणा हा।

¹⁸प्यारा मन्ज कोई डरा बाळी गप्‍प ना भुन्‍दीआ बल्कि सिद्व प्‍यार डरा जो दूर करी दिन्दा कजो कि डरा रा सम्बन्ध सजा सोगी भुन्दा अतै जैडा कोई डर करदा सो प्यारा मन्ज सिद्व ना भुच्‍ची सकदा।

¹⁹अहै ठेरैतांये प्रमात्मैं अतै अक्की दूये सोगी प्‍यार करदै हिन कि पैहलै प्रमात्मैं असु सितै प्‍यार करू।

²⁰अगर कोई बल्ला कि अऊँ प्रमात्मैं सितै प्‍यार रखदा पर अपणै विस्वासी भाई सितै बैर रखा ता सो झूठा क्ओकि जैडा अपणै विस्वासी भाई सितै जैडा कि तिनी हेरूरा प्‍यार ना रखदा ता सो प्रमात्मैं सितै भी जैस जो तिनी हेरूरा निआं प्‍यार ना रखी सकदा।

²¹अतै प्रमात्मैं थऊँ असु जो ऐह आज्ञा मुळुरी हा कि जैडा कोई प्रमात्मैं सितै प्‍यार रखदा सो अपणै विस्वासी भाई सितै भी प्‍यार रखदा।