Read Gaddi 1 यूहन्‍ना 5 Bible Online

1 यूहन्‍ना 5 - Gaddi bible

1 यूहन्‍ना 5

¹जैस कसी जो ऐह विस्वास हा कि यीशु ही मसीह हा ता सो प्रमात्मैं थऊँ पैदा भच्छुरा अतै जैडा कोई पिता प्रमात्मां सितै प्‍यार रखदा सो तसेरै बच्चै सितै भी प्‍यार रखदा।

²जैहणै अहै प्रमात्मैं सितै प्‍यार रखदै हिन अतै तसेरी आज्ञा जो मन्दै हिन ता ऐत थऊँ ही अहै जाणदै हिन कि प्रमात्मैं री सन्ताना सितै प्‍यार रखदै हिन।

³प्रमात्मैं सोगी प्‍यार करना ऐह हा कि अहै तसेरी आज्ञा जो मनन; अतै तसेरी आज्ञा कठण ना हिन।

⁴क्ओकि हरेक प्रमात्मैं री औलाद ऐस दुष्‍ट संसारा पुर जय पान्दीआ अतै इन्दै विस्वास ही रै द्धारा अहै जय पान्दै हिन।

⁵संसारा पुर जय पाणै बाळा कुण हा? सिर्फ सो ही जसेरा विस्वास हा कि यीशु ही प्रमात्मैं रा पुत्र हा।

⁶यीशु मसीह ही प्रमात्मैं रा पुत्र हा ऐह ऐहा गल्ला थऊँ प्रकट भुन्दा कि जैहणै तिनी पाणी थऊँ बपतिस्मा लैऊ अतै क्रूस पुर खून बहाऊ थू।

⁷अतै जैडा गवाई दिन्दा सो पवित्र आत्मा हा, क्ओकि पवित्र आत्मा सचा हा।

⁸अतै गवाई दिणैबाळै त्राई हिन, पवित्र आत्मा, बपतिस्मा रा पाणी अतै यीशु रा खून, त्रोई अक्की गल्ला पुर ही सहमत हिन कि यीशु प्रमात्मैं री तरफा थऊँ छूरा।

⁹जैहणै अहै मणु री गवाई मन्‍नी लैन्दै हिन ता प्रमात्मैं री गवाई ता ऐत थऊँ बधी करी हा अतै प्रमात्मैं अपणै पुत्रा रै बारै मन्ज गवाई दितुरी हा।

¹⁰जैडा कोई प्रमात्मैं रै पुत्र पुर विस्वास करदा सो अपणै आपा मन्जा ही गवाई रखदा, जिन्‍नी प्रमात्मैं पुर विस्वास ना करू तिनी तैस जो झूठा ठहराऊ, क्ओकि तिनी तैसा गवाई पुर विस्वास ना करू जैड़ी प्रमात्मैं अपणै पुत्रा रै बारै मन्ज दितुरी थी।

¹¹अतै सो गवाई ऐह हा कि प्रमात्मैं असु जो अनन्त जिन्दगी दितुरीआ अतै ऐह जिन्दगी तसेरै पुत्रा रै द्धारा ही मिलदी हा।

¹²जैड़ा पुत्रा सोगी करीबी रिश्ता रखदा तैस बल्लै अनन्त जिन्दगी हा अतै जसेरा प्रमात्मैं रै पुत्रा सोगी रिश्ता निय्आ ता तैस बल्लै अनन्त जिन्दगी भी निआं।

¹³ऐह चिट्ठी अऊँ तुसिओ लिखु करदा जैड़ै प्रमात्मैं रै पुत्र यीशु मसीह रै नां पुर विस्वास करदै हिन कि तुसै जाणी लैन कि अनन्त जिन्दगी तुन्दी ही हा।

¹⁴अतै असु जो प्रमात्मैं रै सामणै इन्‍नी हिम्मत भून्दिआ सो ऐह हा कि अहै तसेरी इच्छा रै मुताबक कुछ मंगदै हिन ता सो इन्दी हुणदा।

¹⁵अतै जैहणै अहै जाणदै कि जे कुछ अहै प्रमात्मैं थऊँ मन्गदै हिन ता सो इन्दी हुणदा ता ऐह भी जाणदै हिन कि जैडा कुछ अहै तैस थऊँ मन्गु सो असु जो मुळु भी हा।

¹⁶अगर कोई अपणै विस्वासी भाई जो इन्‍ना पाप करदै हेरा कि जैतै सो प्रमात्मैं थऊँ अलग ना भोआ ता सो तैस तांई प्रार्थना करा, ता प्रमात्मैं तैसिओ जिन्दगी दिणिआ। अतै ऐसा पाप जैतै सो प्रमात्मैं थऊँ सदा काल तांई दूर भुन्दा, तठेरै बारै मन्ज अऊँ बिनती करनै जो ना बल्‍दा।

¹⁷सब कुछ जैड़ा प्रमात्मैं रै विरूद्ध हा पाप हा, पर हरेक बुरी चिज असिओ प्रमात्मैं थऊँ सदा अलग ना करी सकदी।

¹⁸अहै जाणदै हिन कि जैडा प्रमात्मैं थऊँ पैदा भच्छुरा सो पाप ना करदा रैहन्दा पर प्रमात्मैं रै पुत्र यीशु पैदा भच्छुरा सो तैस जो बचाई रखदा शैतान तैस जो छुई भी ना पान्दा।

¹⁹अहै जाणदै हिन कि अहै प्रमात्मैं थऊँ हिन अतै सारा संसार तैस शैतान रै वशा मन्ज हा।

²⁰अतै ऐह भी जाणदै हिन कि प्रमात्मैं रा पुत्र यीशु मसीह ऐस संसारा मन्ज चली छूरा अतै तिनी असु जो समझ दितुरी हा कि अहै तैस सच्चै प्रमात्मैं जो पछैणन। अहै तैस मन्ज जैडा कि सचा हा मतलब तसेरै पुत्र यीशु मसीह मन्ज बणी रैहन्दै हिन सचा प्रमात्मां अतै अनन्त जिन्दगी ऐह ही हा।

²¹हे बच्चेओ, अपणै आपा जो मूर्ति थऊँ बचाई रखा जैड़ी तून्दै दिला मन्ज प्रमात्मैं री जगह लैन्दी हिन।