Read Gaddi 3 यूहन्‍ना 1 Bible Online

3 यूहन्‍ना 1 - Gaddi bible

3 यूहन्‍ना 1

¹ऐह पत्री यूहन्‍ना री तरफा थऊँ हा जैडा विस्वास मन्ज स्याणा हा, अऊँ ऐह पत्री अपणै प्यारे मित्र गयुस जो लिखु करदा जैस सितै अऊँ सचा प्‍यार करदा।

²मेरै प्यारे मित्र, अऊँ ऐह प्रार्थना करदा हा कि, जिआं तू आत्मिक उन्‍नति करू करदा तियां ही तू सबी गल्ला मन्ज उन्‍नति करा अतै भला चंगा रेय्आ।

³जैहणै साथी विस्वासी मिन्जो बल्लै आये अतै तिऐं तेरै बारै मन्ज ऐह दस्सु की तू बफादारी सोगी सच्चाई रै अनुसार जिऊ करदै हिन ऐह हुणी करी अऊँ बड़ा खुश भुआ।

⁴जैहणै भी अऊँ ऐह हुणदा हा कि जैड़ै मणु मेरै बच्चै सांईयै हिन सो प्रमात्मैं री सच्चाई रै अनुसार जिन्दगी जिऊ करदै हिन सो मिन्जो बड़ै खुश करी दिन्दै हिन।

⁵मेरै प्यारे मित्र तैंई इन्दै विस्वासी साथी जैड़ै सफर करीके प्रचार करदै हिन अतै जिन्या मणु जो तू ना जाणदा तंयारी भी तैंई बफादारी सोगी बड़ी मदद करूरी हा।

⁶तिन्यै ऐठीआ री कलीसिया जो तेरै प्रेम भरी मित्रता रै बारै मन्ज दसुरा हा। तू ऐसै शिक्षक री मदद करदा रैह जैत सोगी प्रमात्मां खुश भुन्दा हा।

⁷क्ओकि सो तैस यीशु रै बचना रा प्रचार तांयै निकळुरै हिन अतै सो अविस्वासी थऊँ कोई मदद ना लैन्दै हिन।

⁸ठेरैतांये असिओ इन्या मणु री मदद करना चहिन्दी हा ताकि सो जैड़ा सच्चाई जो फैलाणै रा कम करू करदै हिन अहै भी तिन्या सोगी सहभागी भूच्ची सकन।

⁹मैंई अपणी पत्री मन्ज तून्दै इलाकै री कलीसिया रै विस्वासी तांयै कुछ लिखुरा थू पर दियुत्रिफेस जैड़ा मेरी लिखुरी गल्ला पुर ध्यान ना दिणा चाहन्दा क्ओकि सो अप्पू कलीसिया रा अगुवा बनणा चाहन्दा हा।

¹⁰पर जैहणै मुँ ईणा तैहणै मुँ साफ तरीकै तसेरै तियां बुरै कमां रै बारै मन्ज जैड़ै सो करू करदा अतै जैड़ा झूठ सो इन्दै बारै मन्ज बल्लू करदा तठेरै बारै मन्ज गल करनी हा। ऐतना ही ना पर सो तिन्या सफर करीके प्रचार करनै बाळै शिक्षक जो कलीसिया मन्ज ईणा ना दिन्दा अतै होरी मणु जो भी तंयारी मदद करनै थऊँ मना करदा। अतै अगर कोई तंयारी मदद करना चाहन्दा ता सो तिन्या जो कलीसिया थऊँ बाहर कड़ड़ी दिन्दा।

¹¹मेरै प्यारे मित्र, बुराई तांयै ना, पर भलाई रै पिचो चलनै बाळै बणा। जैडा भलाई करदा सो प्रमात्मैं री कनारी थऊँ हा पर जैडा बुराई करदा तिनी प्रमात्मैं जो ना जाणदा।

¹²देमेत्रियुस रै बारै मन्ज कलीसिया मन्ज सब मणु बलदै हिन कि सो अक्क खरा मणु हा क्ओकि सो सच्चाई रै अनुसार जिन्दा हा, अहै भी ऐह जाणदै हिन कि सो अक्क खरा मणु हा।

¹³अऊँ तिजो मता कुछ लिखणा ता चाहन्दा थू पर सियाई अतै कलम सितै ना लिखणा चाहन्दा।

¹⁴मिन्जो उम्मीद हा कि मुँ तिजो सोगी बड़ी तोळै ही मुळना ता असु आमणै-सामणै गल-बात करलै।

¹⁵अऊँ प्रार्थना करदा हा कि प्रमात्मैं री तरफा थऊँ तिजो शान्ती मुलदी रेय्आ। ऐठीआ रै विस्वासी मित्र तिजो नमस्कार करदै हिन तैड़ीआ रै विस्वासी मित्रा जो नां लेई-लेई करी इन्दी तरफा थऊँ नमस्कार बल्ली दिन्यै।