Read Gaddi यहूदा 1 Bible Online

यहूदा 1 - Gaddi bible

यहूदा 1

¹ऐह पत्री यहूदा री तरफ थऊँ हा जैडा यीशु मसीह रा सेवक अतै याकूब रा भाई हा। अऊँ तिन्या सबी जो लिखु करदा हा जिन्या जो पिता प्रमात्मैं हैदुरा जैड़ा तूसु सोगी प्रेम रखदा हा अतै यीशु मसीह री रखवाली मन्ज तुसिओ सम्भाळी रखदा हा।

²अऊँ प्रार्थना करदा कि प्रमात्मां तुसिओ दया, शान्ती अतै प्रेम भरपुरी सोगी देय्आ।

³हे विस्वासी भाईओ अऊँ उत्सुकता सोगी तुसिओ लिखणा चाहन्दा थू तैस उद्धार रै बारै मन्ज जैत मन्ज अहै सहभागी हिन। पर अबै मिन्जो लगु करदा कि अऊँ कुछ होर लिखीकरी तूसु सोगी बिनती करूं कि तुहै तैस विस्वास री रक्षा करन जैड़ा प्रमात्मैं अपणै पवित्र मणु जो सदा जो दितुरा हा।

⁴अऊँ ऐसा ठेरैतांये बल्लू करदा हा कि कुछ अधर्मी मणु चुप-चाप तुन्दी कलीसिया मन्ज चली छुरै हिन जैड़ै ऐह सखान्दै हिन कि प्रमात्मैं रा अदभुत अनुग्रह असिओ ऐह इजाजत दिन्दा हा कि अहै पापी जिन्दगी जी सकन। ऐसै मणु रै विनाश रै बारै मन्ज पैहलै थऊँ ही पवित्रग्रन्था मन्ज लिखुरा हा क्ओकि इन्यै इन्दै इकलोतै मालक अतै प्रभु यीशु मसीह रा इन्कार करूरा हा।

⁵हालांकि तुसै ईयां गल्ला जो जाणी चुकुरै हिन फिरी भी अऊँ तूसु जो ईयां गल्ला री याद दोआणा चाहन्दा कि प्रमात्मैं इस्त्राएली मणु जो मिस्र देशा री गुलामी थऊँ छुड़ानै रै बाद प्रमात्मैं पुर विस्वास ना करनै बाळै रा नाश करी दिता।

⁶अऊँ तुसिओ तिन्या स्वर्गदूता रै बारै मन्ज याद दुआंदा जैड़ै तैस अधिकार री सीमा मन्ज ना रैह जैड़ा प्रमात्मैं तिन्या जो दितुरा थू अतै तैहा जगह जो छड़ी दिता जैड़ी तंयारी अपणी थी। प्रमात्मैं तिन्या जो तैस महान अन्तिम न्याय रै दिन तक पक्कै तरीकै बनी करी अंधकार री जेला मन्ज रखूरा हा।

⁷सदोम, अमोरा अतै तंयारै अखै-ब्रखा रै नगर जो मत भूलदै जैड़ै हर तरह री बुराई अतै व्यभिचार सोगी भरूरै थियै। इन्या नगरा रा अगी सोगी नाश करया गो, अतै प्रमात्मैं री न्याय री अनन्त अग असु तांयै ऐह चेतावनी हा।

⁸ऐस तरीकै ही अधर्मी मणु ऐह भी दावा करदै हिन कि प्रमात्मैं तिन्या जो दर्शना मन्ज बलुरा हा कि सो अपणै शरीरा जो अशुद्ध करी सकदै हिन पापी जिन्दगी जिणै रै द्धारा, अतै सो बलदै हिन कि तिन्या पुर कसी जो अधिकार रखणै री जरूरत निय्आ अतै सो महिमा सोगी भरूरै स्वर्गदूता जो भी भला बुरा बलदै हिन।

⁹प्रधान स्वर्गदूत मीकाएल भी ऐसा ना करू जिन्या ऐह अधर्मी मणु करू। जैहणै शैतान स्वर्गदूत मीकाएल सोगी बैहंस करू करदा थू कि कस बलै अधिकार हा भविष्‍यवक्ता मूसा रै शरीरा जो दफनाणै तांयै ठेरै बावजूद की मीकाएल बलै इन्या अधर्मी मणु थऊँ ज्यादा अधिकार हा फिरी भी तिनी शैतान जो अपमान भरी गल्ला ना बली तिनी सिर्फ ऐतना बल्लू कि, “प्रमात्मां ही तिजो झिड़का।”

¹⁰पर ऐह अधर्मी मणु बुरी भाषा रा इस्तेमाल करदै हिन जिआं गल्ला जो ना समझी पान्दै तिन्या गल्ला जो भी बुरा बलदै हिन। सो जंगली जानवरा सांईयै अतै कुछ सोचै समझै बिना ऐसै कम करदै हिन तिन्या जरूर प्रमात्मैं थऊँ दण्ड़ पाणा हा।

¹¹हाय हा तियां पुर! कि तिन्यै आदम रै पुत्र कैन सांईयै बुरा व्यवहार करू जिनी अपणै भाई जो मारी दितुरा थू। तिन्यै बिलाम सांईयै जल्दी मन्ज सो ही गलती करी अतै मणु जो पैसा कमाणै तांयै पाप करनै मन्ज अगुवाई करी। जिन्या कोरह नाश भूआ क्ओकि तिनी मूसा रै विरोध मन्ज विद्रोह करू, इन्या मणु रा भी ऐस तरीकै नाश भूणा हा क्ओकि ऐह प्रभु रै विरोध मन्ज विद्रोह करू करदै हिन।

¹²जैहणै अहै प्रभु रै प्रेम जो याद करदै हिन ता ऐह मणु तुन्दी सोगी तून्दै तिथा-त्यौहारा मन्ज खान्दै — पिन्दै हिन। ऐह मणु समुंद्र री गहराई मन्ज छिपुरै पहाड़ा सांईयै हिन जैड़ै तुसिओ डुबाई सकदै हिन। ऐह तिन्या वेशर्म पाहला सांईयै हिन जैड़ै होरी री ना पर अपणी ही सोचदै हिन। ऐह अम्बरा मन्ज तिन्या बदळा सांईयै हिन जैड़ै कोई बरखा ना दिन्दै। ऐह पतझड़ रित रै तिन्या रूखा सांईयै हिन जैड़ै दूनी तरह सितै मरूरै हिन क्ओकि सो फलदै ना हिन अतै जड़ा थऊँ भी पुटी गच्छुरै हिन।

¹³ऐह समुंद्र री तिन्या डरोणी लैहरा सांईयै हिन जैड़ी गन्दै झाग जो पैदा करदी हिन तिन्या ही ऐह मणु भी शर्मनाक कमा जो करदै हिन। ऐह तिन्या तारै सांईयै हिन जैड़ै सिधै रस्तै पुर ना चलदै अतै ना ही कसी जो सही रस्ता दसी पान्दै, प्रभु अंधकार भरूरी ऐसी जगह इन्या मणु तांयै रैहणै जो तैयार करूरी हा जैड़ी तिन्या सदा तांयै रैहणा हा।

¹⁴हनोक जैडा कि आदम री सतवीं पीढ़ी रा थू, तिनी इन्या अधर्मी मणु रै बारै मन्ज भविष्‍यवाणी करूरी थी तिनी बल्लू, “प्रभु अक्क दिन अपणै अणगिणत पवित्र स्वर्गदूता सोगी जरूर ईणा।

¹⁵ताकि सो सबी मणु रा न्याय करा, अतै तिन्या अधर्मी मणु जो दोषी ठहरा जिन्यै सब बुरै अतै पापी कमा जो करूरा थू अतै जिन्यै प्रमात्मैं रै बारै मन्ज अपमान भरी गल्ला बलुरी थी।”

¹⁶ऐह अधर्मी मणु सदा कुड़कुड़ करदै रैहन्दै हिन, अतै तिन्या सोगी जैड़ा कुछ भुन्दा सो तैत तांयै प्रमात्मैं जो दोषी ठहरान्दै हिन। सो अपणी इच्छा अनुसार बुरै कमा जो करदै हिन अतै अपणै आपा रा घमण्ड़ करदै हिन। सो दूये री तरीफ करनै रा ढोंग करदै हिन ताकि सो तिन्या थऊँ सो पाई सकन जैड़ा सो चाहन्दै हिन।

¹⁷पर मेरै प्यारे विस्वासी भाईओ, तुसै तियां गल्ला जो याद रखा, जिआं जो इन्दै प्रभु यीशु मसीह रै प्रेरित पैहलै ही बल्ली चुकुरै हिन।

¹⁸सो तूसु सितै बल्लू करदै थियै कि, “इन्दै प्रभु यीशु मसीह रै दोबारा ईणै थऊँ पैहलै ऐसै मणु भूणै हिन जिन्या प्रभु रा अतै प्रभु रै मणु रा अपमान करना। ऐह ऐसै मणु भूणै जंयारी जिन्दगी तंयारी अभिलाषा रै वशा मन्ज भूणी हा।”

¹⁹ऐह ऐसै मणु हिन जैड़ै अपणी शरीरिक इच्छा रै अनुसार चलदै हिन अतै तिन्या मन्ज पवित्र आत्मा निय्आ।

²⁰मेरै प्यारे विस्वासी भाईओ तुहै अक्की दूये जो अति पवित्र विस्वास मन्ज उन्‍नति करनै तांयै मदद करा। तुसिओ ऐसी प्रार्थना करना चहिन्दी जैड़ी पवित्र आत्मा री अगुवाई रै अनुसार भोआ।

²¹प्रभु यीशु मसीह रै दोबारा ईणै तक अपणै आपा जो प्रमात्मैं रै प्रेम मन्ज बणाई रखा ताकि तुसिओ अनन्त जिन्दगी मुळी सका जठेरी तुहै भाळ करू करदै हिन क्ओकि तिनी असु पुर दया करूरी हा।

²²जिन्या मणु जो ना पता कि कसा शिक्षा पुर विस्वास करना चहिन्दा तंयारी मदद करा।

²³जैतना भूच्ची सकदा हा तिन्या मणु जो जैड़ै नरक री अगी री कनारी चलुरै हिन झपटी करी बचाई लेय्आ अतै तियां पुर दया करा। सावधान रेय्आ कि तुहै भी तिन्या पापा जो ना करन, तुहै तंयारै पापा थऊँ नफरत करा जैड़ै तिन्या जो कलंकित करदै हिन।

²⁴प्रमात्मां तुसिओ बचाई सकदा कि तुहै तैस पापी जिन्दगी रै द्धारा धोखै मन्ज ना पैन अतै सो अपणी महिमामय हजुरी मन्ज तुसिओ निर्दोष बणाई करी खुशी सोगी खरेडी सकदा हा।

²⁵सो ही एकमात्र प्रमात्मां हा जिनी असिओ यीशु मसीह रै कमा रै द्धारा बचाऊ हा। तैस अक्कमात्र प्रमात्मैं तांयै, इन्दै उद्धारकर्ता यीशु मसीह री महिमा, गौरव, पराक्रम अतै अधिकार सदा काल थऊँ हा, अबै भी भोआ अतै युगा-युगा तक भुन्दा रेय्आ। आमीन।