Read Gaddi प्रकाशित वाक्य 1 Bible Online

प्रकाशित वाक्य 1 - Gaddi bible

प्रकाशित वाक्य 1

¹ऐसा कताबा मन्ज सो गल्ला लिखुरी हिन जैड़ी प्रमात्मैं यीशु मसीह जो दसी ताकि सो अपणै दासा जो दसी सका कि ईणै बाळै टैमां मन्ज कै कुछ भूणै बाळा हा। फिरी मसीह अपणै स्वर्गदूता जो यूहन्‍ना बलै ऐस संदेश जो हुनाणै तांयै भैजु।

²फिरी यूहन्‍ना सो बचन जैड़ै प्रमात्मैं री तरफा थऊँ थियै अतै यीशु मसीह तैसिओ बलै थियै तिनी हेरी-हुणी अतै ऐसा कताबा मन्ज लिखै।

³प्रमात्मैं तिन्या सबी जो आशीष दिणी हा जैड़ै इन्या भविष्‍यवाणी रै बचना जो होरी जो पढ़ी करी हुणान्दै हिन अतै तिन्या जो भी आशीष दिणी हा जैड़ै ऐतिओ हुणी करी मन्दै हिन, क्ओकि ऐह सब भूणै रा टैमं बड़ा ही नेड़ै हा।

⁴ऐह पत्री यूहन्‍ना री तरफा थऊँ आसिया परदेस री सत कलीसिया तांयै हा। तैस थऊँ अनुग्रह अतै शान्ती तुसिओ मुळा; जैडा हा, जैडा सदा थू अतै जैडा ईणैबाळा हा; अतै तिन्या सत आत्मा री तरफा थऊँ जैड़ी तसेरै सिंहासन रै सामणै हिन।

⁵यीशु मसीह री तरफा थऊँ तुसिओ दया अतै शान्ती मुळदी रेय्आ जैडा विस्वासयोग्य गवाह हा। यीशु मसीह सो पैहला हा जिनी मौत पुर जय पाई अतै सो सबी धरती रै राजै रा भी अधिकारी हा। मसीह असु सोगी प्रेम रखदा हा, अतै तिनी अपणै खूना रै द्धारा असिओ पापा थऊँ छुड़ाऊरा हा।

⁶मसीह असिओ अपणी प्रजा अतै अपणै पिता प्रमात्मैं तांयै याजक बणाई दिता। तैसिओ युगायुग सब आदर अतै महिमा मुळदी रेय्आ। आमीन।

⁷हेरा सो बदळा रै ऊपर ईणैबाळा हा अतै हरेक मणु तैसिओ हेरना, अतै तिन्या मणु भी हेरना जिन्यै तैसिओ मारूरा थू, अतै धरती रै सबी कुला तैस तांयै विलाप करना। हाँ। आमीन।

⁸प्रभु प्रमात्मां बलदा हा “अऊँ ही अल्फा अतै ओमेगा हा, जैडा हा अतै जैडा थू अतै जैडा ईणैबाळा हा, अऊँ सर्वशक्तिमान प्रमात्मां हा।”

⁹अऊँ यूहन्‍ना तून्दा विस्वासी साथी जैड़ा मसीह रै दुखा मन्ज तूसु सोगी सहभागी हा अतै प्रमात्मैं रै राज्य अतै तैस दुखा मन्ज भी जैतिओ अहै धीरज सोगी सैहन्दै हिन। मिन्जो प्रमात्मैं रै बचन रा प्रचार अतै यीशु री गवाही री वजह थऊँ पतमुस नां रै टापू मन्ज अक्क कैदी बणाई करी भैजु।

¹⁰सो प्रभु रा दिन थू जैहणै अऊँ पवित्र आत्मा मन्ज आराधना करू करदा थू ता अचानक मैंई तुरही सांईयै अक्क बड़ी आवाज हुणी।

¹¹तिनी मिन्जो सोगी बल्लू जैड़ा कुछ तिजो हुजु करदा तैतिओ कताबा मन्ज लिखीकरी सत शहरा री सत कलीसिया इफिसुस, स्मुरना, पिरगमुन, थुआतीरा, सरदीस, फिलदिफीया, अतै लौदीकिया जो भैजी दे।

¹²ता मैंई तैसिओ, जैडा मिंजो सोगी बल्लू करदा थू, हेरनै तांयें अपणा मुँह फेरू; अतै पिचो मुड़ीकरी मैंई सोनै रै सत दीपदान हेरै।

¹³तियां दीपदान रै मन्जै मैंई मणु रै पुत्रा सांईयै हुजणै बाळै अक्क मर्दा जो हेरू जैडा पैरा तक अक्क चोळा अतै छाती पुर सोनै रा पटका बनी करी खडूरा थू।

¹⁴तसेरा सिर अतै बाळ चिटी ऊन अतै बर्फ सांईयै चमकदार थियै, अतै तसेरी हाख्री अगी री लपटा सैईयें थी।

¹⁵तसेरै पैर जियां कि भठी मन्ज तपाऊरा खरै पितळी सांईयै चमकदार थियै, अतै तसेरा बोल बडै पाणी री आवाज सांईयै थू।

¹⁶तिनी अपणै सिधै हत्था मन्ज सत तारै लैऊरै थियै, अतै तसेरै मुआँ थऊँ पैनी दोधारी तलवार निकळंदी थी। तसेरा मुँह ऐत्रा चमकुरा थू, जियां सूरज कड़ी धूपा मन्ज चमकदा हा।

¹⁷जैहणै मैंई तैसिओ हेरू ता तैहणै अऊँ तसेरै पैर पुर डरा रै मारै मुरदै मणु सांईयै पैई गो पर तिनी मिंजो पुर सिधा हथ रखी करी बल्लू, “मत डर; अऊँ ही पैहला अतै आखरी हा।

¹⁸अऊँ जैड़ा सदा जिन्दा रैहणै बाळा हा, अऊँ मरी गच्छुरा थू, अतै अबै जिन्दा हा अतै युगा-युग तांयै जिन्दै रैहणा। अतै मौत अतै अधोलोक री चाबी मिंजो बलै हिन,

¹⁹ठेरै तांयें जैड़ी गल्ला तैंई हेरूरी हिन अतै जैड़ी गल्ला भूचु करदी हिन अतै जैड़ी गल्ला ऐस थऊँ बाद भूणैबाळी हिन, तियां सबी जो ऐसा कताबा मन्ज लिखी लै।

²⁰मुँ तिजो तियां सत तारै रै बारै मन्ज जैड़ै तैंई मेरै सिधै हत्था मन्ज हेरूरै थियै अतै तिन्या सत दीपदान रा भेद साफ तरीकै दसणा। ऐह सत तारै तिन्या सत कलीसिया रै स्वर्गदूत हिन अतै सत दीपदान सत कलीसिया हिन।