Read Gaddi प्रकाशित वाक्य 10 Bible Online

प्रकाशित वाक्य 10 - Gaddi bible

प्रकाशित वाक्य 10

¹फिरी मैंई अक्क होर शक्तिशाली स्वर्गदूता जो बदला सोगी घिरूरै स्वर्गा थऊँ ओसदै हेरू। तसेरै सिरा रै चारो तरफ पुर मेघधनुष थू। तसेरा मुँह सूरजा सांईयै चमकदार अतै तसेरै पैर अगी रै खंभै सांईयै थियै।

²तसेरै हत्था मन्ज अक्क हल्की जिनी कताब थी। तिनी अपणा सज्जा पैर समुंद्र पुर अतै खब्बा पैर धरती पुर रखू,

³अतै ऐसै जोरा सितै चिलाऊ, जियां शेर गरजदा; अतै जैहणै सो चिलाऊ ता सत बरी गर्जन भूई, अतै ऐसै शब्द बलै जैड़ै मिन्जो समझ आये।

⁴जैहणै अऊँ ऐह गर्जन भरै शब्द हुणी बैहु ता अऊँ लिखणै बाळा थू, पर मैंई स्वर्गा थऊँ ऐह बोल हुणु, “जैड़ी गल्ला गर्जना रै तियां सत शब्दा मन्ज हुणी हिन तियां जो गुप्त रख, अतै मत लिख।”

⁵जैस स्वर्गदूता जो मैंई समुंद्र अतै धरती पुर खडुरै हेरू थू, तिनी अपणा सज्जा हत्थ स्वर्गा री कनारी चुकु अतै सौगन्द खाई,

⁶जैडा युगायुग जिन्दा हा, जिनी स्वर्ग, धरती, समुंद्र जो अतै जैडा कुछ तैत मन्ज सब बणाऊरा, तिनी बल्लू “अबै होर देर ना भूणी।”

⁷जैहणै सतमें स्वर्गदूता अपणी तुरही बजाणी हा ता प्रमात्मैं री गुप्त योजना तैस सुसमाचार रै अनुसार पूरी भूणी हा जैड़ा तिनी अपणै दास भविष्‍यवक्ता जो दसुरा थू।

⁸जैस शब्दा जो मैंई स्वर्गा थऊँ बलदै हुणु थू, सो फिरी मिंजो सोगी गल्ला करना लगू, “गा, जैडा स्वर्गदूत समुंद्र अतै धरती पुर खडूरा हा, तसेरै हत्था मन्ज खुलुरी कताबा जो लेई लै।”

⁹मैंई स्वर्गदूता बलै गिच्ची करी बल्लू, “ऐह हल्की कताब मिंजो दे।” तिनी मिंजो सोगी बल्लू, “लै, ऐतिओ खाई लै, ऐह तेरै मुँहा मन्ज मखीरा सांईयै मिट्ठी लगणी हा पर तेरा पेट कड़वा भूच्ची गाणा।”

¹⁰ता अऊँ सो हल्की कताबा जो स्वर्गदूता रै हत्था थऊँ लेई करी खाई गो। सो मेरै मुँहा मन्ज मखीरा सांईयै मिट्ठी ता लगी पर जैहणै अऊँ तैतिओ खाई गो, ता मेरा पेट कड़वा भूच्ची गो।

¹¹ता मिंजो सोगी ऐह बलया गो, “तिजो मतै सारै मणु, जाति, भाषा, अतै राजा रै बारै मन्ज फिरी भविष्‍यवाणी करनी पैणी हा।”