Read Gaddi प्रकाशित वाक्य 14 Bible Online

प्रकाशित वाक्य 14 - Gaddi bible

प्रकाशित वाक्य 14

¹फिरी मैंई नजरा चुकी करी हेरू, सो मेम्ना सिय्योन पहाड़ा पुर खडूरा हा, अतै तैस सोगी अक्क लख चौताळी हजार जिणै खडुरै हिन, जंयारै मत्थै पुर तसेरा अतै तंयारै पिता रा नां लिखुरा हा।

²फिरी स्वर्गा थऊँ मिन्जो ऐसा बोल हुणुआ जैडा पाणी री बड़ी धारा अतै बड़ा गड़गड़ात थू, अतै जैडा बोल मैंई हुणु सो ऐसा थू, मना वीणा बजाणैवाळै वीणा बजाऊ करदै हिन।

³अक्क लख चौताळी हजारा मणु अतै चंऊर प्राणी अतै स्याणै सिंहासन रै सामणै खडुरै थियै। सो अक्क नौआ गीत गाऊ करदै थियै, जैड़ा सिर्फ ऐह ही मणु सीखी सकदै थियै अतै पूरी धरती मन्ज सिर्फ ऐह ही मणु हिन जंयारा छुटकारा भच्छुरा हा।

⁴ऐह सो मणु हिन जंयारी जिन्दगी पवित्र हा अतै इन्यै कदी व्यभिचार ना करूरा। इन्यै मेम्नै रै अलावा होर कसी री भी आराधना ना करी अतै ऐह मेम्नै रै ही पिचो चलदै हिन। ऐह अक्क लख चौताळी हजार मणु सो मणु हिन जिन्या जो प्रमात्मैं अतै मेम्नै री भेंट तांयै संसार थऊँ छुडाया गो।

⁵तंयारै मुँहा थऊँ कदी भी झूठ ना निकलूरा थू, सो निर्दोष हिन।

⁶फिरी मैंई अक्क होर स्वर्गदूता जो अम्बरा मन्ज ऊड़दै हेरू, जैस वलै धरती पुर रैहणैवाळै री हरेक जाति, कुल, भाषा, अतै मणु जो हुनाणै तांयें सनातन सुसमाचार थू।

⁷तिनी बड़ै शब्दा मन्ज बल्लू, “प्रमात्मैं थऊँ डरा, अतै तसेरी महिमा करा, क्ओकि तसेरा न्याय करनै रा टैमं चली आ, अतै तसेरा भजन करा, जिनी स्वर्ग, धरती, समुंद्र अतै पाणी रै झरनै बणाऐ।”

⁸फिरी ऐत थऊँ बाद अक्क होर, दुआ स्वर्गदूत ऐह बलदा आ, “पैई गो, सो बड़ा बेबीलोन पैई गो, जिनी अपणै व्यभिचार रै कोपा सोगी भरूरी शराब सबी जाति जो पियाऊरा।”

⁹फिरी ऐत थऊँ बाद त्रिया स्वर्गदूत बड़ी जोरै जोरै ऐह बलदा आ, “जैडा कोई तैस पशु री अतै तसेरी मूर्ति री पूजा करला, अतै अपणै मत्थै या अपणै हत्था पुर तसेरी मोहर ला,

¹⁰प्रमात्मैं तिन्या जो अक्क ऐसी कड़बी चिज पीणै जो दिणी हा जैत मन्ज कोई मिलावट ना भूणी ठेरा मतलब ऐह हा कि तसेरा क्रोध तिन्या पुर बिना दया रै भूणा, तिन्या मणु जो अग अतै गन्धक मन्ज सताया गाणा अतै पवित्र स्वर्गदूता अतै मेम्नै तैसा पीड़ा जो हेरना जैड़ी प्रमात्मैं मणु जो दिणी हा।

¹¹तसेरी पीड़ा रा धूँ युगायुग उठदा रैहणा, अतै जैडा तैस पशु अतै तसेरी मूर्ति री पूजा करदै हिन, अतै जैड़ै तसेरै नां री मोहर लांदै हिन, तियां जो दिन रात चैन ना मुळना।”

¹²ऐस तरीकै री घटना भूणैबाळी हिन ठेरैतांये पवित्र मणु जो धीरज बाळै भूणा चहिन्दा अतै ऐह ही सो मणु हिन जैड़ै प्रमात्मैं री आज्ञा जो मन्दै अतै यीशु पुर विस्वास रखदै हिन।

¹³फिरी मैंई स्वर्गा थऊँ ऐह शब्द हुणु, “ऐह लिख धन्य हिन सो मणु जैड़ै अबै थऊँ लेई करी प्रभु मन्ज विस्वास करनै थऊँ बाद मरदै हिन।” फिरी पवित्र आत्मा बलदा, “हाँ, तिन्या धन्य ठेरैतांये भूणा कि तिन्या अपणी कठण मेहनत सोगी आराम पाणा, अतै अपणै कमा अनुसार प्रमात्मैं थऊँ इनाम पाणा।”

¹⁴मैंई अपणी नजरा चुकी करी हेरू, अक्क सफेद बदळ हा, अतै तैस बदळा पुर मणु रै पुत्रा सांईयै कोई बैहुरा हा, जसेरै मुण्ड़ा पुर सोनै रा मुकुट अतै हत्था मन्ज दराटी हा।

¹⁵फिरी अक्क होर स्वर्गदूतै मन्दरा थऊँ निकळी करी तैस सोगी, जैडा बदळा पुर बैहुरा, बड़ी जोरा सोगी बल्लू, “अपणी दराटी लगाई करी कटाई कर, क्ओकि कटाई रा टैमं चली आ हा, ठेरैतांये कि धरती री खेती पकी चुकुरी हा।”

¹⁶ता जैडा बदळा पुर बैहुरा थू तिनी धरती पुर अपणा दराटी लगाई, अतै धरती री फसला री कटाई करी गई।

¹⁷फिरी अक्क होर स्वर्गदूत तैस मन्दरा थऊँ निकळू जैडा स्वर्गा मन्ज हा, अतै तैस वलै भी तेज दराटी थी।

¹⁸फिरी अक्क होर स्वर्गदूत, जैसिओ वेदि पुर धूप जलाणै री जिम्मेवारी थी, निकळू, अतै जैस वलै तेज दराटी थी तिनी जोरा सितै बल्लू, “अपणी तेज दराटी लगाई करी धरती री अंगुरा री बैल रै गुच्छै कटी लै, क्ओकि तसेरी दाख पकी चुकुरी हा।”

¹⁹ता तिनी स्वर्गदूतै धरती पुर अपणी दराटी चलाई अतै धरती री अंगुरा री बैल रा फळ कटीकरी अपणै प्रमात्मैं रै प्रकोप रै बड़ै रसकुण्ड़ा मन्ज पाई दिता, ठेरा अर्थ ऐह हा कि प्रमात्मैं बड़ी ही सख्त सजा दिणैबाळा हा।

²⁰अतै नगरा रै बाहर तैस रसकुण्ड़ा मन्ज दाख दरड़ै, अतै रसकुण्ड़ा मन्ज ऐतना खून निकळू कि घोड़ै री लगाम तक पुजी गो, अतै सो त्राई सौ किलोमिटर तक चली गो।