Read Gaddi प्रकाशित वाक्य 15 Bible Online

प्रकाशित वाक्य 15 - Gaddi bible

प्रकाशित वाक्य 15

¹फिरी मैंई स्वर्गा मन्ज अक्क होर बड़ा अतै अनोखा चिन्ह हेरू, मतलब सत स्वर्गदूत जिंआं बलै सत आखरी मुसिवता थी, क्ओकि तंयारै खत्म भूच्ची गाणै थऊँ बाद प्रमात्मैं रै प्रकोप रा अन्त हा।

²ता फिरी मैंई अगी सोगी मिलुरा शीसै रै समुन्द्रा सांईयै कुछ हेरू अतै जैड़ै मणु तैस पशु पुर, तसेरी मूर्ति पुर अतै तसेरै नां रै अंक पुर जयवन्त थियै, तियां जो तैस शीसै रै समुंद्र रै नेड़ै प्रमात्मैं री वीणा जो लैऊरै खडुरै हेरू।

³सो प्रमात्मैं रै दास मूसा रा गीत जैड़ा मेम्नै रै बारै मन्ज हा गाई गाईकरी बल्लू करदै थियै, “हे सर्वशक्तिमान प्रभु प्रमात्मैं, तेरै कम महान अतै अनोखै हिन; हे युग-युग रै राजा, जैड़ा कुछ तुहै करदै हिन ठीक अतै सच हा”।

⁴“हे प्रभु, कस तिजो थऊँ ना डरना अतै तेरै नां री महिमा ना करला? क्ओकि सिर्फ तू ही पवित्र हा। सबी जाति ईच्ची करी तेरै सामणै प्रणाम करना, क्ओकि तेरै न्याय रै कम प्रगट भुएै हिन”।

⁵ऐत थऊँ बाद मैंई स्वर्गा रा मन्दर खुलुरा हेरू जैड़ी प्रमात्मैं री हजुरी रा तम्बू हा।

⁶अतै सो सत स्वर्गदूत जिंआं बलै सत मुसिवता थी, मलमल रै शुद्ध अतै चमकदार कपड़ै लाई करी अतै छाती मन्ज सोनै री पट्टी वनी करी मन्दरा थऊँ निकळै।

⁷ता तियां चंऊर प्राणी थऊँ अक्कीयै तियां सत स्वर्गदूता जो प्रमात्मैं रै प्रकोप थऊँ भरूरै सोनै रै सत कटोरै दितै,

⁸अतै प्रमात्मैं रै तेज अतै तसेरी सामर्थ री वजह थऊँ मन्दर धूयें सोगी भरी गोआ, अतै जैहणै तक तियां सत स्वर्गदूता री सत मुसिवता खत्म ना भूई तैहणै तक मन्दरा मन्ज कोई ना गिच्ची सकू।