Read Gaddi प्रकाशित वाक्य 2 Bible Online

प्रकाशित वाक्य 2 - Gaddi bible

प्रकाशित वाक्य 2

¹“इफिसुस शहर री कलीसिया रै दूत जो ऐह लिख, जिनी सत तारै जो अपणै सिधै हथा मन्ज लैऊरा हा, अतै सोनै री सत दीपदान रै मन्जै फिरदा हा, सो ऐ बलदा हा कि,

²‘अऊँ तेरै कम, तेरी मेहनत, अतै तेरै धीरजा जो जाणदा हा। अऊँ ऐह भी जाणदा कि तू बुरै मणु जो जैड़ै कि गलत शिक्षा दिन्दै हिन ना सही सकदा। तैंई तिन्या जो परखी करी जाणी लैऊ हा कि सो झूठै हिन जैड़ै अपणै आपा जो प्रेरित बल्‍दै हिन पर सच मन्ज प्रेरित ना हिन।

³तैंई धीरज सोगी मिन्जो तांयै दुख सहू अतै हार ना मनी।

⁴पर मिन्जो तेरै विरोधा मन्ज ऐह शिकायत हा कि तैंई अपणा पैहलै सांईयै प्रेम छड़ी दितुरा हा।

⁵तू याद कर कि तू शुरूआत मन्ज मिन्जो सोगी किन्‍ना प्रेम करदा थू पर अबै तू तिन्या प्रेम ना करदा हा, ठेरैतांये पापा थऊँ अपणा मन फेर अतै पैहलै जिन्‍ना प्रेम करना शुरू कर। अगर तू मना जो ना फेरला ता मुँ फिरी ईच्ची करी तिजो सजा दिणी हा अतै दीपदान जो तठेरी जगह थऊँ हटाई दिणा।

⁶पर हाँ, तिजो मन्ज ऐ गल ता खरी हा कि तू नीकुलियों[1] रै कम्मा थऊँ नफरत करदा हा, जियां थऊँ अऊँ भी नफरत करदा हा।’”

⁷“कना खोली करी मेरी गल्ला हुणी लेय्आ कि पवित्र आत्मा कलीसिया सितै कै बलदा हा. जैडा जय पान, मुँ तैसिओ तैस जीवन रा रूखा थऊँ जैडा प्रमात्मां रै स्वर्गलोका मन्ज हा, फळ खाणै जो दिणा।”

⁸“स्मुरना शहर री कलीसिया रै दूत जो ऐह लिख, अऊँ पैहला अतै आखरी हा, अऊँ मरी गच्छुरा थू, अतै अबै जिन्दा हा अतै युगा-युग तांयै जिन्दै रैहणा, अऊँ ऐ बलदा हा कि,

⁹अऊँ जाणदा हा कि तू क्‍लेश सहू करदा अतै तू गरीब हा पर आत्मिक तौर पुर तू अमीर हा। अऊँ तिन्या मणु जो जाणदा हा जैड़ै ऐह बलदै हिन कि सो यहूदी हिन जैड़ै प्रमात्मैं रै चुणुरै मणु हिन पर असल मन्ज सो ना हिन। सो तेरै बारै मन्ज बुरी गल्ला बलदै हिन, पर सो तैहा मण्ड़ळी रै सदस्य हिन जैडा शैतान री हा।

¹⁰जैड़ै दुख तिजो सैहणै पैणै तियां थऊँ मत डर। क्ओकि हेर शैतान तूसु मन्ज कुछ जो जेलखानै मन्ज पाणै बाळा हा ताकि तुहै परखै गाहन; अतै तुसिओ दस दिना तक कलेश चुकणा पैणा। मरनै तक विस्वासी रैह, ता मुँ तिजो जीवन रा मुकुट दिणा।

¹¹कना खोली करी मेरी गल्ला हुणी लेय्आ कि पवित्र आत्मा कलीसिया सितै कै बलदा हा। जैडा जय पान तैसिओ दूई मौती[2] थऊँ कोई नूकसान न पुजणा।

¹²“पिरगमुन शहर री कलीसिया रै दूत जो ऐह लिख, जैस बलै दोधारी अतै तेज तलवार हा, सो ऐ बलदा हा कि,

¹³अऊँ जाणदा हा कि तेरा शहर शैतान रै वशा मन्ज हा फिरी भी तुहै मिन्जो पुर विस्वास करदै रैहन्दै हिन अतै मेरी शिक्षा जो ना छड़दै। तुहै मेरी शिक्षा जो तैस टैमैं भी ना भूलै जैहणै विस्वासी भाई अन्तिपास जो मारया गो। तिनी बफादारी सोगी मेरै बचना रा प्रचार करू सो तेरै शहरा मन्ज मारया गो जैड़ा शैतान रै वशा मन्ज हा।

¹⁴पर मिन्जो तेरै विरोधा मन्ज ऐह शिकायत हा कि तैंई तिन्या मणु रा विरोध ना करू जैड़ै तेरी कलीसिया मन्ज पूराणै टैमां रै भविष्‍यवक्ता बिलाम सांईयै झूठी शिक्षा दिन्दै हिन। क्ओकि भविष्‍यवक्ता बिलाम राजा बालाक जो सखाऊरा थू कि कियां इस्त्राएली मणु री परीक्षा भोआ अतै सो मूर्ति पुर चढ़ाऊरी चिजा जो खान अतै व्यभिचार करीके पाप करना लगी पैन।

¹⁵तिन्या ही तिजो बलै कुछ ऐसै मणु हिन जैड़ै नीकुलियों री शिक्षा रै अनुसार चलदै हिन।

¹⁶ता फिरी पापा थऊँ मन फेरा अगर तुहै ऐसा ना करू ता मुँ तिजो बल्लै जल्दी ईच्ची करी तिन्या झूठी शिक्षा दिणैबाळै सोगी अपणै मुँहा री तलवार अर्थात अपणै बचना सोगी लड़ना।

¹⁷कना खोली करी मेरी गल्ला हुणी लेय्आ कि पवित्र आत्मा कलीसिया सीतै कै बलदा, जैडा जय पान तैसिओ मुँ गुप्त मन्नै थऊँ दिणा, अतै तैसिओ अक्क चिट्टा पत्थर भी दिणा, तैस पत्थर पुर अक्क नां लिखुरा भूणा जैसिओ तसेरै लैणैबाळै रै बगैर कसी ना जाणना।”

¹⁸“थुआतीरा शहर री कलीसिया रै दूत जो ऐह लिख, प्रमात्मैं रा पुत्र जसेरी हाख्री अगी री ज्वाला सांईयै चमकदार, अतै तसेरै पैर बदिआ पितळी सांईयै चमकदार हिन सो ऐ बलदा हा कि,

¹⁹अऊँ तेरै कम्मा, तेरै प्रेम, तेरै विस्वास, तेरी सेवा अतै तेरै धीरजा जो जाणदा हा अतै अऊँ ऐ भी जाणदा हा कि तू अबै इन्या भलै कमा जो पैहलै थऊँ ज्यादा बदिकरी करू करदा हा।

²⁰पर मिन्जो तेरै विरोधा मन्ज ऐह शिकायत हा कि तू तैहा जनानी इजेबेल जो झूठी शिक्षा फैलाणै थऊँ ना रोकदा, जैड़ी अपणै आपा जो भविष्‍यवक्तन बलदी हा, अतै मेरै दासा जो व्यभिचार करनै अतै मूर्ति अगो चढ़ाऊरी चिजा जो खाणा सखांदी हा।

²¹मैंई तैहा जो मना फेरनै रा मौका दिता, पर सो व्यभिचार थऊँ अपणै मना जो ना फेरना चाहन्दी।

²²हेर, मुँ ऐसा जो रोग सितै पीढित करना; अतै जैड़ै तैहा सोगी व्यभिचार करदै हिन अगर सो भी तियां कम्मा थऊँ मना जो ना फेरलै ता मुँ तियां जो बडै़ दुखा मन्ज पाणा हा।

²³मुँ तिन्या सबी जो मारी दिणा जैड़ै तसारी शिक्षा अनुसार चलदै हिन तां सबी कलीसिया जो पता लगणा कि दिल अतै मना जो परखणैवाळा अऊँ ही हा, अतै मुँ तूसु हरेक जो तून्दै कम्मा रै अनुसार इनाम दिणा।

²⁴पर तुहै थुआतीरा शहर रै बाकी विस्वासी तिन्या झूठी शिक्षा रै अनुसार ना चलदै अतै ना ही शैतान री तिन्या गल्ला मन्ज सहभागी भुन्दै जैतिओ मणु गूढ़ी गल्ला बलदै हिन ठेरैतांये अऊँ तुसिओ होर जरूरी आज्ञा रै बारै मन्ज ना दसणा चाहन्दा जैड़ी तुसिओ मनणी हिन।

²⁵पर हाँ, तुहै मेरै ईणै तक मेरी शिक्षा पुर विस्वास करदै रेय्आ।

²⁶जैडा जय पान अतै मेरी आज्ञा रै अनुसार अन्त तक करदा रेय्आ, मुँ तैसिओ जाति जाति रै मणु पुर अधिकार दिणा।

²⁷मुँ हरेक मणु जो राज्य करनै रा सो ही अधिकार दिणा जैडा मेरै पिता मिन्जो दितुरा हा, तंयारा राज्य लोहे सांईयै मजबुत भूणा जैड़ा कदी ना टुटणा पर तंयारै शत्रु जो मिट्टी रै भांडै सांईयै चकनाचूर करी दिणा।

²⁸अतै मुँ तैसिओ भ्यागा रा तारा दिणा।

²⁹कना खोली करी मेरी गल्ला हुणी लेय्आ कि पवित्र आत्मा कलीसिया सितै कै बलदा हा।”