Read Gaddi प्रकाशित वाक्य 3 Bible Online

प्रकाशित वाक्य 3 - Gaddi bible

प्रकाशित वाक्य 3

¹“सरदीस शहर री कलीसिया रै दूत जो ऐह लिख, जैस वलै प्रमात्मैं री सत आत्मा अतै सत तारै हिन, सो ऐ बलदा हा कि, अऊँ तेरै कम्मा जो जाणदा हा, तू विस्वासयोग्य विस्वासी सांईयै ता लगदा पर असल मन्ज तू मेरी शिक्षा अनुसार ना चलु करदा।

²ठेरैतांये जागदै रेय्आ, अतै मिन्जो पुर अपणै विस्वास जो मजबुत करा ताकि ऐसा ना भोआ कि तून्दा जैड़ा विस्वास थोड़ा हा सो भी खत्म ना भूच्ची गच्छा। अऊँ जाणदा हा कि तेरी जैड़ी कमी हा सो ज्यादा हा क्ओकि प्रमात्मां तेरै कमा थऊँ खुश निय्आ।

³ठेरैतांये याद कर कि तैंई किनी शिक्षा पाऊरी अतै हुणुरी थी, अतै तैत मन्ज बणी रैह अतै अपणै पापा थऊँ मन फेरा। अगर तू जागृत ना रैऊ ता मुँ चोरा सांईयै अचानक चली ईणा अतै तिजो कदी भी पता ना लगणा कि मुँ कहा घड़ी तिजो वलै ईच्ची रैहणा।

⁴पर हाँ सरदीस शहर मन्ज कुछ ऐसै विस्वासी हिन जियें अपणी जिन्दगी जो शुद्ध रखूरा हा। तिन्या शुद्ध चिट्टै ओड़णा लाई करी मिन्जो सोगी रैहणा क्ओकि सो ठेरै लायक हिन।

⁵जैडा जय पान तैसिओ तियां ही चिट्टै ओढण पहनाणै हिन, अतै मुँ तसेरा ना जिन्दगी री कताबा थऊँ कसी भी रीति सितै ना कटणा, पर तसेरा नां अपणै पितै अतै स्वर्गदूता रै सामणै मनी लैणा।

⁶कना खोली करी मेरी गल्ला हुणी लेय्आ कि पवित्र आत्मा कलीसिया सीतै कै बलदा हा।

⁷“फिलदिफीया शहर री कलीसिया रै दूत जो ऐह लिख, अऊँ पवित्र अतै सचा हा अतै मिन्जो बलै सो कुंजी हिन जैड़ी दाऊद री हा, जैहणै अऊँ दारा जो खोलदा ता कोई बंद ना करी सकदा, अतै मेरै बंद करूरै दारा जो कोई खोली ना सकदा।

⁸सो ऐह बलदा कि, अऊँ जाणदा हा कि तू ज्यादा ताकतवर निय्आ फिरी भी तैंई मेरी आज्ञा रा पालन करू अतै मिन्जो पुर विस्वास रखू हा ठेरैतांये मैंई तिजो तांयै अक्क दार खोलुरा हा जैतिओ कोई बन्द ना करी सकदा।

⁹हेर, अऊँ तिन्या मणु जो जाणदा हा जैड़ै ऐह बलदै हिन कि सो यहूदी प्रमात्मैं रै चुणुरै मणु हिन पर असल मन्ज ना हिन पर सो तैहा मण्ड़ळी रै सदस्य हिन जैडा शैतान री हा। मुँ ऐसा करना कि तियां ईच्ची करी तेरै पैरा पुर झुकी गाणा, अतै तियां ऐ जाणी गाणा कि तुहै ही सो मणु हिन जिन्या सोगी अऊँ प्रेम करदा हा।

¹⁰क्ओकि मैंई आज्ञा दितुरी थी धीरज सोगी दुखा जो सैहणै तांयै, जठेरा तैंई पालन करू हा ठेरैतांये जैहणै ऐस पूरै संसार मन्ज रैहणै बाळै पुर परीक्षा रा टैमं ईणा ता मुँ तेरी रक्षा करनी हा।

¹¹अऊँ तोळा ईणैबाळा हा ठेरैतांये अपणै विस्वास मन्ज बणी रैह ताकि कोई तिजो थऊँ तेरै इनाम जो खुस्सी ना लेय्आ जैड़ा प्रमात्मैं तेरै तांयै रखूरा।

¹²जैडा जय पा सो प्रमात्मैं रै मन्दरा मन्ज अक्क खंभै सांईयै भूणा जसेरी अऊँ सेवा करदा हा अतै तिन्या जो कदी मन्दर छड़णा ना पैणा। मुँ तंयारै शरीरा पुर प्रमात्मैं रा नां लिखणा जैत सोगी ऐह पता लगणा कि ऐह तसेरै हिन अतै प्रमात्मैं रै शहर रा नां भी लिखणा जैतिओ नौआ यरुशलेम बलदै हिन। ऐह सो शहर हा जैड़ा मेरै प्रमात्मैं री तरफा थऊँ स्वर्गा थऊँ उतरी ईणा अतै मुँ तैड़ी अपणा नौआ नां तिन्या पुर लिखणा हा।

¹³कना खोली करी मेरी गल्ला हुणी लेय्आ कि पवित्र आत्मा कलीसिया सीतै कै बलदा हा।”

¹⁴“लौदीकिया शहर री कलीसिया रै दूत जो ऐह लिख, अऊँ ही आमीन हा क्ओकि अऊँ ही विस्वासयोग्य हा अतै अऊँ ही पक्का करदा कि प्रमात्मां सचा हा, अऊँ ही सो हा जसेरै द्धारा प्रमात्मैं सबी चिजा री रचना करी।

¹⁵अऊँ तेरै सबी कम्मा जो जाणदा हा, तू इनकार ना करदा कि तू मिन्जो पुर भरोसा रखदा, पर तू मिन्जो सोगी ज्यादा प्‍यार भी ना करदा। तू ऐसा हा जियां पाणी ना ता ठंड़ा अतै ना ही गर्म हा खरा भुन्दा तू ठंड़ा या गर्म भुन्दा।

¹⁶ठेरैतांये कि तू गुनगुना हा, ना तू ठंड़ा अतै ना ही गर्म हा, मुँ तिजो अपणै मुँहा थऊँ उँगळी दिणा मतलब कि तून्दा विस्वास मिन्जो पुर पूरी रीति सितै निय्आ ठेरैतांये मुँ तुसिओ त्यागी दिणा।

¹⁷तुहै सोचदै हिन कि तुहै अमीर हिन अतै तूसु बलै कसी चिजा री कमी निय्आ पर तुहै सच्चाई जो ना जाणदै क्ओकि सच्चाई ता ऐह हा कि तुहै अभागै हिन, तुच्छ हिन, कंगाल हिन, अन्धै हिन अतै नंगे हिन क्ओकि तुहै मिन्जो पुर थोड़ा ही भरोसा करदै हिन।

¹⁸ठेरैतांये अऊँ तिजो सलाह दिन्दा कि अगी मन्ज तपाऊरा सोना मिंजो थऊँ खरीदी लै ताकि तू अमीर भूच्ची गच्छा, अतै चिट्टै कपड़ै लेई लै ताकि तिजो तियां जो पैहनी करी अपणै नगैंपना थऊँ शर्म ना भुआ, अतै अपणी हाख्री मन्ज लाणै तांऐ सुर्मा लेई लै ताकि तू हेरना लगा।

¹⁹अऊँ जिन्या जिन्या सितै प्रेम करदा हा, तियां सबी जो डांट अतै ताड़ना दिन्दा हा; ऐस तांयें तू तोंळ कर अतै मन फेर।

²⁰हेर, अऊँ दारा पुर खड़ी करी खटखटान्दा, अगर कोई मेरा बोल हुणी करी दारा खोलला ता मुँ तैस बलै ईच्ची करी तैस सोगी रोटी खाणी हा अतै तैस मिन्जो सोगी।

²¹जैड़ा जय पा मुँ सो अपणै सोगी अपणी गद्‍दी पुर बहालना, जियां अऊँ भी जय पाई करी अपणै पिता सोगी तसेरी गद्‍दी पुर बैहुरा हा।

²²कना खोली करी मेरी गल्ला हुणी लेय्आ कि पवित्र आत्मा कलीसिया सीतै कै बलदा।”