Read Gaddi प्रकाशित वाक्य 9 Bible Online

प्रकाशित वाक्य 9 - Gaddi bible

प्रकाशित वाक्य 9

¹जैहणै पँजवें स्वर्गदूतै तुरही बजाई, ता मैंई स्वर्गा थऊँ धरती पुर अक्क तारा पैंदा हेरू, अतै तैसिओ अथाह कुण्ड़ री कुंजी दिती।

²तिनी अथाह कुण्ड़ जो खोलू, अतै कुण्ड़ मन्ज बडी भठी सांईयै धूँ ऊठु, अतै कुण्ड़ रै धूंआ सितै सूरज अतै अम्बर नैहरा भूच्ची गै।

³तैस धूंआ थऊँ धरती पुर टिड्ड़ी निकळी, अतै तियां जो धरती रै बिच्छु सांईयै डंक मारनै री शक्ति दिती।

⁴तिनी बल्लू कि ना धरती रै घा जो, ना कसी पोधै जो, ना कसी रूखा जो हानि पुजा, सिर्फ तियां मणु जो हानि पुजा जंयारै मत्थै पुर प्रमात्मैं री मोहर निय्आ।

⁵तियां जो मणुओ मारी दिणै रा ता ना पर पँज महीनै तक पीड़ा दिणै रा अधिकार दितुरा हा। तंयारी पीड़ा ऐसी थी जियां बिच्छु रै डंक मारनै थऊँ मणु जो भून्दिआ।

⁶तियां पँज महीनै रै दौरान मणु मौती जो तोपणा पर ना मुळणिआ, अतै मरनै री लालसा करनिआ पर मरी ना पाणा।

⁷तियां टिड्ड़ी रा आकार लड़ाई तांयें तैयार करूरै घोड़ै सांईयै थू, अतै तंयारै सिर पुर मना सोनै रै मुकुट थियै अतै तंयारै मुँह मणु सांईयै थियै।

⁸तंयारै बाल जनानी रै बाळा सांईयै अतै दंद शेरा रै दंदा सांईयै थियै।

⁹सो लोहे री कवच पैहनी करी थियै, अतै तंयारै फंगा रा शब्द ऐसा थू जियां रथा अतै मतै सारै घोड़ै रा जैड़ै लड़ाई मन्ज दौड़दै हिन।

¹⁰तंयारी लिंगणी बिच्छु सांईयै थी अतै तियां मन्ज डंक थियै, अतै तियां जो पँज महीनै तक मणु जो दुख पुजाणै री जैड़ी शक्ति मुळी थी, सो तंयारी लिंगणी मन्ज ही थी।

¹¹अथाह कुण्ड़ रा स्वर्गदूत तियां पुर राजा थू, तसेरा नां इब्रानी मन्ज अबद्दोन, अतै यूनानी मन्ज अपुल्लयोन हा। इन्या दूनी नां रा अर्थ हा विनाश करनै बाळा।

¹²पँज महीनै बाद ऐह पैहला संकट खत्म भूच्ची गो, पर अबै ठेरै बाद दोई संकट होर ईणै बाळै हिन।

¹³जैहणै छेम्मै स्वर्गदूतै तुरही बजाई ता सोनै री वेदि जैड़ी प्रमात्मैं रै सामणै हा तसेरै चारो कोणै रै हिंगा थऊँ ऐसा शब्द हुणु।

¹⁴ऐह शब्द तैस तुरही बजाणै बाळै छेम्मै स्वर्गदूता सितै बल्लू करदा थू, “तियां चंऊर स्वर्गदूता जो जैड़ै बड़ी नदी फरात रै नेड़ै बंधुरै हिन, खोली दे।”

¹⁵सो चंऊर स्वर्गदूत खोली दितै गै जैड़ै तैसा घड़ी, अतै दिन, अतै महीनै, अतै साला तांयें मणु री अक्क तिहाई जो मारी दिणै जो तैयार करूरै थियै।

¹⁶तंयारै फौज रै सवारा री गिणती बीह करोड़ थी, मैंई तंयारी गिणती हुणी।

¹⁷मिंजो ऐस दर्शना मन्ज घोड़ै अतै तंयारै ऐसै सवार हुजै जंयारै कवच अगी सांईयै लाल, धूम्रकान्त सांईयै नीलै, अतै गन्धक सांईयै पिळै थियै। तंयारै घोड़ै रै सिर शेरा सांईयै थियै अतै तंयारै मुँहा थऊँ अग, धूंआ अतै गन्धक निकळदै थियै।

¹⁸इआं त्राई महामारी अर्थात अग अतै धूँ अतै गन्धक थऊँ, जैड़ै तसेरै मुँहा थऊँ निकळदै थियै अक्क तिहाई मणु जो मारी दिता।

¹⁹क्ओकि तियां घोड़ै री सामर्थ तंयारै मुँहा अतै तंयारी लिंगणी मन्ज थी ठेरैतांये तंयारी लिंगणी कीड़ै सांईयै थी, अतै तियां लिंगणी रै सिर भी थियै, अतै तियां सितै ही सो पीड़ दिन्दै थियै।

²⁰बाकी मणु जैड़ै तैसा महामारी मन्ज ना मरूरै थियै, अपणै बुरै कम्मा थऊँ मन ना फिराऊ, सो तिन्या ही दुष्‍टात्मा री, अतै सोनै अतै चाँदी अतै पितळी अतै पत्थर अतै लकड़ी री मूर्ति री पूजा करदै थियै, जैड़ी ना हेरी, ना हुणी, ना चली सकदी हिन।

²¹अतै जैडा खून, अतै जादू, अतै व्यभिचार, अतै चोरी तियैं करूरी थी, तियां थऊँ मन ना फिराऊ।