Read Galela MATIUS 10 Bible Online

MATIUS 10 - Galela bible

MATIUS 10

¹Okaija etope-tai wija ma gaati manaa-tijake enija maida make bida boko jaduwajawii, jaemigimake-tijake, daana me ka didi tuma tumaija ma, okeija debuu agijo utoma beu jaawetijake maija.

²Okei eti-awita bagee wija ma gaati kede eka kei ke: edoga kidi, Simon kidi, kii ke Peterus eebatita kidi, daana kenekame Andereas; daana Zabdi jokame Jakub ma, kenekame Jahja ma;

³Pilipus ma Bartolomius ma; Tomas ma, mege kotuu te-tai me Matius kidi ma; Alpius jokame Jakub ma, Tadius ma;

⁴Kanani ka me Simon ma, Judas Iskariot ma, Jesus eekegajawita me kidi.

⁵Kei me wija ma gaati kede Jesus ebadikumii, etimakeete mana, „Ojaa bageepa te uwii, daana Samaria maki okogo ena ma wadoujo te kai;

⁶kodeja Israil uguwo ka igata dombaidoopa uwii.

⁷Uweetigo mana wudii, kii dani eteete mana, ’Epaawado ka jakimakita makiida kapa keega.’

⁸Didi bagee beu jaawii; bokata bagee ija eewii; tomo jago dani bagee jaojawii; enija jaemigimakai. Ikii ojaa kodo motita agijo ikiija na ojaa kodo menii.

⁹Mas mege juwa, perak juwa, tembaga juwa potò duba te watakijawii.

¹⁰Ita maida agija juwa, kagaba kakade wija juwa, bado awii juwa, bado kopa juwa te dokii. Kei te-tai me kidi naija agijo domakija kouja.

¹¹Ikii maki katouda juwa, maki okogo juwa wadoujo kipa, enaa bagee epeepite eubai; kouda tojake kouda kodaa make uwii.

¹²Ikii me ka owaa wadoujo kipa kojáá mana tiga etii.

¹³Kou uguwo enaa keetigo ko, ikiija kojáá dimi jamejawii enaa; kodeja peu keetigo ko, ikiija kojáá dimi ikeepa joko mei enaa.

¹⁴Daana meija ti kijakimakipi, daana mana ti kijuwipi, kou owaapa ma, kou makijo ma podomija gaa kodo, bado maida ka maki puugee kigi atidokii.

¹⁵Beu maa kou ani kitii, boko petai putu naago kodo, kou makijo ka peu kai kodo ma ko, Sodom ma Gomora ma peu kai ko egaida.

¹⁶Dodowei! Ego jago jina jupi domba dani bukaa kibadikumii. Okai kouja ikii go-mote ga-mote ugenija bukaa kai, daana ikiija kegepa maija doodoo wonou bukaa kai.

¹⁷Me maida make ikii akaato munii. Okei pika-tai kotuuda keekegajawiitai kojoka, daana okeija sembahjang owaa duba godijai kitaitai;

¹⁸Gubernur jumaapa ma, maki jakimake-tai bagee jumaapa ma ani maida make ganeuto kigoutai; okei jumaapa ma, ojaa bagee jumaapa ma mana naawega-tita tijake.

¹⁹Kodeja okei keekegajawipai ko, ikii kawe dani wegaja juwa, daana má mana etija juwa, gaagaa te tai; ikiija etiita mana kodo kou gaa kodo ikeepa kaita kojoka.

²⁰Ikii kede to wegai ko beu kojoka, kodeja Ikiitaija Roh ikii duba make wegai.

²¹Me ka kenekame boka-tijake eekegajawiitagi, daana nakame ka jokame maija; daana jokaane ka ukame nakame akaije ootijake boka-tijake eekegajawiitai.

²²Daana utoma bagee aneeka maida make be kigaitai. Kodeja meija wiwitiida to bida peu tomakipi ko, ajii taitagi.

²³Maki katouda make me ka peepu kitipai, maki enakaatoopa okii. Beu maa kou ani kitii, ikii Israil ka maki okogo utoma dubaiga uwina teete muumai beu gaa kodaa me Joka meitagi.

²⁴Etope-tai me idaana okaija kuduu ma ko ibo ko beu, daana jakei te-tai me maija okaija etimake-tai ma ko ibo ko beu.

²⁵Etope-tai me okaija kuduu ma ena dani ki-toojogo ko tiki, daana kei te-tai me okaija etimake-tai okai kou dani. Okei owaa ipuwe me Baalzebul eebatipai, okaija uguwo maija umina ewidogaitai.

²⁶Okai kouja okei ke ikii weda te egai. Apumita agijo ena ma beu, ewaida te kaita mana kodo; daana boonita mana ena ma beu, epi te kija mana kodo.

²⁷Ani bunita tapa make kitita mana awe tapa wegai. Gapa duba kitigi kitita mana owaimouda make pitokai.

²⁸Daana má jato wagimake bagee, dimi mana te wagimakija kodaa, weda te egai. Kodeja dimi mana ma, má jato ma, wija kadaga bodija duba wagimakija me to weda egai.

²⁹Beu, mee? piipaa ida wija mijo mege ena age kaa tija. Kodeja Ikiitaija gata dimi beuda idaana ma makiida te gootai.

³⁰Kodeja ikiija migouda ka ijo epa gakimakita.

³¹Okai kouja ikii weda te gai. Piipaa wedaba ma ko ikii ke ibo age kojoka.

³²Okai kouja me jumaapa naawega-tai me gakita ani maija Naitai jumaapa epaawado mana jawegaita.

³³Daana meija me jumaapa beu puga natipi, ani maija Naitai jumaapa epaawado beu puga etaita.

³⁴Ani muka-muka makiida mejawe-tijake meta dimi te nagai. Ani muka-muka mejawe-tijake mei ko beu, kodeja kataana mejawii.

³⁵Me ka nakame ma akaije ootijawe-tijake ani mei kouja, daana jagamo joka ka ukame maija, daana jagamo akabaakaija maija;

³⁶daana owaa enaida uguwo be akaga taitai.

³⁷Meija ani ma ko nakame ma ukame ma euga ei egapi, okai aneepa edou peu; daana meija ani ma ko jokame euga ei egapi, okai aneepa edou peu.

³⁸Daana meija pija boko te dokijake te naapepi okai aneepa edou peu.

³⁹Meija okai akaato munipi, okai akaato igajawiitagi, daana meija ani maida make okai akaato igajawipi, okai akaato domakaitagi.

⁴⁰Meija kijakimakipi, okai ani maija najakimakai; daana meija najakimakipi, nabadikumita me maija ejakimakai.

⁴¹Meija gokobaki tijawiidaiga wega-tai me, eka ko gokobaki tijawiidaiga wega-tai me kouja ejakimakipi, petege go-motiitagi, gokobaki tijawiidaiga wega-tai me danite; daana meija maakodo me idaana, eka maakodo me kouja ejakimakipi, petege go-motiitagi, maakodo me danite.

⁴²Daana meija kei mijo bagee jupi ka me idaanaapa etopetai eka duba gemoo uwo no-tijake menipi, beu ma kou ani kitii, okaija petege umina te igaita.”