Read Galela MATIUS 11 Bible Online

MATIUS 11 - Galela bible

MATIUS 11

¹Jesus etope-tai wija ma gaati kou dani etijawijake, okai kouda kodaa make uwijake okeija maki okogo utoma dubaiga etopai ma, mana wudii ma tina tai.

²Jahja wanee owaa duba toojogo gaa Keristusja kei tita agijoudo juwijake, okaija etope-tai wija wido ebadikumii,

³eteete mana, „Aki ki meitagi me wegaigai kidi, mee? inii meena edoutou?” etii.

⁴Tijake Jesus wo eteete mana, „Ikii juwii ma dou ma agijouda Jahja ete-uwii.

⁵Kou ko, peka wanee bagee peka dou; wajage bagee ita uwina tai; tomo jago dani bagee oodaa; gapa daba bagee juwii; bokata bagee eenigojawita; daana daba bageepa ajii mana jawudita kodo.

⁶Ideide no, ani maida make duwaa-duwaa beu bagee,” etii.

⁷Okei uweetigo Jesus meido kedeepa Jahja maida make mana oowegaine go-motii, eteete mana, „Ikii magijo doune gei tapa uwii? Mome tegeena ukija ka bego tijawijake na ko, mee?

⁸Magijo na ko ikii dogou? Enauto kagaba makita me idaana, mee? Juwidowei, enauto kagaba makita bagee kede maki jakimake-tai bagee ka owaapa tou.

⁹Magijo ka ikii uwii? Gokobaki tijawiidaiga wega-tai me idaana edoune, mee? Beu maa kou ani kitii, gokobaki tijawiidaiga wega-tai me ma ko akanawa ko beu me.

¹⁰Kii dei okai maida make kapogeije ebijamakita: Juwidou, naaetigo-tai me tiga aki jumaapa kaaebadikumii; Akija ita epeepite kaawadiitagi.

¹¹Beu maa kou ani kitii, jagamo ka epajawita bagee jupi baptis te-tai me Jahja kidi ma ko ibo beu. Kou ko kou kodeja epaawado ka jakimakita makiida ka mijo ka kidi ki okai ma ko ibo.

¹²Kodeja baptis te-tai me Jahja tota gaa ko make ito to utuuja epaawado ka jakimakita makiida me ka umina kidi kebagoo wadoujo kai; daana bida peu kidi kebata bagee jakimakai.

¹³Tikauwa ka gokobaki tijawiidaiga wegai tita bagee ma, Musaja dijo douja mana ma douja dojawii ko Jahja tota wagiida to kouja;

¹⁴daana ikii jakimaki-toojogo, okai kii kidi Elias kidi, meitagi wegaigai kidi ki.

¹⁵Juwe-tijake gapa jago bagee juwii to tai.

¹⁶Kii wagi ka bagee magijo dani etijawii no? Jokaido akaada te-taida animakijake okei ogaaneido mana akaateete dani bukaa, wegaate mana,

¹⁷’Inii mitoopi keewijake ikii gaida-gaida beu; Inii jiijii kitijake ikii jege beu.’

¹⁸Jahja nai beu kidi meta kouja, daana me ka wegai ko, ’Okai enija.’

¹⁹Me Joka nai ma mejake me ka wegai ko, ’Edodowei, nai dimi to, daana utaadijo nojake uneune; mege kotuu te-tai bagee ma peu bagee ma ogeme.’ Dimi bokouto kodo ekowata agijoudo ka maa eewita.”

²⁰Okai kou wadoutouga kei maki okogoudo, okaija ego takuu-takuu agijoudo kei titaida kodo okai ewidogai umina, okei tedemai beu kouja, eteete mana,

²¹„Aki peu kaineege no, ei, Chorazin! Aki peu kaineege no, ei, Baitsaida! Kou danite Sur ma Sidon ma duba ego takuu-takuu agijoudo ewaa awii naako, ikii duba ewaa awita dani bukaa, okei tika kodaa make tedemi-toja, me peuda kagaba makijake gako duba animakijake ko.

²²Kodeja ani kitii, boko petai putu naago kodaa ikiija peu kai kodo ma ko, Sur ma Sidon ma peu kai ko egaida.

²³Daana aki ki, ei, Kapernaum, aki epa maida wado titaitage, mee? Aki bokawouda mijouwe kaitage. Aki duba ego takuu-takuu kei tita agijoudo danite Sodom duba kei tai naako, ito naago maija toja.

²⁴Kodeja ani katii, boko petai putu naago akija gaduwaitage ma ko, Sodom ka gaduwata ko egaida.”

²⁵Okai kou gaa kodo Jesus wegaate mana, „Ei, Naitai, nagajaweege, epa ma maki ma boko duwajawita me, aki kei manaido dimi boko jago bagee ma, dimi epi bagee ma keipa make boonijake jokaidoopa ewaa tapa jaawita.

²⁶Ei, Naitai, kou dani aki ide gata kouja.

²⁷Utoma agijo utoma Naitaija naaekegajawita. Daana meena ma Joka kidi edou beu, kodeja Nakame to. Daana meena ma Nakame edou beu, kodeja Jokame to, daana Joka kidaa gajake ewaa tapa jaawiine bagee to.

²⁸Aneepa mewei, kowaa kei, kei tai umina ma, udo kugouto dokeete bagee ma; mobu keewiita kojoka.

²⁹Anija kode maida ka dokija pija boko naadokijake aneepa make topii. Ani ki debee ma mijo ma kegepa jago kojoka; daana ikii mobu dimi go-motiita.

³⁰Anija dokita ko etaida kouja, daana anija kugo ko egaida.”