Read Galela MATIUS 15 Bible Online

MATIUS 15 - Galela bible

MATIUS 15

¹Tijake Parisi bagee ma, kapogeije epi bagee ma Jerusalim make Jesuspa mejake eteete mana,

²„Magijo ka akija etope-taido kede aijaane muumaane ka mijo makii makii mana ekagumeigai? Okei naine jato gane witogai beu teigai kouja,” etii.

³Tijake wo eteete mana, „Magijo ka ikii Ugatameja nitimakita mana ekagumeiga, ikiija ka mijo makii makii mana maida make ko?

⁴Ugatameja nitimakita kouja: Akaitai akuukai ibo ejaikai. Daana: Meija nakame ukame ewidogipi, wagigoo jamaawija.

⁵Kodeja ikiija ka wegai ko, ’Meija nakame juwa, ukame juwa eteete mana: Aneepa make motija agijo ani Ugatameepa menii,’ eti-toojogo ko,

⁶kii me kidi nakame ibo te ejaikija. Kou danite ikiija ka mijo makii makii mana maida make kouja Ugatameja mana beu puga tijawii.

⁷Kowaa kei, matabe bagee, tikauwa ka gokobaki tijawiidaiga wegai tita me Jesaja ka ikii maida make maakodo douja kijadojawita, kii dani:

⁸Kei bagee ebe ka to ibo najaikai kodeja, Kegepa ko aneepa make poto.

⁹Okeija migaakobe natai wogidaa ibo, Me ka kuba-mote mana okei etope-tai kouja.”

¹⁰Jesus me wedaba kodo manaa-tijake eteete mana, „Juwijake gaawe-tai!

¹¹Ebe duba amoujo kai agijo kouja me peu taawija, kodeja ebe duba make podome-tai agijo kouja me peu eewii,” etii.

¹²Tijake etope-taido mejake eteete mana, „Kuduu, aki epi, mee? kou mana kodo Parisi bagee juwijake kegepa didi tipai kou ko,” etii.

¹³Okai wo eteete mana, „Weta agijo gakita, epaawado ka Naitaija wei beu agijo, badidoke taita.

¹⁴Ejaikei. Okei peka wanee kijake peka wanee bagee migougu oomakita. Peka wanee me ka peka wanee me idaana migougu oomaki-toojogo okejai wija komo duba aajagii tija.”

¹⁵Tijake Peterus wo eteete mana, „Kou ena dani awe-tai mana ko, mana boko jato niti-niimi,” etii.

¹⁶Okai wo eteete mana, „Ikii maija ito ko gai beu keega, mee?

¹⁷Ikii gai beu, mee? ebe duba amoujo kita agijo modo duba kijake podomijawii.

¹⁸Kodeja ebe duba make podome-tai agijo, kou ko kegepa duba make mejake, okai kou kodo me peu eewii.

¹⁹Kegepa duba make peu dimi ewaa kai kouja; me wagii, mogai, utoopa wo uwe, oma, puja kubai, me eduwai.

²⁰Kei manaido keija me peu eewii. Kodeja nai jato gaa gane witogai beu kou ko me peu taawii,” etii.

²¹Jesus kouda kodaa make uwijake Sur ma Sidon ma dokoo wo uwii.

²²Kou dokoo ka Kanani jagamo idaana podomijake emeeme teete mana, „Ei, Tuhan, Daud Joka, ipa nagai; anija jagamo joka enija jago tijake umina teete,” etii.

²³Kodeja Jesus mana mutoona ma wo etii beu. Okaija etope-taido okaapa mejake ediimeete mana, „Uwi, eti, okai inii nemouga emeeme niteete kouja,” etii.

²⁴Jesus wo eteete mana, „Ani me inoopa nabadikumita beu, kodeja Israil uguwo ka igata dombaidoopa to,” etii.

²⁵Kodeja jagamo kodo mejake okaapa migaakobe eteete mana, „Ei, Tuhan, naadadai,” etii.

²⁶Okai wo eteete mana, „Jokaido ka goti jamotijake dodi jamo menii ko peu,” etii.

²⁷Jagamo kodo eteete mana, „Maa kou, Tuhan, dodi kede ipuwe me ka kejage make mijo puugee gootitaido kodo mono-tai kouja,” etii.

²⁸Tijake Jesus wo eteete mana, „Kowaa kau, aki maakodo gai ko umina ibo. Kojoka akija gaage danite kakei tidoke tai,” etii. Okai kou gaa kodo maija okaija joka kodo didi beu kai.

²⁹Jesus kouda make uwijake Galilea peku watijaiga dakii tai. Okai dimi katouda patikijake kouda kodaa animakai.

³⁰Me umina wedaba okaapa mei; kotiidogo ma, wajage ma, peka wanee ma, manaawo ma, joko ka maija wedaba oomejake okai jumaapa jamakijawijake okai beu jaawii.

³¹Okai kouja me kotuu kodo ego takuu-takuu, manaawo bagee mana wegai ma, wajage bagee kotopidaa ma, kotiidogo bagee epi joone ma, peka wanee bagee domakai ma edojake; tijake okei Israilja Ugatame kidi muta etuwai.

³²Tijake Jesus etope-taido manaa-tijake eteete mana, „Ani meido kede ipa egai, okei uno wido ani ma neetou kouja, daana naija agijo ena ma beu. Naidi ma uwei te etiine, okei ita maida bobaa taipigai kodaa,” etii.

³³Tijake etope-taido wo eteete mana, „Kaija make me beuda kiija goti tiki domakaipage, me wedaba kei ke mobu awiine ko?” etii.

³⁴Tijake Jesus eteete mana, „Ikeepa goti kemo magoo topai?” Etijake wo eteete mana, „Pituwo ma, mijo binei ida wija wido ma,” etii.

³⁵Meido kodo maki maida animake-tei etijake,

³⁶goti kemo pituwo ma, binei ma motijake nagajaweege mana eti-menii. Utijake etope-taido menii, daana etope-taido meido kodoopa jawudii.

³⁷Okei utoma nojake mobu kai. Utita abu kitaija kodo momotijake edu tapuja pituwo ebetume awimakai.

³⁸Okei nota bagee jame to ko muto muto to mutoona,[3] jagamoudo ma jokaido maija.

³⁹Meido uwei etijake komaida matakijake Magadan dokoo uwii.