Read Galela MATIUS 16 Bible Online

MATIUS 16 - Galela bible

MATIUS 16

¹Parisi bagee ma Saduki bagee ma mejake Jesus egaado tai. Epa maida ka dou beu agijo ewaa awe-tijake okei ediimai.

²Okai wo eteete mana, „Uwaataa gaa ikiija ka wegai ko, ’Awii enaa, epa kogéí makeegi kouja.’

³Daana abata, ’Ito naago idaanita, duguu jakuu kouja,’ Ikii epa ko dou epi, kodeja kii wagi kou wagi ka dou agijo ikii dou beu.

⁴Peu ma mogai jago ma tuma ki dou beu agijo doune ubaate, kodeja dou beu agijo tumaana ma te emuwakaita, Junus kidi to,” etijake ejaikidokijake uwii.

⁵Etope-taido uwo adijake goti adaku tijake dokii beu.

⁶Tijake Jesus eteete mana, „Epeepite gai, Parisi ma Saduki ma ka ejajawe-tai maida make ko ikii akaato munii.”

⁷Tijake okei kede akado wegene teete mana, „Inii goti dokii beu keege kouja,” wegai.

⁸Tijake okeija ka dimi Jesus egamakijake eteete mana, „Kowaa kei, ikii epaapate maakodo gai beu bagee, magijo ka ikii akado wegene teete, goti beu mana kodo?

⁹Ikii gamakai beu, mee? Ikii ga-tou beu, mee? goti kemo idibi me ida muto muto to muto daana kou wado maija menita gaa kodaa ikii edu tapuja magoo awimakeetega?

¹⁰Daana goti kemo pituwo me ida muto muto to mutoona menijake ikii edu tapuja magoo awimakeetega?

¹¹Kawe danite ikii gai beu ani goti maida make mana te wegai kodo? Kodeja Parisi ma Saduki ma ka ejajawe-tai maida make ko ikii akaato munii.”

¹²Tijake goti ka ejajawe-tai maida make akaato munii etii beu okei gamakai, kodeja Parisi ma Saduki ma ka etopita mana maida make kodo.

¹³Jesus Kaisaria Pilipi dokoo dakii tijake etope-taidoopa egaado teete mana, „Me ka wegai ko, me Joka ki meime?”

¹⁴Etijake wo eteete mana, „Me ino ka ko, baptis tei tita me Jahja kidi; daana me ino ka ko Elias; daana ino ka ko Jermia juwa, gokobaki tijawiidaiga wegai tita kede meena juwa wegaigai,” etii.

¹⁵Tijake Jesus eteete mana, „Kodeja ikiija ka ko, ani ki meime?”

¹⁶Etijake Simon Peterus wo eteete mana, „Aki ki Keristus, ajii bokouto jago Ugatame Joka,” etii.

¹⁷Tijake Jesus wo eteete mana, „Ei, Simon, Junus jokame, aki ideide no, me jato make kou mana kodo epi kaawii ko beu, kodeja epaawado ka Naitai kidaa.

¹⁸Ani katii, aki ki Peterus, daana kii mogo maida kiija anija uguupuguu amo kebai wado kebai tijawiita; tijake bokawouda ka bida agijo dabapigu te etijawiita.

¹⁹Epaawado ka jakimakita makiida ka damo keba-tai agijo kaniita, tijake aki makiida gadimaitage agijo epaawado maija gadimidoke. Daana aki makiida ekegaitage agijo epaawado maija ekegadoke.”

²⁰Tijake okai Keristus kidi mana me idaana ma te ete-tijake okai etope-taido bida peu kidi etimakai.

²¹Okai kou gaa make wado Jesus etope-taido emuwakaine go-motii, okai Jerusalim wado uwii beu kai peu mana kodo. Me iboudo ma, imam iboudo ma, kapogeije epi bagee ma ka gaduwai umina eewijake wagimakai, tijake widaago naago anigou.

²²Tijake Peterus wo ouwijake akaije ooteete mana, „Kii mana ki umina aki maida te kijake Ugatame wo dani tijawii,” etii.

²³Kodeja Jesus wouga wakouga tijake Peteruspa eteete mana, „Kowaa ke, Teege, ani wakouto bikimi. Ani gaagaa natijawii, aki Ugatameja dimi gai beu keege kouja, kodeja me ka mana ko,” etii.

²⁴Tijake Jesus etope-taidoopa eteete mana, „Me idaana naapeine gapi, okai akaato dimi te gajake okaija pija boko dokijake naapei.

²⁵Meija okai akaato muniine gapi okai akaato igajawiitagi kouja. Daana meija ani maida make okai akaato igajawipi okai akaato domakaitagi.

²⁶Kawo ko enaa kija, kou danite me idaana makiida ka aagijo taagijo okai ipuwe awi-toojogo kodeja, okai akaato igadoke tai kou ko. Daana dimi mana komoka tijawiine ko magijo menija?

²⁷Me Joka Nakameja ajiipiidaiga jaetigo-tai bagee ma enaimo meitagi kouja. Tijake me gakita kei tita agijo abu japaitagi.

²⁸Beu maa kou ani kitii, jakai me ida wija wido jooni-topai, okei me Joka jakimakita makiida ma meete edou beuda te bokaitai.”