Read Galela MATIUS 18 Bible Online

MATIUS 18 - Galela bible

MATIUS 18

¹Okai kou gaa kodo etope-taido Jesuspa mejake eteete mana, „Epaawado ka jakimakita makiida meime ibo?” etii.

²Tijake Jesus joka idaana manaa-tijake okei jupi ejoonijawii,

³eteete mana, „Beu maa kou ani kitii, ikii dimi te betokijake joka dani tijake te ti-toojogo, ikii epaawado ka jakimakita makiida umina wadoujo te kaita.

⁴Meija akaato joka ki danite daba awipi, kii kidi epaawado ka jakimakita makiida ibo.

⁵Meija joka idaana kii danite aneeka dubaiga ejakimakipi, okai najakimakai.

⁶Kodeja meija ani maakodo nagata daba bagee kede idaana monoo etipi, okai kii me kidi ki ogo maida ibo mogo gadimijake maikai epouda egoukumii enaa.

⁷Peu no, makiida kiija monoo tai mana maida make! Monoo tai mana meita, kodeja mejawii me ki peu no!

⁸Kou danite akija gane juwa, bado juwa peu mejawipi, duwajawijake emigimakai. Kou danite gane wijaago, bado wijaago, imo to togoo bodijaapa kaemigimakai ma ko, wajage juwa, kotiidogo juwa, ajii tai wadoujo kai enaa.

⁹Daana akija peka peu mejawipi, gobajake emigimakai. Peka wijaago kadaga bodija kaemigimakai ma ko, peka enakaato to ajii tai wadoujo kai enaa.

¹⁰Epeepite gai, kei daba ka kede aadaba te etijawe-tita. Ani kitii kouja, epaawado okeija ka jaetigo-tai bagee epaawado ka Naitaija ebepeka edouto-tai.

¹¹Me Joka igata bagee ajii ti-meniine meta kouja.

¹²Ikiija ka gai ko kawe dani? Kou danite me idaana domba mutoona[4] munijake idaana igadoke ti-toojogo, beu, mee? ijéé gaatibeu[5] kede ke ejaikijake igata kidi dimi katouda euba-uwii kodo ko.

¹³Daana kou danite edomaki-toojogo, beu maa kou ani kitii, joko ka igai beu ka ijéé gaatibeu[6] maida ma ko, idaana kidi maida ideide wo etige.

¹⁴Kou dani maija, kei mijo kei ke idaana ma igai ko epaawado ka Naitai kidi ide beu.

¹⁵Aki keneka peepu katipi, uwijake okaija peu eti-menii, aki ma okai ma to aatoojogo gaa. Okai kajuwipi, aki keneka joko ejakeete.

¹⁶Kodeja te kajuwipi, me wija wido aki ma enaimo ouwii. Me wija wido ka manaidaiga mana boko wejawe-tita.

¹⁷Tijake okai ekonipi, maakodo gai uguupuguu eti-menii. Daana okai maakodo gai uguupuguu maija te ejuwipi, ejaikai. Okai jamo ejaikita bagee ma, mege kotuu te-tai ma dani ke-tijake.

¹⁸Beu maa kou ani kitii, ikii makiida gadimaita agijo epaawado maija gadimidoke, daana makiida ekegaita agijo epaawado maija ekegadoke.

¹⁹Daana ani kitii, ikii me ida wija makiida kiija aediimaine agijo maida ena kegepa akaga aati-toojogo, epaawado ka Naitai kidaa kijakei taitagi.

²⁰Me wija wido aneeka dubaiga kotuu timakitaida, okei jupiida ani ki ootou.”

²¹Tijake Peterus Jesuspa mejake eteete mana, „Ei, Tuhan, kigi magoo ani keneka peepu natijake ani ipa ejaikija? Kigi pituwo, mee?” etii.

²²Jesus eteete mana, „Kigi pituwo kitii ko beu, kodeja kigi muto[7] pituwo.

²³Okai kouja epaawado ka jakimakita makiida kou ko maki jakimake-tai me idaana dani bukaa, jakei te-tai bagee ma ebé jaduwajawiine.

²⁴Gakigoo ebé jaduwajawita gaa kidi me idaana okaapa omeeta, okai maida ebé talenta sepuluh ribu.[8]

²⁵Okai te badimake kouja, okaija ibo kidaa me kidi ma joka jagamo ma enaimo, daana okai ipuwe agijo utoma kaa tijake ebé amo naabadii etimakita.

²⁶Tijake jakei te-tai me kidi okai jumaapa maki jato mijouga kijake ediimeete mana, ’Ei, Ibo, kojáá kojáá natai, ani ebé utoma amo kaabadiita kojoka,’ etii.

²⁷Tijake ipa ka kei te-tai me kidi ibo kidaa epipikajawijake ebé kodo jajaikai.

²⁸Kodeja kii jakei te-tai me kidi podomijake okai ma enaimo aajakei te-tai idaana okai maida mijo mege mutoona ebé tota kidi edou. Tijake ogo maida ejakijake eteete mana, ’Ei, aki maida ebé topaija joko naabadii,’ etii.

²⁹Tijake aajakei te-tai me kidi maki jato mijouga kijake ediimeete mana, ’Kojáá kojáá natai, ani kaabadiita kojoka,’ etii.

³⁰Kodeja okai ekonijake wanee owaa duba amaawigou, okaija ebé jabadiitagiida to.

³¹Joko ka jakei te-tai bagee kou mana kodo dojake gaagaa umina. Tijake okeija ibo kidiipa utoma agijo eti-menigou.

³²Tijake okaija ibo kidaa manaa-tijake eteete mana, ’Kowaa ke, aki peu nakei te-tai! Aki nadiimijake akija gai peu ebé kodo kaajaikidokeetega.

³³Daana aki ma enaimo kei te-tai me maija aki ipa te egaja, mee? anija ipa kagapa danite,’ etii.

³⁴Tijake emoge ma okaija ibo kidaa wanee owaa douto-tai bageepa eekegajawii, okaija ebé kodo jabadiitagiida to.

³⁵Kou dani maija epaawado ka Naitai kidaa ikii utoma kiikei taitagi, ikiija kegepa puki ka keneka ipa te ejaikipa.”