Read Galela MATIUS 19 Bible Online

MATIUS 19 - Galela bible

MATIUS 19

¹Kei manaido wegajawijake, Jesus Galilea dokoo jaikidokijake Judea dokoo Jarden onee auwaato wadoujo kai.

²Me wedaba eepejake kouda kodaa make didi beu jaawii.

³Parisi bagee okaapa mejake egaado teete mana, „Me idaana jagamome ejaikai ko utoopa ejaikai pijo, mee?” etii.

⁴Jesus wo eteete mana, „Ikii ebatai beu, mee? edoga kidi eugata me kidaa jame ma jagamo ma eugajawii,

⁵eteete mana, ’Okai kouja jame idaana nakame ukame ejaikijake jagamome ma enaida aakai, tijake okejai wija ena emo ena tine kidaa tai.’

⁶Kojoka okejai wija ko beu, kodeja ena tine kidi to. Okai kouja Ugatameja tawajawita kidi ki me ka ko okaakai te tijawii.”

⁷Tijake okei eteete mana, „Kou keetigo ko magijo ka Musaja mege badii kapogeije jaugajawijake ejaikai enita?” etii.

⁸Jesus wo eteete mana, „Ikiija ka kegepa bida kouja ikiija wakaane ejaike-tita tijake Musa Kijaikita. Kodeja edoga kidi kou dani tai ko beu.

⁹Daana ani kitii, meija jagamome ejaikidokipi, kodeja mogai maida make ko beu, tijake joko ka jagamo wo ebukipi, okai mogai. Daana meija ejaikita jagamo kodo waka ebukipi okai maija mogai.”

¹⁰Etope-taido eteete mana, „Kou danite jagamo ma jame ma mana ko kou dani ki-toojogo, waka bukii ko epa beu,” etii.

¹¹Kodeja okai eteete mana, „Kii mana muto ki me utoma ko gai ko beu, kodeja okeepa menita bagee to.

¹²Udó beu kita bagee me ino pataida make, daana me ino me ka udó beu eewii, daana me ino epaawado ka jakimakita makiida maida make akaato udó beu awii. Kii mana jakimakija bagee jakimakai to tai,” etii.

¹³Tijake me ka jokaido okaapa oomei, gane okei maida jamakijake sembahjang te-tita; tijake etope-taido enogimai.

¹⁴Tijake Jesus eteete mana, „Jokaido kei aneepa me-tita no naaejaikei. Wate-wate te etai; epaawado ka jakimakita makiida kei dani bagee ipuwe kouja,” etii.

¹⁵Tijake gane okei maida jamakijake kouda make uwii.

¹⁶Okai kou gaa kodo me idaana okaapa mejake eteete mana, „Ei, Kuduu, ani má enaa agijo kei tai? ajii taine no,” etii.

¹⁷Tijake wo eteete mana, „Magijo ka enaa mana maida make nagaado teege? Enaa ki Ena tou no. Kodeja kou danite aki ajii taine gape ko, nitimakita mana dijo dou,” etii.

¹⁸Tijake okaija „Kawi ki?” etijake Jesus wo eteete mana, „Me te wagii, mogai te tai, oma te motii, puja mana te kubai,

¹⁹akaitai akuukai ibo ejaikai; daana aki watija ka bagee aki akaato danite ipa egai,” etii.

²⁰Tijake kii jokaagaa kidaa eteete mana, „Kei utoma ani dijo douga. Ani magijo beu keega?” etii.

²¹Jesus wo eteete mana, „Kou danite aki enaa bokouto gomotiine gape ko, akija agijoudo utoma kaa te-uwijake daba bageepa menii. Tijake aki epaawado ka agijo makiitage. Daana mejake ani naapei,” etii.

²²Jokaagaa kidi kou mana juwijake gaagaa ma uwii; okai agijo wedaba kouja.

²³Tijake Jesus etope-taidoopa eteete mana, „Beu maa kou ani kitii, tonawi bagee epaawado ka jakimakita makiida wadoujo kai ko gaagaa umina no.

²⁴Kigeena ma kitiine, tonawi me idaana Ugatameja jakimakita makiida wadoujo kai ma ko, unta idaana keipo mugu woujo kai euga ekowamakija,” etii.

²⁵Etope-taido kou mana juwijake ego takuu-takuu umina, eteete mana, „Keetigo ko meime ajii tija?” etii.

²⁶Kodeja Jesus edomakijake eteete mana, „Me ka te ekowamakija, kodeja Ugatame kidi utoma agijo utoma ekowamakija,” etii.

²⁷Tijake Peterus wo eteete mana, „Dodou, inii ke utoma agijo jaikidokijake kaapeetege. Okai kouja inii magijo go-motiitage?” etii.

²⁸Jesus wo eteete mana, „Beu maa kou ani kitii, ija makiida ewaa kaita gaa kodo me Joka okaija jegeenaka animakaida animakaitagiida gaa, ikii naapeta bagee maija wija ma gaati maida animakaita, daana Israil epa wija ma gaati boko japetai.

²⁹Daana meija owaa ma, kenekaane ma, panekaane ma, nakame ukame ma, jokaane ma, maki ma, aneeka maida make ejaikipi, okai kigi mutoona[9] joko motiitagi, daana ajii tai imo to togoo.

³⁰Kodeja okei tiga bagee wedaba nemouga kaitai, daana nemouga ka bagee okei tiga kaitai.”