Read Galela MATIUS 22 Bible Online

MATIUS 22 - Galela bible

MATIUS 22

¹Kigeena ma Jesus ena dani awe-tai manaidaiga oowegai, eteete mana,

²„Epaawado ka jakimakita makiida kou ko tonawi me idaana ka jokame waka bukeeteida buka nai ewaa awii dani bukaa.

³Buka no-taida manaa-tita bageido ebuke-tijake jakei te-tai bagee ebadikumii, kodeja okei mei beu.

⁴Kigeena ma joko ka jakei te-tai bagee ebadikumii, eteete mana, ’Maana-tita bageepa naaetii, Gadodowei, anija buka naine epeepi timakeega; sapi ma daka jago sapi joka ma duwaaga, daana utoma epeepi timakai. Buka nooteida mewei, kiteegi, naaetii,’ etii.

⁵Kodeja okei aadaba tijawijake uwii. Me idaana taidaapa, me idaana munaa uwii.

⁶Joko ka kedaa jakei te-tai bagee ejakimakijake peepu etijawijake wagimakai.

⁷Tonawi me kidi emoge egajake jape make-tai ebadikumijake kei me wage-tai kede peepu tijawijake okeija maki okogo bodija kijumai.

⁸Tijake jakei te-tai bageepa eteete mana, ’Buka naida kodo epeepi tijawii na kojoka, kodeka manaa-tita bagee mei ko edou peu.

⁹Okai kouja itaija akaweida uwijake edoupiga bageido utoma buka naidaapa naaebukai,’ etii.

¹⁰Jakei te-tai bagee kede ita maida uwijake edota bagee utoma kotuu etimakai, peu ma enaa ma. Tijake buka naida ebukita bagee ka tipi tipi timakai.

¹¹Tonawi kidi ebukita bageido edoune tijake jokoujo kijake, me idaana waka bukii maida make buka nai kagaba makii beu ti-toojogo edou.

¹²Tijake eteete mana, ’Kowaa ke, kawe dani tijake waka bukii maida make buka nai kagaba te makijake wadoujo keege ko?’ Etijake okai mana tagu.

¹³Tijake tonawi kidi ooto-tai bageepa eteete mana, Gane ma bado ma buda egadimijake juwouda ka bunita duba eemigimakei. Okai kouda kodaa jege ma egaagede ma to touda.

¹⁴Me wedaba manaa-tijake wija to ewitoki-motita kouja.

¹⁵Tijake Parisi bagee uwijake okaija mana maida ejakimakaine tijake amo wegai joko wegai.

¹⁶Okeija etope-tai Herodes eepe-tai bagee ma enaimo okaapa ebadikumijake, eteete mana, „Ei, Kuduu, inii epi aki maakidi me, daana Ugatameja takaa doodoudaiga nitopeige; aki me idaana ma ibo ejaikai beu, aki me ebepeka te witokai kouja.

¹⁷Okai kouja niti-niimai, akija gai ko kawe dani, Kaisar mege menii pijo, mee? dá,” etii.

¹⁸Kodeja Jesus okeija peu dimi jadojake eteete mana, „Kowaa kei, matabe bagee, magijo ka ikii nagaado tai?

¹⁹Eedai mege ko namuwakiwei,” etijake okei mege jadokemei.

²⁰Tijake Jesus eteete mana, „Meija ajá ma ebijamakita mana ma topi?”

²¹Etijake „Kaisar ipuwe” etii. Tijake Jesus wo eteete mana, „Keetigo ko Kaisar ipuwe agijo Kaisor wo menii, daana Ugatame ipuwe agijo Ugatame wo menii,” etii.

²²Okei kou mana juwijake ego takuu-takuu. Okei ejaikidokijake uwii.

²³Okai kou naago kodo Saduki bagee okaapa mei; bokata bagee taanigou mana wega-tai bagee kede. Okei egaado

²⁴teete mana, „Ei, Kuduu, Musaja enita: Kou danite me idaana joka makii beu tijake bokapi, kenekame mijáá kodo wo bukijake kenekame maida make me ijoo jakebajawii.

²⁵Inii jupi keneka pituwo toojogo. Iboutome kidi waka bukijake bokai. Joka makii beu tijake wenekame maida jagamo kodo jajaikai.

²⁶Kou dani maija, ipougame ma, mabiime ma, pituwaago kidiipa to.

²⁷Okei wadouto jagamo kodo bokai.

²⁸Keetigo ko bogata bagee anigou naago okei pituwo kede jagamo kodo meija waka kaita? Okei utoma ebukita kou no,” etii.

²⁹Tijake Jesus wo eteete mana, „Ikii uneune, kapogeije ma Ugatameja bida agijo ma ewo kouja.

³⁰Anigou naago okei waka bukii na beu, waka eumai na beu kouja; kodeja epaawado ka jaetigo-tai bagee dani bukaa.

³¹Kodeja bokata bagee anigou mana muto ko, ikii Ugatameja kitita mana kodo ebatai beu, mee? kou ko:

³²Ani ki Ibrahimja Ugatame, daana Isakja Ugatame, daana Jakubja Ugatame kidi. Ugatame kidi bokata bagee ipuwe ko beu, kodeja ija bagee ipuwe.”

³³Me wedaba kou mana kodo juwijake okaija etopita mana muto ego takuu-takuu umina tai.

³⁴Okai Saduki bagee mana tagu etijawita mana kodo Parisi bagee juwijake okei kotuu timakai.

³⁵Okei jupi ka me idaana, kii ke kapogeije epi me kidi egaado taine tijake eteete mana,

³⁶„Ei, Kuduu, Musaja dijo douja mana duba kawi ka nitimakita mana ki ibo?” etii.

³⁷Tijake Jesus eteete mana, „Akija Tuhan Ugatame kidi kegepa puki ka ei egai, daana dimi mana puki ka ma, daana dimi puki ka ma.

³⁸Kou ko ibo dijo douja mana kodo, daana epauto.

³⁹Wijaago ka maija, okai kii dani, aki watija ka bagee aki akaato danite ipa egai.

⁴⁰Kei mana wija kei ke Musaja dijo douja mana ma, gokobaki tijawiidaiga wegai tita bageeja ka mana ma epauto ka kodo,” etii.

⁴¹Parisi bagee kotuu timaki-toojogo gaa Jesusja okeepa egaado tai.

⁴²Eteete mana, „Keristus kidi mana ikii kawe dani gai? Okai meija Joka?” etii. Okeija wo eteete mana, „Daud Joka kidi ki.”

⁴³Etijake wo eteete mana, „Keetigo kawe dani tijake Roh ka gokobaki etijawijake Daud ka Tuhan eebatai? eteete mana.

⁴⁴Tuhan kidaa anija Tuhan kidiipa etita mana, Anija etikaato gebo animakai, Be kagata bagee akija bado mijo Tagi kaatiitaida to.

⁴⁵Kou danite Daudja Tuhan eebatipi, kawe dani tijake okai Jokame kai?” etii.

⁴⁶Tijake me idaana ma mana kato ma wo etii beu, daana okai kou naago make wado maija me idaana ma egaado tai uu beu.