Read Galela MATIUS 23 Bible Online

MATIUS 23 - Galela bible

MATIUS 23

¹Tijake Jesus kotuu timakita bageidoopa ma, etope-taidoopa ma eteete mana,

²„Kapogeije epi bagee ma, Parisi bagee ma Musaja animakaida animake-tai.

³Okai kouja okeija kitii danite kei te-tijake dijo dou. Kodeja okeija kei tita kodo ikii te kei tai. Okei mana wegai to tijake kei tai beu kouja.

⁴Okei udo kugouto dokii kaga gadimijake me kodeida jadokijawii, kodeja okei kede kipo ka kipa maija te winikidou.

⁵Okeija kei tai agijo utoma me ka nido-tijake kei tai to. Okeija dabaadijo kapo ibo gadi atii. Okeija kagaba momogi woja mijo dajawii.

⁶Buka naida diiti pagaadagaida ide, daana sembahjang owaa duba ibo animakaida maija.

⁷Daana akaada te-taida make me ka ibo ejaikai ide, daana me ka ’Kuduu Ibo’ eebate-tijake.

⁸Kodeja ikii ke ’Kuduu Ibo’ te keebatija, ikiija Kuduu meena to kouja, daana ikii utoma enakeneka bagee.

⁹Daana makiida me idaana ma naitai te eebatai, Ikiitai meena to kouja, epaawado ka topi kidi.

¹⁰Daana ikii ke ’migougu make-tai’ te keebatija, migougu make-tai ki meena to kouja, kii ke Keristus kidi.

¹¹Ikii jupi ka ibo kidi kijakei taitagi me.

¹²Meija akaato ibo awipi daba kaitagi, daana meija akaato mijo awipi ibo kaitagi.

¹³Peu kojoka! kowaa kei, kapogeije epi bagee ma, Parisi bagee ma, matabe bagee kede! Epaawado ka jakimakita makiida ikiija damo jekamijawijake me mijo jakimakai kouja.

¹⁴Ikii kede wadoujo te kijake wadoujo kaine bagee jamo jajekamijawii.

¹⁵Peu kojoka! kowaa kei, kapogeije epi bagee ma, Parisi bagee ma, matabe bagee kede! Ikii maikai ma maki ma bobi-motii, me idaana dijo kido-tijake eewiine. Okai diko dojake ikii ma ko okai abuma kadaga bodija ipuwe me eewii.

¹⁶Peu kojoka! kowaa kei, ikii bunita eepope-tai bagee, ikiija wegata mana kouja: Me idaana Ugatameja owaa maida baita makipi, ojaa kodo. Kodeja owaa ka megeido maida baita makipi, okaija baita makita kodo okai maida dokeenii.

¹⁷Kowaa kei, ikii bunita dimi beu bagee! Kawi ka ki ibo? mege kodo, mee? Ugatameja owaa mege dá tijawitaida kodo.

¹⁸Daana ikiija wegai ko, me idaana menijaida maida baita makipi, ojaa kodo. Kodeja menijaida maida, ka menita agijo maida baita makipi, okai maida dokeenii.

¹⁹Kowaa ke, ikii bunita bagee! Kawi ka ki ibo? menita agijo, mee? menijaida kodaa menita agijo dá tijawitaida kodo.

²⁰Okai kouja, meija menijaida maida baita makipi, okai kii maida ma kii maida ka agijoudo utoma maida maija.

²¹Daana meija Ugatameja owaa maida baita makipi, kii maida ma, kii duba ka tota me kidi maida maija.

²²Daana meija epaawado maida baita makipi, Ugatameja animakaida maida ma, kou maida animakita me maida maija.

²³Peu kojoka! kowaa kei, kapogeije epi bagee ma, Parisi bagee ma, matabe bagee kede! Ikii naapoudo selasih ma, adas manis ma, djintan ma gaatijago didee meneiga kouja, kodeja Musaja dijo douja mana duba ka ibo agijoudo, kou ko, boko petai mana ma, ipa dimi ma, enanaa dimi ma ikii inimugi tijawii. Kei umina beu kai peu kodaa, joko ka na te jaikijake.

²⁴Kowaa kei, ikii bunita eepope-tai bagee! Diipi motigo pi atii, kodeja unta gaawii.

²⁵Peu kojoka! kowaa kei, kapogeije epi bagee ma, Parisi bagee ma, matabe bagee kede! Ikii uwaawe ma dokouda ma tapouda witogai, kodeja tugouda kodo bokomai ma, peu ma ka ebetume.

²⁶Kowaa kei, bunita Parisi bagee! Uwaawe ma dokouda ma tugouga tiga witogikumijake tapo jato maija jimu witogidoke tija.

²⁷Peu kojoka! kowaa kei, kapogeije epi bagee ma, Parisi bagee ma, matabe bagee kede! Ikii me oka kepo widii tita dani bukaa. Tapo jato dou enauto, kodeja tugouga kodo mitoo tagi ma, joko ka peudo ma.

²⁸Kou dani ikii maija me pekaida kidou enaa, kodeja ikiija tugouga ko matabe ma, peu ma ka ebetume.

²⁹Peu kojoka! kowaa kei, kapogeije epi bagee ma, Parisi bagee ma, matabe bagee kede! Ikii tikauwa ka gokobaki tija-wiidaiga wegai tita bagee kede emakitaida jakei tai, daana enaa bagee ka oka ga-tou mogo diiti timakai.

³⁰Tijake ikiija wegaate ko, ’Kou danite inii muumaane tota gaa inii tou naako, inii okei ma enaimo te kija, gokobaki tija-wiidaiga wegai tita bageeja emo uwijawii etita kodo’.

³¹Kou dani ikii akaato maida make wegai, ikii ke gokobaki tijawiidaiga wegai tita bagee kede wagimakita bagee ka jokaane kede mana kodo.

³²Ikiija aijaane muumaane ka kei tai agijo ikii boko duwajawii.

³³Kowaa kei, ikii jina tuma, ikii jina ka jokaane, kawe dani tijake ikii kadaga bodija duba make petii tija?

³⁴Okai kouja gai, ani gokobaki tijawiidaiga wega-tai bagee ma, dimi boko jago bagee ma, kapogeije epi bagee ma ikeepa kijaebadikumii. Okei me ino ikii wagimakai ma, pija boko maida edajawii ma taita. Daana me ino ikiija sembahjang owaa duba godijai etaita, daana maki enaida make maki enaidaapa peepu etaita.

³⁵Kii makiida kiija enaa bageeja ka tuumita emo utoma ikii maida dokidoke te-tita; kou ko, maakodo me Habilja emo kidiipa make, kii kidi Barakia jokame Zakaria kidi ka emo to, Ugatameja owaa ma jo-menijaida ma utuuja ikiija wagimakita me kidi.

³⁶Beu maa kou ani kitii, kei manaido kei kii tuma wado jado-kijawii to.

³⁷Ei, Jerusalim, Jerusalim, gokobaki tijawiidaiga wega-tai bagee wage-tai kodo, daana okaapa ebadikumita bagee mogo ka wagigoo te-tai! Kigi magoo aki jokaane aneepa ebukaine kodaa, ajam uka nakaido aa mijo eboomimakai danite, kodeja ikii be gai.

³⁸Beu maa kou, ikiija owaa ko kijajaikidokijake diitu daatu tidoke.

³⁹Ani kitii koouja, ikii wadaato te nadouta, tijake ikiija ka ’Tuhan eka dubaiga meete me kidi muta etuwai’ eniitaida to.”